Soqoni ena Bogi ni Vakarauwai
Na Marau Nida sa Vakabulai
Veitikina lavetaki
Na veivutuni e sala meda vakila kina na loloma ni Kalou ka meda kilai Koya ka lomani Koya ena dua na sala eda sega vakadua tu ni kila.
Au kila ni noda Turaga ka iVakabula, o Jisu Karisito, e dauniveivakabulai levu.
Eso na gauna eda na vakila ni sega ni rawa meda vakabulai, de dua na cala eda vakayacora ena sega ni yacova na loloma ni Kalou kei na kaukauwa ni Nona veisorovaki na iVakabula, baleta na dredre e lako curumi tiko se na veika e sa yaco oti. Au vakadinadinataka nio se tiko ga ena ruku ni Nona veivueti na iVakavuvuli levu.
Nida bulataka na noda veiyalayati, na Turaga na vukei keda ka solia vei keda na kaukauwa eda gadreva meda kila ka vorata na malumalumu, wili kina na malumalumu vakayalo ni dokadoka.
Na noda gadreva na veivakabulai kei na veivuke e sega ni vaka ogai Koya, ni sa iusutu ni Nona lako mai.
Na Tamada Vakalomalagi kei na iVakabula e raici kemuni. E rau kila na yalomu. Erau kauwaitaka na veika o kauwai kina, oka kina o ira o lomana.
Kevaka o sotava tiko edua na dredre o nanuma ni sa dodonu mo lako sivita, kua ni yalo lailai. Waraka na kena gauna donu, maroroya na nomu veiyalayalati, veivutuni vakawasoma, vakasaqara na veivuke mai vei ira nomu iliuliu kevaka o gadreva, gole vakawasoma kina vale ni Turaga. Vakarorogo ka vakamuria na veivakayarayarataki e lako mai vei iko. Ena sega ni laiva o Koya na Nona isema ni veiyalayalati kei iko.
Na veisiga yadua e solia tu na madigi meda vakasinaiti keda ena inuinui kei na veika eda rawata baleti Jisu Karisito.