“ʻOku faingataʻa ke u fakafeohi. Te u fakakaungāmeʻa fēfē mo e kakaí?,” Ki Hono Fakamālohia ʻo e Toʻu Tupú, Fēpueli 2024.
Ngaahi Fehuʻí mo e Talí
“ʻOku faingataʻa ke u fakafeohi. Te u fakakaungāmeʻa fēfē mo e kakaí?”
Ko ha Founga Ia
“Kuó u fefaʻuhi mo hono faʻu ha ngaahi vā fetuʻutaki lelei ʻi he konga lahi ʻo ʻeku moʻuí! Ko ha founga akoʻanga ia. Akoako fakahoko ha fepōtalanoaʻaki mo ha fakafoʻituitui pe ko ha kulupu tokosiʻi. ʻEke ha ngaahi fehuʻi peá ke fie ʻilo ʻi hoʻo feinga ke maheni mo e niʻihi kehé. ʻE fie feohi ʻa e kakaí mo koe ʻi heʻenau vakai ki ho ngaahi ʻulungaanga faka-Kalaisí.”
Ethan C., 17, Misikeni, ʻIunaiteti Siteiti ʻo ʻAmeliká
Kau ʻi he Ngaahi ʻEkitivitī ʻa e Siasí
“Kiate aú, ʻoku faingataʻa ʻaupito ke fakakaungāmeʻa pe talanoa mo e niʻihi kehé, ka kuo tokoniʻi au ʻe he kau ki he ngaahi ʻekitivitī ʻa e Siasí. Naʻe tokoni ʻeku ʻalu ki he KFT mo e ngaahi nofo kemi kehé ke u ako mo vahevahe lahi ange ai mo e niʻihi kehé ʻi he fakalaumālie mo e fakasōsiale fakatouʻosi.”
Caroline S., 14, Sanitiako, Silei
Lotua ha Tokoni
“ʻI heʻeku foua ha fetukutuku lahi, naʻá ku fiemaʻu moʻoni ke ʻi ai haʻaku ngaahi kaungāmeʻa. Naʻá ku lotua ha tokoni. ʻI heʻeku ʻalu ki he lotú ʻi he ʻaho hono hokó, naʻe talitali lelei au ʻe he tokotaha kotoa pē, pea naʻe tokolahi hoku ngaahi kaungāmeʻá. Falala ki he ʻOtuá pea maʻu ʻa e tuí.”
Cache D., 13, Mīsuli, ʻIunaiteti Siteiti ʻo ʻAmeliká
Hoko ko ha Faʻifaʻitakiʻanga
“ʻOku faingataʻa ke maʻu ha feohi fakakaungāmeʻa moʻoni. Ka ʻo kapau te ke faʻa kātaki, ʻaukai, lotu, pea tafoki maʻu pē ki he ʻEikí, te Ne tokoniʻi koe ke ke hoko ko ha faʻifaʻitakiʻanga faivelenga. ʻE mamata leva ʻa e kakaí ki hoʻo māmá mo fie feohi mo koe.”
Raquel F., 17, Palanā, Palāsila
Tangutu, Talanoa, Vahevahe
“ʻOku ou maheni lelei ange mo e kakaí ʻi heʻeku tangutu ʻo talanoa mo kinautolú. Fakakaukauʻi pe ko e hā ʻa e lanu ʻoku nau saiʻia taha aí, ngaahi faiva ʻoku nau saiʻia ke mamata aí, meʻa ʻoku nau saiʻia ke faí, mo e alā meʻa peheé. Vahevahe foki mo ha ngaahi meʻa fekauʻaki mo koe. ʻE faifai pē pea hoko ʻa e tokotaha foʻou ko ia ʻi hoʻo kalasí ko hoʻo kaungāmeʻa lelei tahá.”
Rachel S., 11, ʻIutā, ʻIunaiteti Siteiti ʻo ʻAmeliká
Fakafanongo
“ʻEke ha ngaahi fehuʻi. ʻOku saiʻia ha kakai tokolahi ke talanoa fekauʻaki mo kinautolu pē. Kuó u ako kapau te ke fakafanongo mo ʻai ke ongoʻi ʻe he tokotaha ʻe tahá ʻoku mahuʻinga pea ʻokú ne maʻu hoʻo tokangá, ʻoku tokoni moʻoni ia ke fakamālohia ʻa e ngaahi vā fetuʻutakí.”
Eleanor B., 13, Kenitaki, ʻIunaiteti Siteiti ʻo ʻAmeliká
ʻE Lava Ke Tokoni ʻa Kalaisi
“Manatu maʻu pē ko hoʻo kaungāmeʻa ʻa Sīsū Kalaisi pea ʻokú Ne finangalo ke tokoniʻi koe. Lotua ha ngaahi faingamālie mo ha loto-toʻa ke ke fakafeohi mo feinga ke ʻilo lelei ange ai ha taha kehe.”
Connor F., 17, ʻIutā, ʻIunaiteti Siteiti ʻo ʻAmeliká
ʻOua ʻe Fakamahamahalo
“Naʻá ku ongoʻi hangē naʻe ʻikai fie talanoa mai ʻa e kau finemui matuʻotuʻa angé kiate aú koeʻuhí ko ʻeku taʻu siʻi angé. Naʻá ku ʻalu leva ki ha ʻekitivitī peá u ʻiloʻi ai naʻa nau saiʻia ʻi heʻemau feohí. Ko ia ai, talanoa ki he kakaí, he mahalo te nau fie talanoa pē mo koe.”
Lilly L., 12, Kalefōnia, ʻIunaiteti Siteiti ʻo ʻAmeliká