“ʻOku ou Nofo Nai ‘ʻi he Fiefia’?,” Ki Hono Fakamālohia ʻo e Toʻu Tupú, Fēpueli 2024.
Haʻu, ʻo Muimui ʻIate Au
ʻOku ou Nofo Nai “ʻi he Fiefia”?
Ko ha ngaahi fakakaukau ʻeni ke ke moʻui ai ʻi he founga naʻe pehē ʻe Nīfai naʻe moʻui ai hono kakaí.
Tā fakatātā ʻa Alyssa Gonzalez
Hili ha taimi nounou mei he mavahe ʻa e kau Nīfaí mei he kau Leimaná, naʻe pehē ʻe Nīfai naʻe “nofo [hono kakaí] ʻi he fiefia” (2 Nīfai 5:27). ʻE ngali fakaʻohovale ia ʻi he fakakaukau atu naʻe ʻi ai ha falukunga kakai ʻe taha naʻa nau fakaʻamu ke tāmateʻi kinautolu (vakai, 2 Nīfai 5:1–6, 14). ʻE lava fēfē ke fiefia ha taha ʻi ha ngaahi tūkunga pehē?
ʻUluakí, fakatokangaʻi ange ʻoku ʻikai ʻuhinga ʻa e “naʻa mau nofo ʻi he fiefiá” ke pehē “naʻe fiefia ʻa e Nīfai kotoa ʻi he taimi kotoa pē.” ʻOku ʻuhinga ia naʻa nau moʻui ʻi ha faʻahinga founga, pea mo fakahoko ʻa e ngaahi meʻa naʻe faʻa fakaiku ki he fiefiá. ʻI hono fakalūkufuá, neongo honau ngaahi faingataʻaʻiá, ka ko ha taimi fakafiefia ia.
Ko e hā leva ʻa e “nofo ʻi he fiefiá”? Te tau lava fēfē ʻo fakahoko ia ʻi heʻetau moʻuí, ʻa ia ʻoku ʻi ai foki hano ngaahi faingataʻá? Tau vakai angé ki aí!
-
Talangofua. “Naʻa mau tokanga ke tauhi … e ngaahi fekau ʻa e ʻEikí” (2 Nīfai 5:10).
Ko e Sitepu 1 ʻa hono moʻui ʻaki ʻo e ongoongoleleí. Mahalo te ke fiefia fakataimi ʻi he angahalá, ka he ʻikai tolonga ia. Ko e talangataʻa ʻi he ʻiloʻilopau ki he ʻOtuá ʻoku ʻikai ko e “nofo [ia] ʻi he fiefiá” (vakai, ʻAlamā 41:10).
-
Fekumi ʻi he ngaahi folofolá. “Pea ko au, Nīfai, kuó u ʻomi … e ngaahi lekooti ʻa ia kuo tongitongi ʻi he ngaahi peleti ʻo e palasá” (2 Nīfai 5:12). “Kuo mau … fakatotolo ʻi ai ʻo ʻiloʻi naʻe lelei ia; ʻio, ʻoku fuʻu mahuʻinga ʻaupito ia kiate kimautolu” (1 Nīfai 5:21) .
Naʻe maʻu ʻe he kakai ʻo Nīfaí ʻa e folofolá. Pea naʻe ʻikai ke nau maʻu pē kinautolu—ka naʻa nau fekumi ai.
-
Fanongo ki he kau taki kuo ueʻi fakalaumālié. “Ko au, Nīfai, naʻá ku fakanofo ʻa Sēkope mo Siosefa, ke na hoko ko ha ongo taulaʻeiki mo e ongo akonaki ki … hoku kakaí” (2 Nīfai 5:26).
Naʻe fakaʻaongaʻi ʻe he ongo akonakí ni ʻa e folofolá ke fakahinohinoʻi kinaua (vakai, 2 Nīfai 4:15; 6:4).
-
ʻAlu ki he temipalé (mo e ngaahi potu toputapu kehé). “Ko au, Nīfai, naʻá ku langa ha temipale” (2 Nīfai 5:16).
ʻOku mahuʻinga ke ʻi ai ha ngaahi potu toputapu hangē ko e ngaahi ʻapisiasí mo e temipalé ke tānaki mo moihū ai ʻa e kau ākongá. (ʻE lava pē ke tau pehē naʻe ʻikai ke maʻu pē ʻe he kau Nīfaí ha temipale—naʻa nau fakaʻaongaʻi moʻoni ia.) Kapau ʻoku ʻikai ke ke lava ʻo ʻalu tonu ki he temipalé, te ke lava maʻu pē ʻo fakahoko ʻa e ngāue hisitōlia fakafāmilí.
-
ʻAi ke ke nima-poto. “Naʻá ku akoʻi ʻa hoku kakaí ke langa ha ngaahi fale, pea ngāue. … Naʻá ku pule ke faʻa ngāue ʻa hoku kakaí, ʻo ngāue ʻaki honau nimá” (2 Nīfai 5:15, 17).
ʻOku kau ʻi he “nofo ʻi he fiefiá” ʻa hono maʻu ha ngāue ke faí! Ko ha ngāue, ngafa, fatongia—ko ha meʻa ʻokú ne ʻai ke ke tokanga taha mo fakataumuʻa ki ai (mo ha taimi feʻunga ke ke mālōlō ai foki). ʻOku faingataʻa ke fiefia kapau ʻokú ke taʻeoliʻia ʻi he taimi kotoa pē.
Te ke pehē nai ʻokú ke lolotonga nofo ʻi he fiefia? Kapau ʻoku ʻikai, mahalo ʻe lava ʻe he sīpinga ʻa Nīfaí ʻo ʻoatu ha ngaahi fakakaukau ki he founga ke ke fakalakalaka aí.