“Usa ka Tinun-an ni Jesukristo,” Alang sa Kalig-on sa mga Kabatan-onan, Ene. 2024.
Lagda human sa usa ka Lagda
Usa ka Tinun-an ni Jesukristo
Tan-awa sa unsang paagi nga ang paghulagway ni Mormon sa iyang kaugalingon maggamit usab nganha kaninyo.
tinun-an ni Jesukristo
Ang pulong nga tinun-an nagpasabot og usa ka tawo kinsa nagkat-on gikan sa usa ka magtutudlo o agalon (sama sa usa ka estudyante o magtutuon).
Ang mga tinun-an ni Jesukristo nagkat-on gikan Kaniya, nagsunod sa Iyang mga pagtulun-an, ug naningkamot nga mahisama Kaniya.
tinawag kaniya sa pagpahayag sa iyang pulong
Pipila sa mga tawo adunay espesyal nga calling sa pagpahayag sa pulong ni Kristo, sama sa mga misyonaryo. Apan pinaagi sa atong mga pakigsaad, kita nagsaad sa paghupot sa Iyang mga sugo, lakip ang sugo nga mahimong usa ka kahayag ngadto sa kalibotan (tan-awa sa Mateo 5:14–16). Ug nagpahayag kami sa among pagkaandam nga “mobarog ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9).
Ang matag miyembro sa Ang Simbahan ni Jesukristo sa mga Santos sa Ulahing mga Adlaw gitawag sa pagtabang og tuman sa buhat sa Ginoo ug sa pagpakigbahin sa Iyang ebanghelyo (tan-awa sa Doktrina ug mga Pakigsaad 38:40–41).
kinabuhing walay kataposan
Ang kinabuhing walay kataposan nagpasabot og kinabuhi diha sa celestial nga gingharian uban sa Langitnong Amahan ug ni Jesukristo. Kini mao ang ganti alang sa mga tawo kinsa adunay hugot nga pagtuo diha ni Jesukristo, maghinulsol, maghimo ug maghupot sa mga pakigsaad, ug maglahutay ngadto sa kataposan.
Ang Ginoo nag-ingon, “Mao kini ang akong buhat ug ang akong himaya, ang pagpahinabo sa pagka-imortal ug sa kinabuhi nga dayon sa tawo” (Moises 1:39). Ang mga tinun-an nagtabang Kaniya sa pagtuman sa Iyang buhat.