“Ako usa ka Tinun-an ni Jesukristo,” Alang sa Kalig-on sa mga Kabatan-onan, Ene. 2024.
Tema sa mga Kabatan-onan sa 2024
Ako usa ka Tinun-an ni Jesukristo
Kamo makasunod sa Manluluwas ug makasangyaw sa Iyang pulong ngadto sa uban.
Kamo ba natingala sukad kon ngano, human mang-ayo og mga tawo, misulti si Jesus sa pipila kanila sa dili pagsulti ni bisan kinsa (tan-awa sa Marcos 7:36)? Usa ka rason mahimong may kahimoan sa matang sa mga sumusunod nga Iyang gikinahanglan. Mahimong inyong hunahunaon nga kon ang mga tawo misulti mahitungod sa ilang mga pagkaayo kini mahimong usa ka maayong paagi alang ni Jesus sa pagdani og mga sumusunod. Hinoon, si Jesus wala magkinahanglan og mga sumusunod lamang. Siya nagkinahanglan og mga tinun-an.
Si Jesus miingon ngadto ni Pedro ug Andres, “Sumunod kamo kanako” (Mateo 4:19). Ang Hubad ni Joseph Smith sa bersikulo mabasa, “Ako mao siya kinsa gikasulat sa mga propeta; sunod kanako” (Hubad ni Joseph Smith, Mateo 4:18 [sa Mateo 4:19, footnote a]). Ang pagdapit dili ang paghugoy-hugoy uban Kaniya sa makadiyot. Siya gusto kanila nga mahimong Iyang mga tinun-an sa kahangtoran.
Siya dili buot kanila nga magtan-aw lamang Kaniya nga nagtudlo sa katawhan, naghigugma sa katawhan, ug naghimo og mga milagro. Siya buot kanila nga mobuhat sa sama. Siya buot nga ang Iyang buhat mahimo nga ilang buhat. Ang pagpili ni Kristo nagpasabot nga sila magkat-on sa pagserbisyo ingon nga Siya miserbisyo ug sa paghunahuna ingon nga Siya mihunahuna. Sila magbansay sa pagpuyo sama nga Siya mipuyo, ug Siya motudlo kanila ug mohatag kanila sa tabang nga sila nagkinahanglan nga mahimong mas sama Kaniya.
Ang Griyego nga pulong sa tinun-an mao ang mathetes. Nagpasabot kini og labaw pa kay sa sumusunod o estudyante. Kasagaran kining gihubad isip tinun-an. Sa panahon ni Kristo, ang mga tinun-an sagad mipili sa magtutudlo gikan kang kinsa sila gusto nga makakat-on uban sa tumong ngadto sa pagkahimong mga magtutudlo mismo. Wala mosunod si Kristo sa sagad nga naandan. Gibali Niya kini ug nangita hinoon sa Iyang mga tinun-an. Karon, nagtawag si Kristo kanato sa pagduol ngadto Kaniya. Nagtawag Siya kanato nga mahimong Iyang mga tinun-an ug nagpahayag sa Iyang pulong taliwala sa iyang mga katawhan aron sila unta makabaton og kinabuhi nga walay kataposan (tan-awa sa 3 Nephi 5:13).
Usa ka batan-ong babaye gikan sa Haiti diha sa Carribean mipakita sa iyang tinguha nga mahimong usa ka tinun-an ni Kristo pinaagi sa iyang pagdapit sa iyang higala kinsa dili miyembro sa Simbahan sa pagkuyog kaniya ngadto sa usa ka komperensiya sa AKK. Sa una ang amahan sa iyang higala dili gusto nga motugot sa iyang anak nga babaye sa pag-uban. Ang mga lider sa Simbahan mipasabot mahitungod sa nindot nga mga kasinatian nga nagpaabot kaniya ug sa maayo kaayo nga mga magtatambag sa young adult kinsa magbantay kaniya. Mihatag ang amahan og pagtugot sa iyang anak nga babaye sa pagtambong, ug human makita ang kalainan nga nahimo niini sa kinabuhi sa iyang anak, siya mihatag usab kaniya og pagtugot sa pagtambong og mga miting sa Simbahan ug––unom ka bulan wala madugay––nagpabunyag.
Usa ka batan-ong lalaki gikan sa Argentina sa Kasadpang Amerika mipakita sa iyang tinguha nga mahimong usa ka tinun-an ni Kristo pinaagi sa pagpakigbahin sa pipila sa iyang kendi ngadto sa usa ka higala samtang nagsakay sila sa bus padulong sa eskwelahan. Sa dihang nakuha niya ang usa nga may lami nga kape, mipasabot siya nga sukad wala gayod siya makagusto sa lami niana gumikan kay walay usa sa iyang pamilya miinom og kape. Kana misangpot ngadto sa panagsultihanay mahitungod sa Simbahan, nga misangpot ngadto sa pagdapit sa pagtambong sa mga miting, nga sa kadugayan midangat sa pagpasakop sa iyang higala sa Simbahan ug sa pagserbisyo og usa ka misyon sa Chile.
Dili tanan nga inyong sultihan mahitungod sa Simbahan o dapiton ngadto sa usa ka kalihokan sa Simbahan buot nga moapil. OK lang. Dili tanan nga gikasulti ni Kristo sa panahon sa Iyang yutan-ong pagpangalagad gani mipasakop. Sa gihapon, samtang kita nagpili nga mahimong mga tinun-an ni Jesukristo ug nagpahayag sa Iyang mga pulong, Siya mohatag kanato og kaisog ug balaang panabang. Magkat-on kita kon sa unsang paagi mahimong mas mahisama Kaniya, ug kana mao ang unsay buhaton sa mga tinun-an.