Pagkatinun-an: Ang Unsa ug ang sa Unsang Paagi

Ni David A. Edwards

Mga Magasin sa Simbahan

Sa pag-ila kon kinsa gayod kamo sa tinuod ug unsa kamo mahimo, hangopa ang unsa ug ang sa unsang paagi ang pagkamahimong tinun-an ni Jesukristo.

alt text

I-download ang PDF

“Kinsa ako?”

Kini usa ka pangutana nga daghang batan-ong mga tawo nagsiksik alang sa mga tubag niini. Samtang kamo nagtubo ug nagkat-on ug naglambo sa inyong talagsaon nga paagi, natural nga kamo mahibulong mahitungod sa unsay nagpaila kaninyo, unsay naghatag kaninyo og inyong pagkatawo. Naghatag si Presidente Russell M. Nelson og pipila ka bililhong giya kabahin niini nga pangutana:

“Kinsa ikaw? Una ug labing importante, ikaw usa ka anak sa Dios, usa ka anak sa pakigsaad, ug usa ka tinun-an ni Jesukristo. Samtang inyong hangopon kini nga mga kamatuoran, ang atong Langitnong Amahan motabang kaninyo nga makab-ot ang inyong kinatas-an nga tumong sa pagpuyo sa kahangtoran diha sa Iyang balaanon nga presensiya” (“Mga Pagpili alang sa Kahangtoran [Choices for Eternity]” [tibuok kalibotan nga debosyonal alang sa mga young adult, Mayo 15, 2022], broadcasts.ChurchofJesusChrist.org).

Gitudlo ni Presidente Nelson nga walay laing mga ngalan ang gikinahanglan nga mahimong mas importante nganha kaninyo kay sa niining tulo ka ilhanang mga ulohan: (1) anak sa Dios, (2) anak sa pakigsaad, ug (3) tinun-an ni Jesukristo.

Ang Pagkatawo sa usa ka Tinun-an

Mag-istorya kita og gamay pa mahitungod nianang ikatulo, tinun-an ni Jesukristo. Sa unsang paagi kamo sa tinuoray naghangop niini nga pagkatawo ug naghimo nga usa ka tinun-an?

Ang pagsunod sa Manluluwas ug mahimo nga Iyang tinun-an, kamo nagkinahanglan nga motutok sa duha unsa ang inyong buhaton ug sa unsang paagi inyong buhaton kini.

Sama pananglitan, gusto sa Manluluwas kanato nga mohatag ngadto sa uban ug moserbisyo kanila, apan Siya nagdapit kanato sa pagbuhat niini sa kinabubut-on ug malipayong paagi kay sa kasuko nga paagi. Kon kita gustong mohatag ug moserbisyo, madawat nato ang labing dako nga mga ganti sa pagpakatinuod nga tinun-an. (Tan-awa sa 2 Mga Taga-Corinto 9:7; Moroni 7:8.)

Busa, atong tan-awon unsay buhaton sa mga tinun-an ug sa unsang paagi sila nagbuhat niini.

Unsa ang Buhaton sa usa ka Tinun-an

Ania ang pipila sa daghang mga butang nga ang usa ka tinun-an ni Kristo makabuhat sa pagsunod sa Manluluwas.

• Pagbansay og hugot nga pagtuo sa paagi nga ang mga tinun-an magbansay og hugot nga pagtuo.

• Pagserbisyo sa paagi nga ang mga tinun-an magserbisyo.

• Pag-ampo sa paagi nga ang mga tinun-an mag-ampo.

• Pagtuon sa paagi nga ang mga tinun-an magtuon.

• Paghinulsol sa paagi nga ang mga tinun-an maghinulsol.

• Paghunahuna sa paagi nga ang mga tinun-an maghunahuna.

• Higugmaa ang Dios sa paagi nga ang mga tinun-an maghigugma sa Dios.

• Higugmaa ang uban sa paagi nga ang mga tinun-an maghigugma sa uban.

• Pagtudlo sa paagi nga ang mga tinun-an magtudlo.

• Lahotay sa paagi nga ang mga tinun-an maglahotay.

Sa unsang paagi ang usa ka Tinun-an Magbuhat Niini

Ania ang pipila ka mga paghulagway kon sa unsang paagi nga ang usa ka tinun-an mahimong magbuhat niini nga mga butang. Daghan niini nga mga paghulagway mahimong magamit ngadto sa daghan nga mga butang. Ang uban niini mahimong magamit ngadto sa tanan.

• Uban sa mga kasingkasing ug mga hunahuna nga nasentro diha ni Jesukristo

• Kinabubut-on

• Mapainubsanon

• Mahigugmaon

• Makugihon

• Kanunay

• Kinasingkasing

• Matinguhaon

• Matinuoron

• Walay pagpihig o kapig-ot sa panghunahuna

• Mapailobon

• Walay kahadlok

• Maisogon

• Nakatutok sa mga panginahanglan sa uban

• Nakasentro sa mga kasulatan

• Walay pagduhaduha

• Mahiyason

• Puno sa paglaom

• May tinguha nga mahisama sa Langitnong Amahan ug ni Jesukristo

• Walay mga kalinga

Kamo mahimong mahatagan og kaayohan gikan sa paghunahuna mahitungod sa duha nga unsay inyong gibuhat sa pagsunod sa Manluluwas ug sa unsang paagi kamo nagbuhat niini. Kon inyong gibati nga kamo kinahanglang maghimo og piho nga mga kausaban sa bisan hain nga kategoriya, maayo kaayo kana. Kini maingon og ang Espiritu nag-aghat kaninyo nga mahimong gani usa ka mas maayong tinun-an.

Ang Pagkatawo nga Hangopon ug Mahalon

Sama sa gisulti ni Presidente Nelson, ang pagkatinun-an ni Jesukristo usa ka importante kaayo nga bahin sa inyong pagkatawo. Samtang inyong gihangop ug gimahal kini nga pagkatawo, ang inyong Langitnong Amahan motabang kaninyo nga mahimong ang tawo nga Siya nahibalo nga kamo mahimo––ang tawo nga kamo, sa kinahiladman, sa tinuoray gusto nga mahimo.

Tinun-an

Usa ka tawo kinsa nagkat-on gikan sa usa ka magtutudlo o maestro (sama sa usa ka estudyante o magtutuon). Ang mga tinun-an ni Jesukristo nagkat-on gikan Kaniya, nagsunod sa Iyang mga pagtulun-an, ug naningkamot nga mahisama Kaniya.