“Daghang mga Paagi sa Pagkat-on,” Alang sa Kalig-on sa mga Kabatan-onan, Ene. 2024.
Daghang mga Paagi sa Pagkat-on
Gusto ka bang mohimo sa kalibotan nga mas manindot og gamay? Tanan kini magsugod pinaagi sa pagkat-on kon unsaon.
Paghulagway ni Dean Macadam
Unsa ang kalabotan sa pagkat-on kon unsaon pagputol sa buhok ngadto sa pagpahimutang og mga suga sa entablado?
“Tanan kini kabahin sa akong plano,” nag-ingon si Lisa, usa ka young adult na karon diha sa iyang unang tuig sa kolehiyo.
Si Lisa misugod og pag-eskwela sa paggamit sa mga kosmetik [kosmetolohiya] sa edad nga 16. Gani nakakaplag siya og programa nga nagpatambong kaniya og mubo nga mga adlaw sa hayskul aron siya makabansay og kosmetolohiya sa matag hapon. Ang kamatuoran nga siya karon anaa sa kolehiyo nagtuon og teknolohiya sa teyatro [theater tech] wala magpasabot nga wala siya magmalamposon sa tanang butang bahin sa salon. Sa tinuoray, ang tanan naglambo sa eksaktong paagi sumala sa iyang gilaoman.
“Ako gusto nga adunay kahanas nga akong magamit sa pagtabang og bayad alang sa kolehiyo,” nag-ingon si Lisa. “Labot pa, kini nagtugot kanako sa pagserbisyo sa ubang mga tawo ug makatigom sa kwarta sa mga pagpaputol sa buhok sa among pamilya hangtod sa akong tibuok nga kinabuhi!”
Nganong Kita Magkat-on
“Ang Langitnong Amahan gusto nga ang Iyang mga anak nga babaye ug mga anak nga lalaki kanunay nga magkat-on.”1 Ania ang pipila lamang sa daghang mga paagi nga ang tibuok kinabuhi nga pagkat-on usa ka dako kaayo nga panalangin:
-
Kamo mas maayong makatabang ug makatudlo sa inyong mga higala, pamilya, ug sa uban.
-
Kamo mas maayo nga makaserbisyo diha sa Simbahan ug sa inyong komunidad.
-
Kamo adunay mas daghang magamit nga kahanas alang sa pagbarog sa kaugalingong paningkamot.
-
Makahimo kamo sa pagdala sa inyong kahibalo uban kaninyo human kamo mamatay.
-
Samtang kamo aktibo sa pagbansay ug pagtrabaho sa inyong utok, kini magpabilin nga mas mahimsog.
Unsaon Nato sa Pagkat-on
Atong nakat-onan pinaagi sa mga kasulatan nga kinahanglan atong “Pangita[on] ang pagtulun-an, gani pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118; tan-awa usab sa 130:18). Karon adunay mas daghang mga oportunidad alang sa pagkat-on kay sa kaniadto, sama sa:
-
Pormal nga pag-eskwela, lakip ang kolehiyo, unibersidad, ug pamatigayon (trade) nga mga eskwelahan.
-
Pagpangita og kahibalo “gikan sa labing maayo nga mga basahon” (Doktrina ug mga Pakigsaad 88:118). Mahimo usab ninyong idugang, “ang labing maayo nga digital nga mga tinubdan.”
-
Pagkat-on og direkta gikan sa mga higala ug mga sakop sa pamilya.
Ideya alang sa Kalihokan! Pagpahigayon og usa ka “pagbinayloay sa kahanas” nga kalihokan sa pagtudlo diha sa inyong branch o ward. Ang tanan moanha nga andam sa pagtudlo og usa ka butang nga ilang nahibaloan kon unsaon sa pagbuhat.
-
Pag-ampo ug pagtuon sa ebanghelyo.
-
Matinud-anong pagpuyo nga mahimong takos sa kanunay nga pakig-uban sa Espiritu Santo, kinsa ang “magatudlo kaninyo sa tanang mga butang” (Juan 14:26).
-
Ang pag-eksperimento, mamugnaong paghunahuna, ug paningkamot. Ang mahinungdanong butang mahitungod sa kahibalo mao ang mas daghan og makat-onan sa matag adlaw. Kamo makadugang ngadto sa tipiganan sa kalibotan sa kahibalo.
Kon Kita Nagkat-on
Sa kataposan, bisan nagkat-on kamo unsaon pagputol sa buhok sama ni Lisa o nagkat-on unsaon pagpalambo sa sunod nga henerasyon nga teknolohiya sa enerhiya, nagpahinumdom si Presidente Nelson kanato nga kanunay adunay usa ka labing maayo nga panahon nga aktibong magbuhat niana nga maong mga buluhaton:
“Oo, kinahanglang makakat-on kita gikan sa kagahapon, ug oo, kinahanglan kitang mangandam alang sa umaabot,” siya mitudlo. “Apan karon lamang kita makahimo. Karon mao ang panahon nga kita makakat-on. … Karon mao ang panahon nga kita makapanalangin sa uban.”2
Nan, karon. Unsa ang gusto ninyong makat-onan karong adlawa?