“Dua na Pailate ena Mataivalu ni Turaga,” Me iSakisaki ni iTabagone, Janu. 2024.
Dua na Pailate ena Mataivalu ni Turaga
O Lamar F. mai na Tokalau kei Midlands mai Igiladi e tu vua e vuqa na lalawa ka dau vakavukaci koya tu, ena gauna mada ga e voravora kina na bula.
iTaba e so e vakarautaka o Satomi Folkett
“Au a dau gadreva tu me‘u vukataki waqavuka ena dua na gauna balavu kau sega ni nanuma rawa se a tekivu ena gauna cava,” e kaya o Lamar F. yabaki 17. A tukuna vua e dua na itokani mai na nona gauna ni veitau qiqidabe me baleta e dua na ilawalawa ni veivukei ni Peritania ka dau vukei ira era vakaleqai tu vakayago me ra vuka, sa maqusa o Lamar me tovolea.
Tatadra Tubu-ki-Lagi
A sainitaka o koya e rua na parokaramu ni soqosoqo ni veivukei oya. E dua vei rau, na Parokaramu ni Pailate ni Gone Lalai (JAPP), a tauyavutaki vakatabakidua me baleti ira na itabagone ena maliwa ni yabaki 12 kei na 18. Na veiparokaramu oqo kei na lesoni yadua tale eso era sa cokataki koya ena dua na ikalawa me volekata yani na nona lalawa levu—me rawata na nona Laiseni ni Pailate Vakaitaukei.
E dua na tiki ni veivakauqeti vua e lako mai na nona matavuvale. Na tamai Lamar vakatawa e a imatai ni tamata me bacani koya ki na vuka, ka dau kauti koya yani ki na soqo ni sotasota ni waqavuka ena veiyabaki. E muri, ni sa wili vaka gone susugi ena dua tale na matavuvale ni se qai yabaki va, a tomana tikoga na malele nei Lamar ki na buturara ni waqavuka na nona saga o tamana ni veisusu na nona laiseni ni pailate. “Sa ikoya sara ga ka veivakauqeti vei au ena noqu lalawa me‘u na pailate,” e kaya o Lamar. Ena gauna oqo sa rawa ni vodo vata kei koya o tamana ena waqavuka idini-dua, lima na idabedabe ka vulica tiko o Lamar me vukataka.
O irau na itubutubu nei Lamar (tabaki tu oqo ni rau itaisau taki koya tu) e rau sa dua na dau tokoni koya sara vakalevu.
Ena imatai ni vuka nei Lamar ena waqavuka dina, e a lomaleqataka o koya na veinanuyaka na veika taucoko. Au a cavuta e dua na masu lo totolo ni bera ni‘u gole cake, ka‘u mai daumaka yani,” e kaya o koya. Ena gauna oqo ni dredre vua me nanuma tiko e dua na ka e macawa, na masu lo lalai oqori e dau vukei koya me vakayacora na veika e gadrevi me cakava. Ena gauna mada ga e sega ni tiko kina o tamana ena idabedabe e muri, e kila o Lamar ni dau tiko vata ga kei koya na Tamana mai Lomalagi.
Na Mataivalu ni Turaga
Na vuka e sega ni ka duadua ga e vakavuka na yaloi Lamar. “Au dau qoroya vakalevu na mataivalu ni Peritania, na veika taucoko mai na dua na veivakaisalataki vakatui ki na dua na veibulu,” e kaya o koya.
“Ena vuku ni noqu ituvaki vakaleqai, au na sega ni rawa ni lewena na mataivalu,” e kaya o Lamar. Ia e dua vei ira na nona iliuliu ni Cauravou e liu ka dau sotia tu ena dua na gauna e sa vakayaloqaqataki Lamar. “E dau vakananuma vei au o koya ni sega ni dodonu me‘u tiko ena dua na mataivalu vakavuravura baleta ni‘u sa tiko rawa ena mataivalu ni Turaga,” e kaya o Lamar. “Niu tu ena mataivalu ni Turaga e vakavuna meu vakila se cava ga na ka e viritaka vei au na bula, se cava ga e cakava vei au e dua, sa tu e tikiqu o Jisu Karisito.”
A vakauqeti koya o Brother Bayliss, na iliuliu ni Cauravou nei Lamar, me lewena na “Mataivalu ni Turaga.”
Ena koronivuli torocake era vuli kina o ira na vakaleqai vakayago, e dau tovolea o Lamar me vukei ira na tamata ena nona yabaki ni bula me ra lewena na mataivalu ni Turaga ena nona wasea vei ira na kosipeli. “E levu na gauna, au dau vakawaleni,” e kaya o koya, “ia ena so na gauna, era dau rogoci au. Me vaka ni so na noqu gagadre ni yago vakaleqai e na gauna oqo e veivakataotaki, na noqu veiqaravi vakadaukaulotu tudei e sega ni se rawa ni yaco ena gauna oqo. Ia au raica vakaoqo: Au sega ni gadreva e dua na itokaniyaca me‘u daukaulotu kina.”
Ni lailai sara na itabagone ena nona tabanalevu, e vuqa vei ira na itokani nei Lamar era sega ni lewe ni Lotu i Jisu Karisito ni Yalododonu Edaidai. Oqori e sega ni dau rawarawa e koronivuli, vakabibi ena gauna e tiko kina, me vaka e cavuta o Lamar, “na icolacola taucoko” ni veitemaki. “E vuqa na gonevuli era tukuna tiko na veika e sega ni dodonu ka ra vakarorogo ki na sereivakatagi sega ni veiraurau. Ena gauna ga e yaco kina e dua na ka vakaoqo, au sa biubiu ga ka gole ki na dua na rumu e sega ni yaco tiko kina na veika oya.”’
Kaukauwa Tiko
Ni yaco mai na veitemaki se so era sega ni taleitaka na rogoca na kosipeli, e dau biuta icake na nona ivolanikalou taleitaki o Lamar: “Ia koi au kei ira na noqu lewe ni vale, keitou na qaravi Jiova” (Josua 24:15).
“Sa vukei au na ivolanikalou oqo me‘u tudei tikoga ena vakabauti Jisu Karisito,” e kaya o koya. Oqo e bibi sara vei Lamar ena nona lomanivale. Ni yabaki 10 o Lamar, sa sega tale ni lako mai lotu o tamana. “Au a se gone sara ena gauna oya, ka‘u sega ni kila vakavinaka sara,” e kaya o koya. “Au a saga me‘u vakasalataki koya me lesu tale mai. Ia au sa vulica ni sega ni baleta oya. Mo solia vei ira na gauna.”
E sa veiwekani voleka tikoga kei tamana o Lamar ka vakaraitaka vua ni lomani koya ena sala cava ga e veisiga, me vaka na nona tukuna vua na veika a yaco e valenilotu se ni vakayagataki gauna vata kei koya. “E dau vakavulici au o koya ni veitalia na cava o lako curuma, e dodonu mo kaukauwa tikoga.” Ki vei ira na itabagone kei ira na lewe ni matavuvale era malumalu tu ena Lotu, e tomana o koya, “Tudei tikoga. Tautauri matua ki na nomu vakabauta. Kakua ni soro, se cava ga e yaco.”
Vakasaqarai Karisito ni Sa Voravora na Veika Eso
Sa dau kunea talega o Lamar na yaloqaqa mai vei Karisito ena vei sala eso. “Au dau sotava na nuiqawaqawa ca sara ena so na gauna,” e kaya o Lamar. “Au vakabauta ni tamata cecere duadua me solia vei au na yaloqaqa me‘u toso tikoga sa i Jisu Karisito vakaikoya. A lako curuma e levu sara na ka, ia a tomana voli ga na Nona ilesilesi.”
E na gauna e dau sotava kina na siga voravora o Lamar, e dau raitayaloyalotaka wasoma na iVakabula ni vakayaloqaqataki koya, ka kaya, “E rawa ni o cakava oqo. E rawa ni o lako botea na cava ga.”
E dau vakaqaqacotaki mai vei tinana kei tamana, o ira na nona itokani, kei ira na tamata tale eso era volekati koya. “E dua na gauna au a muataki sobu mai kina ena sala sega ni dodonu,” e kaya o Lamar. Ia, me baleta e dua na ivakarau ni veitokoni vinaka, e a rawa kina vua me moica na nona sala ka vakaqaqacotaka na nona ivakadinadina me baleti Karisito.
“Au se vakatorocaketaka tiko ga na noqu ivakadinadina,” e kaya o koya, “ia sa dua na ka totoka me‘u tiki ni mataivalu ni Turaga kei Na Lotu i Jisu Karisito ni Yalododonu Edaidai. Oqo e dua na ka au taleitaka.”
Na nona ilakolako e rawa ni toso cake ka toso sobu, ia e kila tu o Lamar na vuka ilagi. “Se cava ga na veivakatovolei se leqa o lako curuma, ena tiko e yasamu na Tamada Vakalomalagi baleta ni kauwaitaki iko ka lomani iko o Koya.”