“Ākonga ki he Ākongá,” Ki Hono Fakamālohia ʻo e Toʻu Tupú, Sānuali 2024.
Kaveinga ʻa e Toʻu Tupú ki he 2024
Ākonga ki he Ākongá
Te ke hoko fēfē ko ha ākonga ʻo Sīsū Kalaisi? ʻOku faingofua ange ia ʻi hoʻo fakakaukaú. Vakaiʻi e ngaahi sīpinga ko ʻeni ʻoku vahevahe ʻe he toʻu tupú fekauʻaki mo e kau ākongá ʻi heʻenau moʻuí.
Kyler C., taʻu 13
Mei Guayas, Ecuador. Saiʻia he vaʻinga pasiketipoló mo e vaioliní.
Kuo akoʻi au ʻe ha toko ua ʻo hoku ngaahi kaungāmeʻa mei he lotú, ʻa ʻAliki mo Maika, ki he mahuʻinga ʻo e hoko ko ha ākonga ʻa Sīsū Kalaisí. Kuo tokoniʻi au ʻe heʻena tā sīpingá ke u maʻu ha holi lahi ange ke ngāue fakafaifekau. ʻOku ou fiefia he taimí ni ke vahevahe ʻa Sīsū Kalaisi kiate kinautolu ʻoku faingataʻaʻiá.
ʻOku hoko foki hoku ngaahi kaungāmeʻá ko ha faʻifaʻitakiʻanga lelei ʻo Kalaisi ʻi he anga ʻenau leá. Kuó na vahevahe ha ngaahi aʻusia lahi fekauʻaki mo e muimui kia Sīsū Kalaisí, ʻa ia kuó ne fakalotolahiʻi au ke u toe ofi ange kiate Ia. Hangē ko ʻení, kuo akoʻi au ʻe hoku kaungāmeʻá ko e taimi ʻoku ʻi ai ai haʻatau fehuʻí, te tau lava ʻo kole ki he ʻOtuá. Pea ʻoku tau ʻilo fēfē ʻa e taimi naʻá Ne tali mai aí? Te tau ʻiloʻi ʻi hotau lotó. Ko e folofola mai ia ʻa e Laumālié ʻoku folofola mai ʻa e ʻOtuá pea ʻoku tau fili ʻa e hala ʻoku totonú.
Ayotunde Raphael A., taʻu 15
Mei Oyo, Nigeria. Saiʻia he tauʻolungá, sipotí, mo e faiako mo e kau faifekaú.
Ko hoku kaungāmeʻa ko ʻEuā (fakanounou ki ʻEuaoluva) ko ha sīpinga ʻo ha ākonga ʻa Kalaisi kiate au. Naʻá ne fakaʻitaʻi au ʻi ha taimi ʻe taha, pea naʻá ku ʻita kiate ia. Naʻá ne kole mai ke u fakamolemoleʻi ia. ʻI he founga ko iá, ne u ako ai ʻa e loto-fakatōkilaló mo e fakamolemolé meiate ia. Naʻá ne fuʻu loto-fakatōkilalo ʻi he taimi naʻá ne kole fakamolemole aí, pea naʻá ku fakamolemoleʻi ia.
Kiate au, ko e ākonga ʻa Sīsū Kalaisí ʻa hono tauhi e ngaahi fekau ʻa e Tamai Hēvaní, ke ʻofa ki he ʻOtuá mo Hono ʻAlo ko Sīsū Kalaisí, pea tokanga lahi ange ki he niʻihi kehé.
Gabriel A., taʻu 12
Mei Oyo, Nigeria. Saiʻia he vaʻinga soká.
Naʻá ku ʻiloʻi ha kiʻi tamasiʻi mei he lotú naʻe houtamaki kimuʻa, ka naʻe fakafokifā ʻene liliú ʻi ha ʻaho ʻe taha. Ne u fehuʻi ange, “Ko e hā naʻá ke liliu aí?” Naʻá ne talamai naʻá ne lotu, lau ʻene folofolá, maʻu ha tui, pea ngāue mālohi ke liliu hono ʻulungāngá. Naʻe tokoni ia kiate au he ko e taimi ní ʻoku ou fie fai ha fili, fakaʻekatēmika pe fakalaumālie, ʻoku ou faʻa lotua ke tataki au ʻe he ʻOtuá.
Mahalo he ʻikai haohaoa hoku kaungāmeʻá, ka naʻe ongo ki hoku lotó ʻene tōʻongá. ʻOku ou faʻa lau he taimí ni ʻa e folofolá kimuʻa peá u fai ha meʻa ʻi heʻeku moʻuí. Kuo ʻomi au ʻe he tā sīpinga hoku kaungāmeʻá ke u ofi ange kia Kalaisi koeʻuhí ko e taimi kotoa pē ʻoku ou faiangahala aí, te u lava ʻo foki ki he ʻEikí ʻi he lotu mo e fakatomala. Kuo tokoniʻi au ʻe heʻeku ʻalu ki he ʻEikí ke siʻaki ʻeku ngaahi kavengá.