“Faateleina o le Taimi ma Max,” Uo, Mati 2024, 42.
Tusia e You
Faateleina o le Taimi ma Max
Sa iai se taimi na matou o ai e tolauapi i luga o le matafaga faatasi ma lo’u aiga, ni nai uo, ma la’u taifau, o Max. Sa matou feausi ma taaalo i le aso atoa. Ona matou matamata lea i mea faapapa ina ua pogisa. Sa matou taufai maua uma se taimi matagofie.
Ina ua uma mea faapapa, sa ou sueina Max. Ae sa leai o ia! Sa ou popole ma ee atu ina ua leiloa Max. A o maligi ifo loimata i o’u foliga, sa matou sueina o ia i le togavao. Sa ou lagonaina se leo itiiti o ta’u mai ia te a’u e tatalo, o lea sa ou faia ai. Ae sa lagona e lo’u tino atoa le vaivai e pei o saimini, ma sa ou fefe mo Max.
Matou te lei mauaina o ia, o lea na matou toe foi atu ai i lo matou faleie. Sa ou tatalo pea i lo’u mafaufau, ae sa amata ona leai so’u faamoemoe. Sa ou tagi pea seia oo ina ou moe.
I ni nai itula mulimuli ane, sa fafagu a’u i luga e o’u matua. Sa nofo tonu lava Max i o’u tafatafa! Sa faalogoina e o’u matua le leo o le kola o Max o loo tatagi i fafo o lo matou faleie. Sa ou fusi mau mai ma le filemu e faafetai atu i le Atua mo le taliina o a’u tatalo.
I le tolu tausaga mulimuli ane, sa aafia ai le tua o Max ma sa tigaina tele o ia. Sa le mafai ona faamaloloina o ia, o lea sa tatau ai ona ma faatofa atu. Sa faamafanafanaina a’u e le Tama Faalelagi ma tuuina mai ia te a’u le filemu. Sa faamanatu mai e le Agaga Paia ia te au e toetoe lava a pe Max i le tolu tausaga talu ai, ae sa fesoasoani mai le Atua ia maua o ia. Ou te faafetai ona sa Ia tuuina mai ia i matou le tele o taimi e alolofa ai ia Max.
Ou te iloa e tali le Atua i tatalo ma tuuina mai le mafanafana i tofotofoga. O le Togiola a Iesu Keriso e mo tagata uma. Ou te matua faafetai lava mo le mea na faia e Iesu Keriso ma le Tama Faalelagi mo lo’u aiga ma a’u.
Ata na tusia e Camarie Brunson