Ang Bag-ong Calling ni Marco
“Unsay buhaton sa usa ka consultant sa family history?” Nangutana si Marco.
Milingkod si Marco uban sa iyang mga ginikanan diha sa opisina sa bishop. Bag-o lang siyang mibalhin sa Young Men, ug karon ang bishop gustong makig-istorya kaniya. Gikulbaan siya.
“Ganahan mi nga mohatag nimo og calling, Marco” miingon si Bishop Díaz. “Andam ka ba nga moserbisyo isip usa ka consultant sa family history?”
Gisaka ni Marco ang iyang mga kilay. “Unsay buhaton sa usa ka consultant sa family history?” nangutana siya.
“Nindot nga pangutana,” miingon ang bishop. “Magpakita sila og ehemplo pinaagi sa paghimo sa family history ug buhat sa templo. Ug tabangan usab nila ang uban sa paghimo sa ilang family history.”
“OK.” Mitando si Marco. Gikulbaan pa gihapon siya og gamay. Apan ingon og mahinamon usab siya. “Wala pa ko makaadto sa templo. Apan nakahimo ko og gamayng indexing.”
“Walay problema,” miingon ang bishop. “Si Sister Sánchez adunay calling usab sa family history. Makatabang siya kanimo nga makat-on pa og dugang.”
Pipila ka semana ang milabay, si Marco nag-video call ni Sister Sánchez. Buotan kaayo siya. Gitabangan niya si Marco sa paghimo og account sa FamilySearch.org. Dayon siya mitudlo kaniya kon unsaon sa pagpangita sa iyang family tree.
Ganahan si Marco nga magkat-on mahitungod sa iyang pamilya. Ganahan siya nga makakita sa iyang mga apohan ug mga apohan sa tuhod diha sa iyang family tree. Si Sister Sánchez mitudlo kaniya kon unsaon sa pagdugang og mga litrato sa mga sakop sa pamilya. Nakakat-on usab siya kon unsaon sa pagdugang og mga tawo nga wala pa FamilySearch.
Usa ka tawo nga gidugang ni Marco ngadto sa FamilySearch mao ang iyang iyaan, si Tía Mirna. Namatay siya sa miaging tuig gumikan sa kanser. Gimingaw gayod si Marco kaniya. Gimingaw siya sa iyang masadyaon nga pahiyom. Ang iyang iyaan kanunayng mipabati nga gihigugma siya.
Uban sa tabang ni Mamá, gi-type ni Marco ang petsa sa pagkatawo ni Tía Mirna ug ang petsa nga siya namatay. Midugang siya og mga litrato niya [Tía Mirna]. Gi-type gani niya ang pipila ka handomanan mahitungod kaniya.
Wala pa mabunyagi si Tía Mirna. Apan didto sa templo, ang igsoon nga babaye ni Marco, si Lizerya, mahimong mabunyagan alang kaniya. Mao nga si Marco ug ang iyang pamilya nagplano og panahon nga moadto sa templo. Nakit-an ni Marco ang ubang mga sakop sa pamilya diha sa FamilySearch kinsa namatay pipila ka tuig na ang milabay. Mahimo usab siyang mabunyagan alang kanila.
Karon nga si Marco mas nakahibalo na mahitungod sa family history, mahinamon siya nga motabang sa uban. Gipaambit niya ang iyang pagpamatuod sa family history diha sa usa ka kalihokan sa Simbahan. Ug gidapit niya ang ubang kabatan-onan sa ilang ward nga mouban sa iyang pamilya sa ilang pagbiyahe sa templo.
Sa kataposan panahon na alang sa unang pagbiyahe sa templo ni Marco. Mahinanom si Marco! Espesyal kadto nga maanaa didto uban sa iyang pamilya ug sa ubang kabatan-onan. Apan labaw sa tanan, mahinamon si Marco nga si Lizerya mahimong mabunyagan alang kang Tía Mirna.
Human nag-ilis sila sa puti nga mga sinina, mitan-aw si Marco kang Papi ug Lizerya nga mitunlob didto sa bunyaganan. Mainiton ang pagbati ni Marco sa sulod samtang mitan-aw siya ni Papi nga mibunyag sa iyang igsoon nga babaye alang kang Tía Mirna. Gitrapohan ni Mamá ang mga luha sa kalipay.
Dayon turno na ni Marco. Mitunlob siya ngadto sa tubig aron mabunyagan alang sa ubang mga sakop sa pamilya.
Mipahiyom si Marco. Malipayon siya nga misulay siya og bag-o nga butang pinaagi sa paghimo sa family history. Ang calling sa family history nahimong nindot kaayo human sa tanan!
Paghulagway pinaagi ni Simini Blocker