Mai na Mataveiliutaki Taumada

Vorati ni Nomu Bolebole Eso

President Dallin H. Oaks

Mai vei Peresitedi Dallin H. Oaks

Matai ni Daunivakasala ena Mataveiliutaki Taumada

Elder Oaks as a young boy looking sad at school

Na noqu bolebole levu duadua ni‘u a se gone oya na gauna e a mate kina o tamaqu. Au a sa qai yabaki 7 kina.

A tiko na tinaqu totoka kei rau na tubuqu yalovinaka. Ia au a tagi vakavuqa. Ena koronivuli era dau veiwalitaki au na noqu lewe ni kalasi baleta ni‘u a sega ni rawaka vakavinaka vakamatanivola se vakafika. Era dau vakasaurarataki au eso na gone qase cake ena basi ni koronivuli. Au a diva me tiko na noqu taledi me vakataki ira na dauqito vinaka se daulagasere vinaka.

Ni oti vakalailai, sa tekivu me‘u yalo vinaka cake. E ratou dau lomani au ka vukei au na noqu matavuvale. Au a sasaga tikoga, ka caka vinaka mai vakamalua e koronivuli. Au sa kila talega na veika au a vinaka kina. Au a saga sara me‘u vinaka cake ena veika oya. Sa vukei au na Tamada Vakalomalagi.

Elder Oaks as a young man in a graduation cap

Ni da tubu cake, sa tiko kece na noda bolebole eso. Eso vei keda e tauvimate se vakaleqai tu na ituvaki ni nona bula. Eso era dravudravua ka sega ni rawa ni qaravi vinaka vakavuniwai se vakavuli. Eso era vakaduiduitaki baleta na roka ni kuli ni yagodra se na vanua era cavutu mai kina.

O rawa ni vorata vakacava na nomu bolebole eso?

• Vakararavi ki vua na Tamada Vakalomalagi. Eda na yalolailai beka ena so na gauna, ia sa dodonu me da vakararavi ki Vua. Sa lomani ira na Luvena o Koya ka sa yalataka ni na vakalougatataki keda.

• Sasaga tikoga. Sa vakatavulici keda na Turaga ni sa duidui tu na noda isolisoli taucoko. Sa rawa ni da na vakila na noda isolisoli vakaikeda. Sa rawa ni da qai vakayagataka me vakavinakataki kina na noda bula ka qaravi ira na tani.

Se vakacava sara na butobuto ni oti na karobo, ena dau rarama cake tu ga ni cadra mai na matanisiga. E dina oqori ki na noda bula. Kevaka sa tao tu e dua na salatu, sa rawa ni da vakasaqara e dua tale. Kevaka me dredre sara tu ni caka e dua na ka, sa rawa ni da toso ki liu ka vuli mai kina.

Au yalataka ni na vukei iko na Tamada Vakalomalagi mo vorata na nomu bolebole eso. Sa lomani iko o Koya ka na vukei iko mo yaco mo vaka na ka e vinakata o Koya mo vakataka.

Au Rawa ni Vorata na Bolebole Eso.

coloring page of girl hiking up mountain

“Eda na rairai yalolailai beka ena so na gauna, ia sa dodonu me da vakararavi ki vua na [Tamada Vakalomalagi]. Sa lomani ira na Luvena o Koya ka sa yalataka me vakalougatataki keda. Sasaga tikoga.”

Peresitedi Dallin H. Oaks

Droini mai vei Alyssa Petersen