iTokani ki na iTokani
Veivutuni ena Eleveita
Ni‘u a yabaki 11, a vakaitikotiko na noqu matavuvale ena dua na vale taba-12 e Hong Kong. Ena veisiga ni oti na vuli, au dau cici ki na tabavale ka vodoka na eleveita ki na neitou itikotiko.
Dua na siga au a curuma na eleveita ka tabaka taucoko na ibulukau ka ra waqa kece mai. Oqo ena vakavuna me kele na eleveita ena veitabavale yadua. Sa tekivu tasogo na katuba, ia ka vakasauri ga na kena basika mai e dua na liga ka dolava na katuba. O ya e dua vei ira e keitou tiko veivolekati ena tabavale e cake. A sega ni kaya o koya e dua na ka me baleta na ibulukau, ia au sa lomaleqa. E vaka me taura e dua na gauna balavu me‘u qai yaco ki vale!
E ka dina, na kena kele na eleveita ena tabavale ka tarava, wawa toka, ka qai toso tale. Ena gauna ga a tadola kina na katuba ena noqu tabavale, au a cici ki tuba. Au yaco ki vale ena bunolevu baleta ni‘u a cici vakatotolo sara!
Ni‘u yaco ga yani, sa taqiri na talevoni. O ya o koya keitou tiko veivolekati ka keirau a vodo vata mai ena eleveita. Au sa tavariri tu ena waraki tinaqu tiko me oti na nona vosa ena talevoni.
Ni biuta sobu ga na talevoni, a taroga o tinaqu, “O a tabaka kece na ibulukau ena eleveita?”
Au a sega ni rawa ni lasutaki tinaqu. “Io” au a kaya.
A matadredredre o tinaqu. “Sa donu, daru gole cake ka lai veitalanoa kei koya e tou tiko veivolekati kaya.”
Keirau a lako vata sara i cake. Au a qirita na lali ni katuba, ka gole mai ki katuba o koya ka keitou tiko veivolekati. Au a vosa cuvacuva tu ena noqu kere veivosoti ni‘u a tabaka taucoko na ibulukau. Au sa yalataka ni‘u na sega ni cakava tale.
A yalo loloma o koya. A kaya o koya, “Me vaka ga ni ko na sega ni cakava tale, sa daumaka oya.”
Ni‘u kere veivosoti oti vua, au sa mai yalo vinaka yani. Ka‘u a sega tale ni qai tabaka taucoko na ibulukau ena eleveita.
Na ka au a sotava oya e a vukei au me‘u vulica na veivutuni. Au kila ni‘u sa cakacala. Au sa rarawataka ka kere veivosoti kina. Ka‘u qai sega tale ni vakayacora vakadua. Au sa qai marau tu! Na veivutuni sa rawa ni vakamarautaki iko talega.
Droini mai vei Alyssa Tallent