Volai mai vei Iko
Lalawa Eso ni Papitaiso
Ena Noveba ni 2019, au a vakarorogo vata kei na noqu matavuvale ki na soqoni ni Veivosaki e Matanavotu i Elder Gong me baleta na parokaramu ni Gonelalai kei na iTabagone. Ni oti oya, a solia vei keimami na noqu bisopi na ivolalailai eso me vukei keimami ena cakacakataki ni neimami lalawa.
Na imatai ni noqu lalawa sa ikoya me‘u na vakacavara na wiliki ni iVola i Momani ni bera na ikawalu ni noqu siganisucu me kani noqu vakavakarau ki na noqu papitaiso. Au a sa tekivu wilika tiko ia a sega soti sara ni caka ena yalo marau. Ia na siga o ya au a biuta vata kei tamaqu e dua na ituvatuva. Keirau a cakacakataka e vica na wase me‘u wilika ena veisiga me vakacavari kina na iVola i Momani ni bera na noqu papitaiso. Au sa mai tekivu wiliwili ena veisiga ka makataka na wase yadua au sa wilika oti.
Ni‘u wiliwili tiko, au sa via vakauqeti me‘u cakava e vuqa sara na ka vinaka. Au a mani vakaitavi ena lolo ni vuravura raraba a kacivaka o Peresitedi Nelson me vukea na tarovi ni COVID-19. Au a marau ni‘u rawa ni lolo vakaoti. Rau a vakayaloqaqataki au talega na noqu itubutubu me‘u masu ka lolo me‘u rawata na noqu ivakadinadina ni iVola i Momani kei na papitaiso.
Ena imatai ni Sigatabu ni Me, au a masu ka lolo. Ni oti ga vakalailai, au sa vakacavara na wiliki taucoko ni iVola i Momani. Au sa nanamaki tu ki na noqu papitaiso—ena noqu siganisucu. Au vakila ni‘u sa vakarau tu me‘u vakayacora na veiyalayalati oqo kei na Kalou! Au kila ni sa dina na iVola i Momani. Au taleitaka na vakawilika, ka‘u marau ni‘u rawata na lalawa oqo ena veivuke ni noqu matavuvale.
Droini mai vei Rosalie Ledezma