iVuvu ni Lotu Ena Veivanua
Piano nei Ludovic
A marau o Ludovic ni qarava na Tamada Vakalomalagi.
A taura cake o Ludovic eso na idabedabe lobi ka kauta takosova na gaunisala. Oya na Sigatabu, ka sa vakarau tu me tekivu na lotu. E a sega ni veirauti na idabedabe ena vale era dau lotu kina e Togo. Ka sa dau kau idabedabe mai kina o Ludovic mai na vale nei tukana.
“Na cava na vuna o biuta kina e dua na valenilotu vinaka mo gole ki na dua na vale vakacevaceva lailai?” a kaci muri koya mai e dua. “Na nomudou lotu era sega tu mada ga na kena idabedabe balavu!” e kaya dredredre tale e dua.
A vakalasutaka ga o Ludovic ni sega ni rogoca. Me‘u na cakava tikoga na ka e dodonu, a vakananuma o koya.
A rogoca taumada me baleta na Lotu o Ludovic ni sa qai yabaki 10. Oqo esa yabaki 12 o koya. E sa qai papitaiso oti toka ga o koya kei na nona matavuvale. Sa taura tu o koya na matabete ka veivuke ena veivotayaki ni sakaramede. Sa dau maroroya o koya eso na nona ilavo ni vakasigalevu me volia kina na madrai ni sakaramede e veimacawa. E marau o Ludovic ni qarava na Tamada Vakalomalagi.
Ni sa gauna me tekivu kina na lotu, sa sinai na rumu lailai. Eso na tamata era dabe ena idabedabe a kauta mai o Ludovic. Eso tale era tucake tu.
A tekivu na soqoni ena dua na sere. “Isireli Bau Rogoca,” a laga o Ludovic. E dau taleitaka me lagasere e valenilotu.
Ni oti na lotu, a vagugu voli o Ludovic ena gauna ka biuta tani tiko kina na idabedabe. A vagugu ena gauna ka lako voli kina ki vale. A qai votu mai vua e dua na vakasama! A taura mai o koya na nona piano ni vakatatalo. De na rawa beka vua me cakacakataka na sala me vakatagitaka kina na “Isireli Bau Rogoca”!
A vagugutaka tu o Ludovic na ikabakaba ka vakatagitaka na itabataba duidui eso me yacova ni sa donu vinaka. Sega ni dede sa vulica rawa o koya me vakatagitaka na sere taucoko.
Sa qai nanuma o koya ni tiko vei iratou na nona matavuvale eso na katokatoni ni sere ni Lotu. A vakarogoci ira o koya ka vulica me vakatagitaka eso tale na sere. A vakatovotovo vakawasoma o Ludovic.
“Vakacava mo vakatagi taka e valenilotu ni keimami lagasere tiko?” A tarogi Ludovic o tamana ena dua na siga.
E talave na ketei Ludovic. “Au sa rui madua,” a kaya o koya. “Vakacava ke‘u vakacalaka?”
“Ia mo na toso tikoga,” a kaya o Tamana. “O sa dua na dautabapiano vinaka cake mai na ka o nanuma.”
Ena Sigatabu ka tarava, a sega walega ni kau idabedabe o Ludovic. A kauta talega na nona piano ni vakatatalo ki valenilotu. Ni sa gauna ni idola sere, sa biuta ririko o koya na nona iqaqalo ena itabataba eso. Sa qai tekivu me vakatagitaka. Sa lagasere tu na tamata taucoko. Ka sa rogo vinaka sara!
Ni qai oti oya sa dau vakatagi tu ga e valenilotu ena vei Sigatabu o Ludovic. Ena so na gauna e dau vakacalaka. Ia e sega ni soro. Kevaka e dredre na sere me vakatagitaki, era laga ga ka sega na piano, ka liutaka o Ludovic na sereivakatagi.
A matadredredre o Ludovic. E sega ni dua na ka vua ni ra lotu tiko ena nona vale e dua na tamata. E sega mada ga ni dua na ka na nodra veiwalitaki koya na tamata. Na ka ga e bibi ni sa vakayagataka tiko o Ludovic na nona taledi me qarava kina na Kalou.
O Togo e dua na matanitu lailai ena ra kei Aferika.
Nikua, e sa 21 na tabanalevu kei na tabana e kea.
Na vosa vaka‑Varanise sa vosa vakadonui e Togo.
A vakavulici Ludovic e dua na daukaulotu me wilika na sereivakatagi me rawa ni vakatagitaka vakavinaka cake na piano.
Sa tamata uabula ena gauna oqo o Ludovic. E rau taleitaka ruarua o koya kei watina, o Benedict, na sereivakatagi.
Sa taukena tu o koya e dua na piano dina e vale ka dau vakatagitaka na oqani e valenilotu.
Droini mai vei Caroline Garcia