Na iSolisoli ni Yalo Tabu
Kemuni na taciqu kei na ganequ e dua na veivakalougatataki cecere na soqoni vata kei kemuni ena bogi nikua.
Ena tolu na macawa mai oqo, sa na Siganisucu. Ena mataka oya, e milioni vakamilioni na gonelalai era na yadra mai ena mataka caca ka, na veisau na veika e dau yaco, ni ra na dretaki ira na itubutubu mai na imocemoce. Ena yalo nanamaki, era na soqoni wavolita na iloloma era sa raica tiko mai ena vica vata na siga.
Dau taleitaka o tamaqu na Siganisucu; e dau kauta mai vua na reki cecere na soli iloloma, ka rau vinaka sara kina kei na tinaqu. O au kei ira na taciqu, vakakina e vuqa tale, keimami dau vakalougatataki ena nodrau taledi. Eso na nodrau iloloma uasivi duadua e sega ni rawa ni da taura e ligada—sai koya na veika e dau yaco ka taracake na ivau ni veilomani kei na vakanananu mareqeti. Na vakanananu eso oqori se kauta tiko ga mai vei au na reki nikua.
E ganita vinaka ni iusutu ni Siganisucu na soli kei na ciqomi ka ni loloma. Ni da marautaka tiko na isolisoli sega ni vakatauvatani rawa ni Luve ni Kalou, na iVakabula ko Jisu Karisito. Sa dina sara na noda ka ni loloma vei ira eso ena sega ni vakatauvatani rawa kei na iloloma oqo, ia au vakabauta na reki ni noda veisoli ka ni loloma e rawa ni vagoleya na yaloda ki na “isolisoli ni Kalou.”1
Na isolisoli talei ni Luve ni Kalou e sureti keda yadua me da kunea na “vakacegu ena bula oqo ka rawata na bula tawamudu ena bula sa bera mai.”2 Ena dredre beka na kune vakacegu ena dua na vuravura sa tubu ka levu cake tikoga kina na veisaqasaqasa kei na vakaduiduile. Ia na vakacegu oqori sai koya sara ga erau sa solia tu vei keda yadua na Tamada kei na Luvena dauloloma, kevaka walega eda na ciqoma.
Vakasamataka mada na kena matalia kevaka, ena mataka ni Siganisucu, eda dabe wavolita na vunikau ni Siganisucu, vaqoroqoroya na iloloma totoka na kena iolo, veitalanoataka se cava beka e rawa ni tu i loma, ka da dui lako yani ka qarava noda itavi ena siga oya ka sega mada ga ni bau dolava na iloloma!
E ka ni rarawa, ni oqo na ka eda dau vakayacora ena so na gauna ena nona iloloma vei keda na Kalou. Vakasamataka na nona malanivosa oqo na iVakabula: “A cava na kena yaga vua na tamata kevaka sa vakarautaki tu na isolisoli me nona, ka qai sega ni taura? Raica, sa sega ni vinakata na isolisoli sa soli vua, io sa sega talega ni vinakati koya sa solia.”3
Ena bogi nikua au vinakata meu sureti keda kece me da vakananuma vakatitobu na sala e rawa ni da ciqoma dina sara kina na isolisoli sa solia tu vei keda na Kalou. Au na vakanamata toka vakabibi ki na isolisoli tawayalani ni Yalo Tabu. Niu vakayacora vakakina, au masuta me na vukei keda na Yalo Tabu me da kila na bibi ni isolisoli oqo, vakavulici keda ena veika eda rawa ni cakava me taucoko kina na noda ciqoma, ka solia vei keda na iloloma soliwale me da cakacakataka na veika eda vakila.
Na Cava sa Rui iSolisoli Taleitaki Kina na Yalo Tabu?
Na Yalo Tabu sai koya na ikatolu Vakalou. Sai koya na Dauveivakacegui,4 e dua na idusidusi,5 e qasenivuli,6 e dauveivakasavasavataki,7 o koya sa dauveisautaka talega na yalo ni tamata.8 Ena Vukuna, sa rawa ni da ciqoma, na kaukauwa kei na itovonibula va-Kalou ena noda bula.
Ni nanuma tiko eso na itovonibula oya: “loloma ,” “reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, [kei na] ivalavala malua.”9 Vei au oqo e dua na ivakamacala ni ka e dau tukuni wasoma me “yalo ni Siganisucu.” Na yalayala vaka agilosi ni “itukutuku vinaka me da reki vakalevu kina” ka sa “veivinakati rawa ko ira e vuravura, sa lomani ko ira na tamata”10 sa vakayacori mai na imatai ni bogi ni Siganisucu oya, vakatikina, ni da ciqoma na Yalo Tabu.
Eda dau tukuna wasoma me maroroi na yalo ni Siganisucu ena yabaki taucoko. Eda vinakata na itovonibula vakalou oqo me lewa tawamudu na yaloda. Ka vinakata na Tamada sa uasivi sara vei keda na Luvena, me da ciqoma na isolisoli oqo. Oqo na yalayala cecere ni kosipeli i Jisu Karisito—me veisautaki keda na yaloda me da tamata Vakarisito, me da “sa biuta tani na gagadre ca ka via kitaka tikoga na ivalavala dodonu,”11 me da vakasinaiti ena inuinui kei na loloma dina.12 Sai koya na noda ciqoma dina na Yalo Tabu ena dolavi kina vei keda na isolisoli talei oqo.
E bibi, na kena soli vei keda na isolisoli ni Yalo Tabu ena malanivosa “Ciqoma na Yalo Tabu.”13 Au vinakata meu vakatura e tolu na idola ka na vukei keda me da ciqoma vakaidina na isolisoli talei oqo. Meu kitaka vakakina, au na goleva e dua na iyaloyalo matata ena iVola i Momani. E veiqaravi tiko na Karisito sa tucaketale vei ira na tamata ena dua na siga ni cakamana, ka yalataka me na lesu tale mai ena siga ka tarava. E dewa na itukutuku, ka ra soqoni mai na tamata ena vanua taucoko ena nanamaki, eso era cakacaka ena bogi taucoko me rawa ni ra tiko ena vanua ena basika tale mai kina ko Jisu ena mataka.
1. Gagadre Cecere Vakayalo
Ni ra waraka me lesu mai na iVakabula, eratou vakavulici ira na lewevuqa na tisaipeli ena veika a vakavuvulitaka na iVakabula ena noa.14 Qai tukuni ena kena itukutuku ni ra a tekiduru ka masuta “na ka eratou sa rui gadreva sara; me soli vei iratou na Yalo Tabu.”15 Vakasamataka mada vakalailai na kena bibi oya—eratou waraka tiko ena yalo nanamaki na nona lesu mai na iVakabula, ia eratou sega ni masulaka oqori. Ni ratou a vakavulici mai vua na qasenivuli sa uasivi sara oti qai mai vei iratou na Nona tisaipeli digitaki, na ka eratou gadreva vakalevu duadua na isolisoli ni Yalo Tabu. Na gagadre vakayalo kaukauwa vakaoqo sa idola bibi sara ni kena ciqomi na isolisoli oqo.
E vakavuvulitaka o Peresitedi Henry B. Eyring: “E vuqa vei keda … sa veirauti na nodra vakabauta me ra vinakata vagauna na Yalo Tabu. Ena malumalumu beka ka dau cacavukavuka na gagadre oqori, ia ena yaco mai, vakavuqa ena gauna eda dau leqa kina. [Ia] me da tuberi cake ki na veitaqomaki ena veigauna sa tu mai liu, sa dodonu me na tudei ka kaukauwa.”16 Kemuni na taciqu kei na ganequ, me da ciqoma na isolisoli oqo, me da na gadreva sara mai vuniyaloda taucoko.
2. Vakaitavi ena Buladodonu ena Cakacaka Vakalotu
Me da lesuva tale na iyaloyalo ena iVola i Momani, eda kunea tale e dua na idola. Ni ra sa vakatakekere oti ena masu me baleta na isolisoli era gadreva vakalevu duadua, na Yalo Tabu, era sa sobu yani ki wai na tisaipeli ka papitaiso. “Ia ni ratou sa papitaiso kece ka lako cake mai wai … sa lako sobu mai vei ira na Yalo Tabu, a ra sa vakasinaiti ena Yalo Tabu kei na bukawaqa.”17 Na cakacaka vakalotu ni papitaiso sa ivakadinadina vakayago ni noda yalayala me da nanuma ka muria, ena noda lomasoli me da taura na yacai Karisito, kei na noda gagadre me da ciqoma na Yalo Tabu.18
Ena veimacawa yadua sa dau noda na madigi me da vakavouia na ivakadinadina oqori ena noda vakaivotavota ena sakaramede, “me dau tiko ga kina kei keda na nona Yalotabu.”19 Na cakacaka vakalotu veitokani ni papitaiso kei na sakaramede ena vukea na kena vakavotui mai “na kaukauwa vakalou” ena noda bula.20 Ena dua na kena ivakarau, erau vakatakarakaratakavata na iyacoyaco kei na iwalewale me yaco kina na vakalou. Yaco me tamata vou vei Karisito, “luvei Karisito,”21 oqori na noda iyacoyaco. Sa dau yacovi e veimacawa na iyacoyaco oqori ni da segata me da nanuma ka muria. Au sureti kemuni mo ni lako mai e veimacawa ki na sakaramede ni Turaga ni da vakabauta na Nona yalayala, oya ni da rokova noda yalayala eda na vakasinaiti ena Yalotabu, vakalalai, “me yacova na siga lagilagi koya.”22
Ena yabaki oqo ena yaco na Siganisucu ena Sigatabu. Sa dua na veivakalougatataki cecere me da marautaka na sucu i Karisito kei na Nona Veisorovaki uasivi ena noda ciqoma na sakaramede ena siga oya.
3. Vakalevutaka na Vakabauta
Na iotioti ka idola bibi duadua au na cavuta sa ikoya na vakabauti Jisu Karisito. Ni sa sobuti ira vakaukauwa na tisaipeli na Yalo Tabu, a rairai mai na Karisito ka masu, ka vakavinavinaka vei Tamana ena nona solia vei iratou na isolisoli talei oqo. A qai tukuna o Koya na veimalanivosa bibi oqo: “Ko ni sa solia vei iratou na Yalo Tabu ni ratou sa vakabauti au.”23 Na vakabauta na iVakabula kei na Nona isoro uasivi sara ni Veivakaduavatataki sa ivurevure ni isolisoli vinaka kecega.24
Na vakabauta e vakalevutaki e kauta mai na veivakalougatataki cecere cake vaka-Yalo ki na noda bula. O koya, me da na vakalevutaka vakalevu cake beka vakacava na noda vakabauti Karisito? Eda kanamagiti ka muria na Nona vosa. E vakavuvulitaka o Elder D. Todd Christofferson, “Na usutu ni inaki ni ivolanikalou kece sara me vakasinaita na yaloda ena vakabauta na Kalou na Tamana kei na Luvena, ko Jisu Karisito.”25 E kunei taucoko ena iVola i Momani na dina oqo. Me ivakaraitaki, na Tui o Penijamini, e vakavulici ira na tamata ena vosa e ciqoma mai vua e dua na agilosi, ka vukei ira me “levu cake nona vakabauti” Jisu Karisito, ena vuku ni vakabauta oqori sa vakayacora kina na Yalotabu e dua na veisau levu e yalodra.26
Kevaka eda gadreva na Yalo Tabu me noda itokani e veisiga, eda na kanamagiti ka muria na vosa i Karisito ka ciqomi mai na ivolanikalou, ira na parofita bula, kei na vakasolokakana ni Yalotabu. Na sasaga e veisiga me baleta na rarama, kei na dina, ena vakalevutaka noda vakabauta na Karisito, noda gagadre me da vakataki Koya, kei na noda rawa ni ciqoma na ikatolu Vakalou me noda itokani tudei.
Kemuni na taciqu kei na ganequ, sa solia wale tu vei keda na Kalou na Nona isolisoli soliwale ena Siganisucu kei na loma ni yabaki taucoko. Au masuta me da na kakua ni biuta tu ga ka sega ni dolava ia eda na ciqoma ena noda wirica na idola eso oqo. Au vakadinadinataka ni da vakayacora vakakina, eda na vakasinaiti, na ikalawa yadua vakalalai e veigauna, ena loloma, reki, savasava kei na kaukauwa. Eda na yaco me “vakaivotavota ena bula vakalou.”27 Eda na rekitaka na isolisoli kei koya e solia na isolisoli. Ia ni sa lesu tale mai, eda sa vakarau tu ni sa “tadu mai na [noda] Tui dokai.”28 Ena yaca i Jisu Karisito, emeni.