Na iSolisoli ni Vakacegu
Au sa vakavinavinaka niu wasea vata kei kemuni na vakacaucautaki ni Siganisucu oqo. Sa noda inaki meda doka na Turaga o Jisu Karisito. Sa noda inuinui meda rawata vakaidina na yalo ni Siganisucu me baleti keda kei ira eda lomana. Na yalo oya e sa vakatakilai ena vakacegu—sega ni vakacegu vakapolitiki, ni a sucu na iVakabula ena gauna ni veiraravui levu sara ka a dro tani kina na nona matavuvale vaka ise ki Ijipita; sega ni vakacegu vakailavo, ka ni a sucu o Koya ena nodra tikina na manumanu; ka sega sara ni vakacegu e basika mai ni ra sa olo taucoko na veiloloma, ra ukutaki na vunikau, ka vakarau tu na teveli, baleta ni vakacegu oya e vagauna walega. Na vakacegu ni Siganisucu “na vakacegu ni Kalou, sa uasivia na ka kecega e kilai rawa.”1 Sa ikoya na vakacegu a yalataka na iApositolo o Paula ena “vakataudeitaka na [yaloda] kei na [lomada] ena vuku i Karisito Jisu.”2 Sa dina sara o Paula. Na vakacegu eda vakasaqara sa rawa duadua ga mai vei Jisu Karisito.
E so vei keda e vakaicili ena veivanua totoka ka veivakacegui, eda sotava voli ga na loma veilecayaki. E so tale era kune vakacegu kei na sautu ena maliwa ni druka vakaitamera, leqa tubukoso, kei na veivakatovolei e tomani voli.
Kivei keda kece na sa mai bula vakayago, sa kaya na iVakabula, “Dou na kunea e vuravura na rarawa.”3 Ia a solia o Koya na yalayala totoka oqo kivei ira na Nona tisaipeli ena Nona ilesilesi vakatamata: “Au sa laiva vei kemudou na vakacegu, au sa solia vei kemudou na noqu vakacegu: au sa sega ni solia vei kemudou me vaka sa solia ko vuravura.”4 Sa veivakacegui dina nida kila ni yalayala oqo ni vakacegu e sa tomani voli kivei ira taucoko na Nona tisaipeli yalataki edaidai.
E yalayala ka a soli ena bogi saraga ni Nona sucu. Ni ra sa vakatakila na italai vakalomalagi na sucu ni iVakabula, era cauraka, “Sa nona na Kalou na vakarokoroko ena veiyasana ecake sara, a sa veivinakati rawa ko ira e vuravura.”5
Ena draki ni bula kalougata oqo ni yabaki, eda qara—vakalevu sara—na vakacegu mai na Dausolisoli ni loloma taucoko. Au gadreva meu wasea ena bogi nikua e vica ga na sala e vuqa eda rawa ni vakalevutaka kina na vakacegu eda sotakaya ena draki ni bula oqo, ena loma ni yabaki sa tu ki liu, ka vakakina ena noda bula taucoko.
iMatai, vakataki ira na agilosi ka lagasere ena bogi ni Nona sucu, sa rawa meda kune vakacegu ni da vakacaucautaka na noda iVakabula, o Jisu Karisito. Sa rawa ni da “mai vakacerecerei koya.”6
Na siganisucu sai koya na vakacaucautaki ni dua ka sucu. Eda sa vakila taucoko na talei ni kena raici e dua na gone sucu vou. Eda yalo lokumi ni da raica na veituvaki lalai veivakurabuitaki kei na yalayala ni veika mai liu. Eda yalomalua. Eda yalovinaka. Eda yalovakacegu. Ka sa basika mai ki na lomada na yalo ni loloma ka vakavuna meda via solika ka yalomalumalumu ni da vakananuma na sucu i koya eda vakacaucautaka. Ni Siganisucu sai koya na vakacaucautaki ni dua ka sucu e sega ni vakatauvatani kei na dua tale. E sa raitayaloyalotaki taumada na sucu i Jisu mai vei ira na parofita ena gauna eliu. Na sucu oqo e sa ivakadei ni yalayala a caka vei keda ena vuravura ni yalo mai vua na Tamada Vakalomalagi dauloloma. Sai koya na sucu ni Mesaia yalataki.
Era lesu mai na vosa ni veivakananumi ka curuma na utoqu ena veigauna ni Siganisucu. Au rawa ni rogoca ena noqu vakasama na veidomo rekitaki ni dua na matasere levu ni lagata voli: “Ni sa sucu mai e dua na gone me noda, sa soli mai vei keda e dua na gonetagane: ena vakatau kivei koya na lewa: ena vakatokai na yacana ko Veivakurabuitaki, na iVakavuvuli, na Kalou kaukuawa, na Tama ni gauna tawamudu, na Tui ni Sautu.”7
Na matai ni gauna au nanuma rawa ni rogo kina na veivosa oya niu a dabe toka ena vatavata ni Valecavu e Salt Lake. A lagata voli na matasere na ivakatagi ni Handel. Au rawa ni nanuma ni vakila e dua na ka ena lomaqu. Au a se gone kina. Au sa qase cake oqo, kau sa kila na ka a vakilai oya. Sai koya na Yalo Tabu, ka a soli vei au na nona veitokani niu sa yabaki walu kina. A vakadeitaka ki na lomaqu na Yalotabu ni veivosa kau a rogoca ni lagati ena bogi oya sa dina sara.
Na gone ka a sucu e Peceliema ena gauna sara eliu sa ikoya na Luve ni Kalou, sa Vakatubura Duadua Ga na Tamada. O ira ka tekiduru ki Vua era mai sokalou vua na iVakabula. Sai Koya na Lami ni Kalou, ka talai mai me tasereka na ivesu ni mate ena Nona solibula veisorovaki. A lako mai ena qaqa me colata na noda rarawa kei na yaluma ka me kila o Koya na noda malumalumu. Ia sa sucu o Koya me sorovaka na noda ivalavala ca taucoko me vaka sa rawata duadua ga o Koya:
Na ka au a vakila ena vatavata ni Valecavu ena bogi oya e sa ka ni vakabauta kei na inuinui. Au a vakila na vakabauta “ni [a] sucu mai e dua na gone me noda,” au sa rawa ni vakanuinui e lomaqu ni na sega ni icavacava na mate. Au na vakaturi cake, ka na vagalalataki na batigaga ni mate kivei ira kece na luvena na Tamada Vakalomalagi.
Ia au a vakila e levu cake, e levu sara. Au a vakila na inuinui ni mai vei Koya, au sa rawa niu muri ka qaravi Koya ka yaco meu vakasucuma ki na e dua na bula vakayalo vakavoui. Mai na isolisoli ni Nona sucu, sa rawa ni veisautaki na lomaqu, lomamu, kei na loma taucoko ni tamata me vakataka tale e dua na gone lailai—makare, savasava, ka tu donu me gole tale ki vale vua na Kalou ka solia vei keda e dua na iVakabula ka vakarautaka na sala lesu ki Vua ena Nona itikotiko vakalomalagi. Au a yalo vakavinavinaka ka vakacegu, ka sa rawa vei keda kece me baleta na isolisoli ni Tamada kei na Luvena.
iKarua, vakataki ira na dauvakatawa sipi era raica na gone o Karisito ka “vakatakila ki na veivanua kecega”9 na veika taleitaki me baleta na Nona sucu, sa rawa ni da vakatavulica na vakacegu ki na noda matavuvale kei ira tale eso eda lomana. Eda cakava vinaka sara vakakina ni da dolava na ivolanikalou ki na nodra vakasama kei na lomadra.
Ni ra se lalai na luvei keirau, keitou a vakarautaka e dua na vakatasuasua ni Siganisucu vakamatavuvale ka ra vakayagataki na veivosa taucoko mai na ivolanikalou. Keitou a vakayacora na vakatasuasua ena Siga ni bera na ni Siganisucu. Vuqa vei kemuni sa vakayacora e so na ka vakatautauvata.
Na ivakamacala eliu ni neitou vakatasuasua a gadrevi kina e so na iwiliwili yalani ni dauvatasuasua, ka ra vakaitavi kece mai na ivolanikalou. Au a Josefa, ka Meri o watiqu, ka Karisito gone e dua na matakau. A tosocake vakatotolo na iwiliwili ni tamata ka vakaitavi. Keitou a vakuria e dua na gone lailai ka vakatakarakarataka na gonedramidrami o Jisu, qai ra basika mai na dauvakatawa sipi—vakaisulu tu ena iubi ni sisili—me ra sokalou ena vale ni manumanu, tarava mai keitou a vakuria rawa e so na tui ka tauri kato iyau talei voli me ra vakarokorokotaka na Tui sucuvou.
Ni oti e vica na yabaki, keitou a dolava na vakatasuasua ena dua na gone ka vakatakarakarataki Samuela na Leimani ni duri tu me vakadinadinataka ena kaukauwa vakaparofita na nona mai sucu na Mesaia yalataki. Yaco na gauna, keitou a vakuria e dua na ilala tawavakabauta ka vakaiyaragi tu ena polo ra caka ena foili me ra viriki Samuela kina ni tucake tu e matadra. Ena veiyabaki, ni ra sa kaukauwa ka matau cake tikoga na lewe ni ilawalawa dauvakacaca, keitou sa dauvakananumi ira vakaukauwa ni sega ni rawa ni vorati o Samuela baleta ni sa italai taqomaki ni Kalou—ka baleta ni keitou a kidava ka vakacaucautaka voli na vakacegu!
Keitou a gadreva na tikina e so me baleti ira na gone lalai, ka keitou vakuria na sipi kei na lami me ra qasi muri ira na dauvakatawa sipi ki na vale ni manumanu.
Ia sa tasoro sara na gauna—me vaka e dau yaco. Sa ra tubucake na dauvatasuasua, ka keitou sa tu tale oqo ena ivakatekivu. Au sa vakasaravi ira na Josefa, Meri, dauvakatawa sipi, sipi, lami, kei na tui ni ra yaco me ra vakatavulici ira na nodra daulomani me baleta na iVakabula kei na vakacegu e sa vakavuna na Nona sucu.
Era a vakalougatataki ni vulica na veitikina era matataka e so na ka me baleta na iVakabula kei na vuna eda lomani Koya kina. Au vakavinavinaka ni ra raica na luvei keirau kei na luvedra ni keirau vakarokorokotaka na gonedramidrami o Jisu, a sucu me isoro tawayalani, na isolisoli vakasakiti ni vakacegu a solia na Tamada Vakalomalagi kivei ira taucoko na Luvena.
iKatolu, vakataki iratou na Tamata Vuku, sa rawa ni da soli ka ni loloma kei na vakacegu me vaka na tisaipeli ni Turaga vakaturi cake.
A cakava vakakina ena yabaki e so a kacivi oti kina o bisopi Sellers mai Rexburg, Idaho e sa balavu sara. A voleka tu na nona tabanalevu ki na salayawa ka lako curuma na tauni lailai. Ena gauna oya ni tawacakacaka, era a veitosoyaki tu e vuqa na tamata vakaloloma, ena vakanuinui voli ni kunea na sala e so me ra rawa bula kina. Era na qara wasoma na veivuke ni dua na bisopi ni Yalododonu Edaidai. Vakavuqa, na bisopi era raica ena talai ira ki na itikotiko nei Bisopi Sellers.
E tiko e dua na vuna. Na matavuvale na Sellers e dau kidavaki ira na vulagi ena nodra gagadre. Ena kena dau sagai na vakayakavi me gauna ni kanavata ga vakamatavuvale, e dua se rua, se levu sara na vulagi ena tiko ena teveli ena so na gauna. Ni ra sa vakayagataka oti na vulagi na kakana vakatiriweli e vakarautaka o Sisita Sellers, a solia vei ira na bisopi e dua na kote mai na ivovo ni ivakarau ni kote ni sotia e a volia tu.
Ni sa daramaki tu e dua na kote katakata ka tauri voli e dua tale na ioloolo kakana e vakarautaka o Sisita Sellers, era na sotava na draki batabata ena loma katakata. Na irairai kei na rorogo kei na vakanananu ni siga oya ena tiko vata kei ira ena nodra ilakolako. Baleta ni so na gauna batabata duadua e Rexburg a donuya na draki ni bula ni Siganisucu ka baleta na ivakarau matau ni loloma cecere vakayabaki ni matavuvale, era kauta voli na gone ena itikotiko na Sellers e dua na ivakananumi ni cakava voli na veika e rawa ni cakava na iVakabula—kei na kena caka voli ena Vukuna.
O sa na rairai tara beka kei na nomu matavuvale na nomudou ivakarau matau ni Siganisucu me veidonui kei na nomudou ituvaki, ia ena tiko e so na ka era tautauvata kina. Era na dreta na yalo e so kivua na iVakabula. Ka ra na okata na cakacaka e so ni yalololoma ka na ganita na veivakadonui ni iVakabula. A kaya o Koya:
“Ni kau a viakana, ka ni a solia mai vei au na kakana: Au a viagunu, ka ni a vagunuvi au: Au a vulagi, ka ni a kauti au ki vale:
“Luvawale, ka ni a vakasulumi au: Au a tauvimate, ka ni a mai raici au: Au a tiko ena vale ni veivesu, ka ni a lako mai vei au.”10
Ena qai vosa na Tui ka kaya vei ira, “Au sa kaya vakaidina vei kemuni, Ni kemuni a cakava vua e dua sa lailai vei ira na wekaqu oqo, ni a cakava vei au.”11
Era a vaqara ka kune vakacegu na agilosi, dauvakatawa sipi, kei na Tamata Vuku mai na nodra vakabauti Jisu Karisito. Ena vakakina o iko. Na sucu ni iVakabula sa ikoya na isolisoli e rawa kina vua na Tamada me solia vei keda na “vakacegu ena vuravura oqo, kei na bula tawamudu ena vuravura ka lako mai.”12 Eda a kaila ena reki ena vuravura ni yalo ni da rogoca na yalayala oya. E lako tale mai vei keda na vakacegu kei na reki ni da rogoca na veivosa lagati e cauraka voli ni a maroroi tu na yalayala lomani ni Kalou:
Sa noqu masu ni na mai vakatawani keda yadua na vakacegu ni da nanuma na loloma, ka sokalou vua na Tamada Vakalomalagi ena muri ni noda veiyalayalati vata kei Koya. Me da sa dau nanuma tu ga na veiqaravi kei na yalololoma a solia o Jisu Karisito donuya na Nona ilesilesi vakatamata—ka sasagataka ni cakava vakatautauvata.
Au vakadinadinataka ni o Jisu na Karisito, na Luvena daulomani na Tamada. Au vakadinadinataka ni sa parofita bula ni Kalou o Peresitedi Thomas S. Monson. Sa nona vakanuinui, ka vakakina na Mataveiliutaki Taumada, ni na nomu ena draki ni bula oqo ka vaka tu ga kina na vakilai ni reki, loloma, kei na vakacegu sa yalataka na iVakabula kivei ira na Nona tisaipeli yalodina ka dauvakamasuti rawarawa. Ena yaca i Jisu Karisito, emeni.