Dili kaayo Makita nga mga Gasa
2021 nga Debosyonal sa Pasko sa Unang Kapangulohan
Dominggo, Disyembre 05, 2021
Pasiuna
Sa gamay pa ako, ang pinakamahinamon nga bahin sa pasko mao ang pag-abot ni Lolo ug Lola Lundgren. Matag tuig gihimo nila ang layo nga pagbiyahe sakay sa karaan nga sakyanan aron mobisita. Pinangga namo sila, ug ganahan kaayo mi sa mga Swedish pancake ni Lola—nga hinimo sa presko nga sour cream nga iyang dala gikan sa lokal nga mag-uuma sa ilang lungsod. Magbarog siya sa may stove sulod sa daghang mga oras, magluto og mga pancake hangtod dili na mi makahimo sa pagkaon. Karon duha na ka henerasyon sa kabataan ang mitubo nga nagkumbira nianang Swedish nga mga pancake. Ug sa matag panahon nga maghimo kami niini, among mahinumdoman si Lola Lundgren ug ang iyang gasa sa gugma.
Ang ubang pinakanindot kaayo nga mga gasa mao ang mga gasa sa atong panahon ug mga talento. Nagtuo ko nga ang maong mga gasa balaan nga mga gasa.
Mga Gasa
Mao kini ang panahon sa paghulat og bag-ong mga gasa. Apan karong gabhiona, atong hunahunaon ang mga gasa nga inyo nang nadawat—ug kon si kinsa ang naghatag niini ug ngano.
Ang Dios naghatag sa matag usa kanato og mga gasa. Tingale wala kamo mobati nga daghan og talento, apan kamo adunay espirituwal nga mga gasa aron kamo makapanalangin sa uban ug mas mapaduol ngadto Kaniya. 1
Unsa ang mga gasa nga gihatag sa Dios kaninyo?
Sa tinuod lang, wala gayod ako magtan-aw sa akong kaugalingon isip usa ka tawo nga daghan og talento. Dili ko hanas sa pagkanta, o pagsayaw, o pagkaatleta, o pagkaartista, o sa math, o … o … o … basta … normal ra kaayo ko.
Usahay nakatan-aw ko sa maayo kaayong mga talento sa uban ug mibati nga ubos. Apan akong naamgohan kon unsa ka walay pulos ug gani makadaot ang maong mga pagtandi. Labaw sa tanan, akong nakita ang sagrado nga gahom sa “dili kaayo makita nga mga gasa” sa Dios ug nagmaya niini isip ebidensiya sa Iyang gugma ug pagsalig.
Si Elder Marvin J. Ashton nagtudlo nga ang mga espirituwal nga mga gasa sa Dios naglakip nianang “dili kaayo makita” lakip na “ang gasa sa pagpangutana; ang gasa sa pagpaminaw; ang gasa sa pagkadungog ug paggamit sa hinay, hinagawhaw nga tingog; ang gasa nga makahimo sa pagbakho; ang gasa sa paglikay sa panaglalis; ang gasa nga dali rang mouyon; … ang gasa sa paglikay sa kawang nga pagbalik-balik; ang gasa sa pagpangita kon unsa ang matar[o]ng; ang gasa nga dili dayon mohukom; ang gasa sa pagpangayo sa Dios og giya; ang gasa sa pagkadisipulo; ang gasa sa pag-amuma sa uban; ang gasa nga makahimo sa pagpamalandong; ang gasa sa paghalad og pag-ampo.” 2
Nakatabang ba kini nga lista aron makita ninyo ang inyong mga gasa sa bag-o nga panglantaw? Nakatabang kini kanako.
Kining hilom nga mga gasa sama sa uban nga mga gasa nga sagad atong gipasidunggan ug gidayeg ug nakatabang og dako sa pagbayaw sa mga anak sa Dios 3 —hilom nga mga gasa nga nakatabang kanato sa pagtuman sa atong labing importante nga mga katuyoan sa kinabuhi. Apan, subo lang, kita usahay magpanuko ug mapakyas sa pagdayeg o pagpakigbahin sa atong mga gasa, mahadlok nga dili kini sama kaanindot, hingpit, o sama katahom sa atong ganahan.
Kon kita mapakyas sa pagpasalamat niining dili kaayo makita nga mga gasa, mawala kanato ang kahigayonan sa pagdasig sa Iyang mga anak—ug mawala kanato ang kahigayonan sa pagbati sa gugma sa Dios. 4
Itugtog ang Awit sa Inyong mga Gasa
Pakitaon ko kamo og lain pa nga gasa—usa ka gasa gikan ni Lolo Lundgren. Si Lolo kanunayng ganahan nga mopatugtog sa biyolin. Hinuon, kini nga biyolin nagpabilin nga wala magamit ug naabogan diha sa iyang estante, ug dayon sa ako, sulod sa daghang katuigan—ang musika nga anaa niini nga mga kuwerdas hilom ra.
Ikompara kini sa biyolin sa akong sais anyos nga apo, si Scarlett. Siya adunay gasa nga ipakigbahin kanato karong gabhiona.
[Scartett nagtugtog sa biyolin]
Salamat, Scarlett. Nindot kaayo kadto. Gimahal ko ikaw.
Ang atong mga gasa gikan sa Langitnong Amahan angay lang nga ipakigbahin. Ang biyolin ni Scarlett dili mahalon, ug kita makabatyag og mga sayop sa instrumento o sa pamaagi, apan tungod kay iyang gibutang ang iyang kasingkasing ngadto niini, siya nakahatag og gasa nga nagdala og hingpit nga kalipay.
Ayaw tugoti ang mga gasa sa Dios nganha kaninyo, bisan ang Iyang dili kaayo makita nga mga gasa, nga dili magamit o dili mapasalamatan. Kuhaa gikan sa estante kanang mga gasa nga Iyang gihatag kaninyo. Kon inyo kining gihipos tungod sa pagduda sa kaugalingon, paphai ang abog ug sulayi. Ihalad kini ngadto sa Dios ug sa Iyang mga anak. Ang mga gasa nga anaa kanato gikan sa atong Langitnong Amahan angay lang nga gamiton ug ipakigbahin. Ang tanan ninyong mga gasa gikan sa Dios, bisan unsa pa ka dili hingpit, magdala og kamaya ug kini, kon ihalad ngadto Kaniya, usa ka himno sa pagdayeg.
Dad-a ang inyong gasa sa pagpaminaw nga mahigugmaon ug bisitaha ang usa ka masulob-on nga higala. Anaa ba kaninyo ang gasa sa paglikay sa panaglalis ug pagkadali nga igkasabot? Kana nga mga gasa mas labaw nga gikinahanglan sukad. Ihatag kini sa inyong pamilya, mga higala, ug mga silingan. Sultihi ang usa ka tawo nga naglisod nga gihiguma ninyo siya, ug dapita siya ngadto sa inyong lamesa. Pagtudlo og usa ka makadasig nga leksiyon. Paghimo og mabination nga mubo nga sulat. Gamita ang inyong gasa sa pagtabang ug pagtukod sa Zion ug pagpalig-on sa mga tawo sa inyong palibot. Ang Dios nagkinahanglan sa tanang matang sa gasa. Iyang gihatag ang tanang mga gasa sa pagbayaw sa Iyang mga anak. Ayaw tugoti ang musika nga anaa kaninyo nga dili makanta, ang gakos nga dili mahatag, ang pasaylo nga dili madalit.
Pagdawat sa Iyang Gasa
Sa panahon sa Pasko niadtong 1832, ang nakigbisog nga unang mga Santos nag-atubang og sibil ug politikanhon nga kaguliyang. Si Propeta Joseph Smith bag-ohay lang nga nanagna og usa ka gubat sibil. 5 Karon dili kaayo kana makadasig.
Apan pagka Disyembre 27, si Joseph nakadawat og lain pa nga pagpadayag—usa ka “mensahe … sa kalinaw” gikan sa Ginoo. 6 Niining malisod nga mga panahon, ang Ginoo mipahinumdom ni Joseph sa mga gasa nga Iyang gihatag sa Iyang mga Santos—ilabi na gayod, sa gasa sa Manluluwas nga si Jesukristo ug sa paglaom sa kinabuhing dayon.
Ang paagi sa pagsadya niadto nga panahon sa Pasko mao ang pagmatikod ug pagdawat sa mga gasa sa Dios; una ug labaw sa tanan mao ang “dili katupngan nga gasa” 7 sa usa ka Manluluwas. Sama ra kini ka tinuod niini nga panahon sa Pasko.
Diha sa pagpadayag nga nadawat ni Joseph, and Ginoo nangutana kaniya sa mosunod nga pangutana:
“Kay unsa ang makuha sa usa ka tawo kon ang gasa itugyan diha kaniya, ug siya wala modawat sa gasa? Tan-awa, siya wala malipay niana nga gihatag ngadto kaniya, ni malipay diha kaniya kinsa mao ang naghatag sa gasa.” 8
Panapos
Ako manghinaot nga matag usa kanato makakita ug modawat sa mga gasa nga gihatag sa Dios kanato—apan ako manghinaot ilabi na gayod nga kita matag usa magmaya diha sa Dios, ang tighatag niini nga mga gasa.
Ako mapasalamaton sa dili katupngan nga gasa sa Iyang Anak—usa ka Anak kinsa mianhi sa kalibotan isip usa ka gamayng bata, giputos og lampin sa usa ka batan-on nga inahan ug gipahigda sa pasongan. Usa ka bata kinsa magkat-on sa han-ay nga pamaagi ug motubo sa hinay-hinay nga pag-uswag hangtod Iyang gihatag ang Iyang kinabuhi isip halad alang sa akong mga sala. Alang sa inyong mga sala. Alang sa mga sala sa tanan gayod nga nabuhi ug mabuhi sa kalibotan.
Atong kantahon ang mga pulong sa minahal nga himno:
“Kalipay sa kalib[o]tan, moabot nang Hari!” 9
Ang gasa ni Jesus ang Kristo nahatag na, ug pagkadako sa bili! Ang pangutana mao, nga ato ba Siya nga dawaton? Tugotan ba nato Siya nga modayon ug mopatigbabaw? Sa unsang paagi?
Ako mopamatuod nga ang pagdawat sa atong Hari ug sa Iyang mga gasa modala og tinuod nga hingpit nga kalipay—hingpit nga kalipay sa kalibotan ug kalipay diha sa kalibotan.
“Pasalamatan nato ang Dios [sa] bililhon kaayong gasa” 10 sa Iyang Anak sa balaan nga ngalan ni Jesukristo, amen.