Bulahan ang mga Tigpasiugda sa Kalinaw
2021 nga Debosyonal sa Pasko sa Unang Kapangulohan
Dominggo, Disyembre 5, 2021
Sa makausa pa, ang atong minahal nga Unang Kapangulohan midapit kanato sa pagpundok samtang atong sugdan ang atong pagsaulog sa Pasko. Samtang ang atong mga tradisyon ug mga kustombre sa tibuok mga nasod nagkadaiya, kitang tanan mapasalamaton ug bulahan nga magkahiusa—nagsimba isip usa sa atong Manluluwas nga si Jesukristo ug magsaulog sa Iyang pagkatawo sobra sa duha ka libo ka tuig ang milabay.
Usa sa paboritong tradisyon sa panimalayng Bassett, ingon man sa kadaghanan ninyo, mao ang pagbuhat og dula sa sugilanon sa pagkatawo ni Jesus [nativity]. Alang kanamo, ang pagbasa sa mga asoy ni Isaias, Lucas, Mateo, Nephi, ug Mormon, duyogan sa mga himno sa Pasko ug buhi nga pagpasundayag ni Maria, Jose, ug sa batang si Jesus, nahimong makapadasig ug espirituhanon—apan dili sa kanunay.
Pananglitan, usa ka Bisperas sa Pasko ang among gagmayng bata nga maoy nagdala sa papel sa panon sa karnero nagdungan sa pagpanghilak. Ang ilang paghilak dali kaayong mitakod ngadto sa nagdala sa papel sa mga magbalantay ug mga anghel ug gani ngadto sa masuso nga bata mismo. Pagkasunod tuig, wala na kami mga panon sa karnero. Walay usa nga nangahas nga modala sa papel sa usa ka karnero sa kahadlok nga, basin og, ang karnero maoy hinungdan sa makahadlok ug makayagaw nga pagpanghilak. Sa laing tuig, ang mga sungkod sa mga magbalantay nahimong mga espada-espada, ug sa laing tuig walay ganahan nga himoon og usa ka Mago o usa ka anghel, moinsister hinoon nga magsul-ob og mga costume sa dinosaur ug mga costume nga lumod [dolphin] nga gikan sa Kalag-kalag. Apan tingali ang among labing halandumon nga pagdrama-drama mao gayod ang pagkahangbong sa bata gikan sa nahimutangan sa taas ug ang dili kaayo lig-on nga pasongan, napusgay didto sa batoon nga pugon, igo lang gayog nga nasalo pila lang ka pulgada gikan sa salog. Akong dawaton ang pasidungog nianang pagkasalo, bisan og ang pagkahagbong ako usab gayod ang hinungdan.
Mahilom ba nga gabii? Malinawon ba ang tanan? Ang among mga sugilanon sa pagkatawo ni Jesus lagmit mas maayong matawag nga “Kaguliyang diha sa Pasongan.” Moangkon gyod ko nga samtang nagsingabot ang Pasko, kanunay nakong gihunahuna kon tingali among paningkamotan ang usa ka tradisyon sa Pasko nga tinud-anay nga magdapit og kalinaw?
Kalinaw—nga matam-is ug malaomon nga kahimtang nga gitinguha natong tanan, dili lang sa Pasko apan sa kanunay. Sa tibuok kalibotan karon, hinoon, ingon og ang kalinaw nahimong nagkalisod na nga makit-an. Samtang nagtuon sa Doktrina ug mga Pakigsaad niining tuiga, ako napahinumdoman sa usa ka pagpadayag nga naghulagway sa atong panahon:
“Ug niana nga adlaw … ang tibuok yuta magkaguliyang, ug ang mga kasingkasing sa tawo mopakyas kanila.” 1
Sa karon nga kahimtang sa yutan-ong kaguliyang, asa man makit-an kining mas dakong kalinaw nga gitinguha sa tanan sa tibuok kalibotan?
Si Presidente Russell M. Nelson mipahayag:
“Ang ebanghelyo ni Jesukristo mao gayod ang gikinahanglan niining nagkalibogay, mabingkilon, ug hapo nga kalibotan.
“Ang matag usa sa mga anak sa Dios angayang makadawat sa oportunidad nga makadungog ug modawat sa makaayo, makatubos nga mensahe ni Jesukristo. Walay laing mensahe nga mas mahinungdanon sa atong kalipay—karon ug sa kahangtoran.” 2
Ang mensahe sa Pagpahiuli mao ang mensahe sa Pasko. Ang kahayag sa bitoon nga migiya sa mga magbalantay sa karnero ngadto sa bata diha sa pasongan susama sa gilis sa kahayag nga inanayng mikanaog diha ni Joseph—ang duha giunhan sa malipayon nga mga balita sa dako nga kalipay sa pagpahibalo ni Kristo ngadto sa kalibotan.
Ang mensahe ni Isaias ngadto sa atong nagkaguliyang nga kalibotan nagpadayon nga, “Natawo alang kanato ang usa ka bata; gihatag kanato ang usa ka anak nga lalaki, ug siya ang magmando sa tanan ug nganlan siyag “Maalamong Magtatambag,” “Dios nga Gamhanan,” “Amahan Hangtod sa Kahangtoran,” “Prinsipe sa Pakigdait.” 3
Si Elder Quentin L. Cook nagtudlo, “Usa sa gimanggad kaayo nga titulo sa atong Ginoo ug Manluluwas, nga si Jesukristo, mao ang ‘Prinsepe sa Pakigdait’ [Isaias 9:6]. … Ang Iyang gingharian pagatukoron lakip ang kalinaw ug gugma.” 4
Samtang mobasa kita sa mga pulong nga makita diha sa Lucas niining tuiga, nanghinaot ko nga inyong hunahunaon ang mga pulong sa “usa ka dakong panon sa anghel sa langit nga nag-awit ug mga pagdayeg sa Dios,” sa dihang sila miingon, “Dalaygon ang Dios sa kahitas-an, ug sa yuta panagdait sa mga tawo nga iyang gikahimut-an!” 5 Ako namalandong niining mga pulonga ug naghunahuna nga tingali tukma kini alang kanato sa pagkonsiderar isip usa ka pamahayag nga “ang Kalinaw anaa sa yuta karon.” “Miabot na ang Kalinaw!” sila mahimong mituaw. Tungod kay, sa pagkatinuod, nianang gabii diha sa ubos nga pasawan, ang mismong “Prinsipe sa Kalinaw” miabot sa yuta.
Nianang unang adlaw sa Pasko ang mga tigbalita nga mga anghel namahayag nga ang kalinaw miabot. Nag-una kanila si Jacob namahayag, “Kami nasay[o]d kang Kristo, ug kami adunay usa ka pagla[o]m sa iyang himaya sa daghan nga gat[o]san ka mga tuig sa wala pa siya moanhi; ug dili lamang kay kami ang adunay pagla[o]m sa iyang himaya, apan usab ang tanan nga balaan nga mga propeta nga una pa kanamo.” 6
Usab, si Isaias nanagna, karon bahin sa atong panahon, samtang siya misulat, “Pagkatahom sa mga tiil niadtong milatas sa kabukiran aron pagwali sa maayong balita, pagmantala sa pakigdait.” 7
Busa, kinsa man kining matahom nga mga tawo kinsa nagmantala sa pakigdait? Ang Manluluwas namahayag ngadto sa Iyang mga disipulo sa Galilea ug sa yuta sa Bountiful nga “Bulahan ang naningkamot nga managdait ang katawhan kay isipon sila sa Dios nga iyang mga anak.” 8
Agi og dugang, si Hari Benjamin nagtudlo, “Ug karon, tungod sa pakigsaad diin kamo nakahimo kamo pagatawgon nga mga anak ni Kristo, iyang anak nga mga lalaki, ug iyang anak nga mga babaye; kay tan-awa, niining adlawa siya sa espirituhanon nga paagi nanganak kaninyo; kay kamo nag-ingon nga ang inyong mga kasingkasing nausab pinaagi sa hugot nga pagtuo diha sa iyang ngalan; busa, kamo natawo kaniya ug nahimo nga anak nga mga lalaki ug iyang anak nga mga babaye.” 9
Kamo ug ako mao ang mga anak sa pakigsaad ni Jesukristo, matag usa Iyang mga anak. Hinumdomi, Siya ang namahayag nga ang tigpasiugda sa kalinaw mao ang mahimong tawagon nga mga anak sa Dios. Busa, kita—ang mga anak sa Dios—mao ang tighimo sa pakigdait. Kini ang atong pakigsaad nga katungdanan. Kamo ug ako makahimo og kalainan sa nagkaguliyang nga kalibotan karon samtang kita maningkamot nga mahimong managdait—diha sa atong mga panimalay, sa atong mga kongregasyon, sa atong mga komunidad, gani latas sa kalibotan, pinaagi sa atong pagkamabination, pinaagi sa atong maayo nga mga buhat, ug pinaagi sa atong mga pulong—mahimong sa face-to-face ingon man sa birtuwal nga paagi. Magmatinud-anon kita nga “momantala sa pakigdait” samtang kita mopamatuod bahin Kaniya, diha sa pulong ug sa buhat.
Usab gikan sa Lukas atong mabasa:
“Sa namalik na ang mga anghel ngadto sa langit, ang mga magbalantay sa karnero nag-ingnanay, “Mangadto kita sa Betlehem ug tan-awon nato kining nahitabo nga gipahibalo kanato sa Ginoo.
“[Ug] midali sila pag-adto ug nakit-an nila si Maria ug si Jose ug ang bata nga naghigda sa pas[o]ngan.
“Sa diha nga ang mga magbalantay nakakita sa bata, gisugilon nila ang gisulti sa anghel mahitungod kaniya.” 10
Sa samang paagi, “mangadto kita [karon]” ug “isugilon kanila” ang mensahe sa pakigdait “mahitungod kaniya.” Kini mao ang mensahe sa atong mga misyonaryo sa atong mga minahal ug mga higala; mao kini ang buhi nga mensahe nga gipaambit sa pangserbisyo nga mga misyonaryo samtang sila moserbisyo sama sa gibuhat sa Manluluwas. Mao kini ang mensahe nga atong gipahayag samtang kita mohigugma, mopaambit, ug modapit niadtong naglibot kanato sa pag-ambit sa paglaom ug kalinaw nga makit-an diha sa maayong mga balita ni Jesukristo.
Busa balik sa mga Bassett sa paghatag og mga dula sa pagkatawo ni Jesus nga nagkaguliyang namong gisulayan matag Pasko—nganong moinsister man kami sa pagsunod niining tradisyon, sa pag-awhag sa among mga anak ug mga apo nga buhaton pag-usab alang kanamo kanang matahom nga espisyal nga gabii, sa dihang miabot ang mga anghel dala ang mga maayong balita sa dakong kalipay?
Ang tubag yano ug makapahimuot: “Kami naghisgot kang Kristo, kami nalipay diha kang Kristo, kami nagsangyaw kang Kristo, kami nanagna kang Kristo, ug kami nagsulat sumala sa among mga panagna, nga ang among mga anak mahimo nga masay[o]d sa unsa nga tinubdan sila mahimo nga mangita alang sa kapasayloan sa ilang mga sala.” 11
Oo, among nakita nga ang tibuok yuta magkaguliyang ug ang mga kasingkasing sa mga tawo mopakyas kanila. Hinoon, bisan pa man sa mga hagit, diha sa atubangan sa oposisyon, ug taliwala sa kaguliyang, molahotay kita sa pagmantala og kalinaw, niining panahona ug sa kanunay, samtang kita mangandam sa atong kaugalingon ug sa tanang naglibot kanato alang sa talagsaong pagbalik sa Prinsipe sa Kalinaw, gani ang Ginoo, Manluluwas, ug Manunubos, si Jesukristo. Sa pagsubli sa mga pulong ni Presidente Nelson, “Ang matag usa sa mga anak sa Dios angayang makadawat sa oportunidad nga makadungog ug modawat sa makaayo, makatubos nga mensahe ni Jesukristo.”
Hinaot nga kita mahimong mga tigmantala sa pakigdait samtang kita magsaulog sa pagkatawo, kinabuhi, ug misyon sa atong Manluluwas niining panahon sa Pasko ug sa kanunay mao ang akong pag-ampo sa ngalan ni Jesukristo, amen.