Ang Diwa sa Pasko
Debosyonal sa Pasko sa Unang Kapangulohan
Dominggo, Disyembre 5, 2021
Minahal kong mga kaigsoonan, mapasalamaton ko nga gikauban kamo niining tibuok kalibotan nga debosyonal sa Pasko. Ang sagrado nga musika ug mga pulong mitandog sa atong mga kasingkasing. Nagdala sila sa tinuod nga diwa sa Pasko, ang kalipay nga nagagikan sa pagsimba ug paghigugma ni Ginoong Jesukristo. Kita nabugkos diha sa atong gugma ug debosyon alang Kaniya.
Kanang pagbati sa pagsimba molambo sa matag higayon nga ako magbasa sa mga kasulatan nga nakatabang kanako nga mahibalo kinsa Siya niadto ug kinsa Siya karon. Gikan niana nga pagbasa ug pag-ampo, ako nakaila nga si Jesus mao si Jehova, kinsa, ubos sa direksiyon sa Langitnong Amahan, mao ang Tiglalang sa tanang butang. Si Pablo mihulagway niini sa ingon nga paagi:
“Sa karaang panahon ang Dios, sa makadaghan ug sa nagkalainlaing paagi, misulti sa atong mga katigulangan pinaagi sa mga propeta,
“Apan niining kataposang mga adlaw misulti siya kanato pinaagi sa iyang Anak. Pinaagi kaniya gibuhat sa Dios ang tibuok nga kalibotan ug gipili siya aron manag-iya sa tanang butang;
“Naglarawan siya sa himaya sa Dios ug diha gayod kaniya ang kinaiya sa Dios. Siya maoy nagkupot sa tibuok uniberso pinaagi sa iyang gamhanang pulong. Tapos niya hugasi ang mga tawo sa ilang mga sala, milingkod siya sa tuo sa Dios didto sa langit;
“Ang Anak gihimong labaw pa kay sa mga anghel ingon nga gihatagan siya sa Dios ug ngalan nga halangdon pa kay sa ngalan sa mga anghel.
“Kay wala gayoy anghel nga giingnan sa Dios: Ikaw mao ang akong Anak; karong adlawa Amahan mo na ako? Ako mahimo niyang Amahan, ug siya mahimong akong Anak?
“Sa dihang gipadala sa Dios ang iyang panganay nga Anak nganhi sa kalibotan, miingon siya, Kinahanglan simbahon siya sa tanang mga anghel sa Dios.” 1
Sa pagkatawo ni Jesus sa Betlehem ang mga anghel nanganta gayod ug, sama sa gipanagna, ang usa ka bag-o nga bitoon mitunga gayod aron sa pagdan-ag sa langit, mipasidungog sa pag-abot sa Anak sa Dios ngadto sa mortal nga kinabuhi.
Siya mas labaw pa kay kanato, bisan pa niana ang mga panghitabo nga naglibot sa Iyang mortal nga pagkahimugso nakapahimo kanato nga mobati sa Iyang kaduol kanato. Siya mipili nga manaog gikan sa Iyang trono diha sa tuong kamot sa Amahan aron Iyang dawaton ang pagkamortal. Siya mibuhat niini tungod sa gugma alang sa matag anak nga lalaki ug babaye sa Iyang Amahan kinsa matawo nganhi sa kalibotan. Gibuhat Niya kini tungod sa gugma alang kaninyo––ug kanako.
Mahimo unta Siyang matawo sa bisan unsa nga sitwasyon. Apan si Jesus natawo sa ubos nga mga kahimtang diha sa usa ka gamay nga baranggay. Ang mga magbalantay sa karnero ang miabi-abi Kaniya. Pipila ka Tawo nga Maalamon sa kaulahian gigiyahan sa inspirasyon aron mosimba Kaniya. Ang politikanhong lider mimando nga Siya patyon. Siya kinahanglan nga dad-on sa langyaw nga nasod aron sa pagpatunhay sa Iyang kinabuhi. Sa dihang ang usa ka anghel misulti sa Iyang mortal nga mga ginikanan nga Siya makabalik na sa Iyang nasod, ila Siyang gidala sa Nazaret. Migahin Siya og dul-an sa 30 ka tuig didto, nagdako ug nagtrabaho isip usa ka karpentero, sa wala pa makasugod ang Iyang pagpangalagad sa publiko.
Tingali matingala mo, sama nako, ngano nga kinahanglan alang sa hingpit nga Anak sa Dios nga ipadala sa maong misyon. Hinumdomi giunsa Niya paghulagway ang Iyang mapainubsanong pagdawat sa Iyang tawag:
“Nanaog ako gikan sa langit dili sa pagbuhat sa akong kaugalingong kabubut-on kondili aron pagbuhat sa kabubut-on sa nagpadala kanako.
“Kini mao ang kabubut-on sa nagpadala kanako: nga dili ako kawad-an bisag usa sa tanan nga iyang gihatag kanako, hinuon banhawon ko silang tanan sa kataposang adlaw.
“Kay buot sa akong Amahan nga ang tanan nga makakita sa Anak ug motuo kaniya makabaton sa kinabuhing walay kataposan ug banhawon ko sila sa kataposang adlaw.” 2
Si Jesus mipakita sa Iyang gugma ug kamapainubsanon. Bisan paman sa gahom ug kahalangdon sa Iyang nahimutangan uban sa Iyang Amahan, si Jesus mipili alang sa Iyang mga disipulo sa kalibotan og komon nga mga tawo, lakip na ang mangingisda, usa ka tigkolekta og buhis, ug usa ka patriyota.
Siya misangyaw ug nakigsandurot sa mga sanglahon, sa masakiton, sa amang, ug sa tinamay. Iyang gihigugma ug gidawat ang labing ubos taliwala kanila, bisan kon Siya mikanaog gikan sa harianong panimalay. Siya mialagad kanila, mihigugma kanila, ug mibayaw kanila.
Ang Iyang talagsaon nga mahigugmaong kamanggiloloy-on ug kaligdong nagkadako gani hangtod sa kataposan sa Iyang misyon sa kalibotan. Siya miatubang sa pagpakigbatok ug kasilag nga Siya nasayod nga kabahin sa misyon diin Siya gitawag ug midawat. Kini mao ang pag-antos alang sa mga sala ug mga sakit sa tanan nga moanhi niining mortal nga kinabuhi.
Nakahinumdom mo sa mga pulong ni Jacob samtang siya nagtudlo sa iyang katawhan sa Pag-ula ni Jesukristo:
“O pagkawalay katap[o]san sa pagkabalaan sa atong Dios! Kay siya nasay[o]d sa tanan nga mga butang, ug walay butang nga siya wala mahibalo.
“Ug siya mianhi sa kalib[o]tan aron siya moluwas sa tanan nga mga tawo kon sila mopatalingh[o]g sa iyang tingog; kay tan-awa, siya miant[o]s sa mga kasakit sa tanan nga mga tawo, oo, ang mga kasakit sa tanan nga mga buhi nga binuhat, mga lalaki, mga babaye, ug mga bata, nga nahisakop sa banay ni Adan.
“Ug siya miant[o]s niini aron mabanhaw ang tanan nga mga tawo, nga silang tanan makabar[o]g sa atubangan kaniya sa adlaw sa dako nga paghukom.” 3
Ang masuso diha sa pasongan sa Betlehem mao ang Anak sa Dios, gipadala sa Amahan aron mahimong atong Manluluwas. Siya mao ang Bugtong Anak sa Amahan diha sa unod. Siya mao ang atong Ehemplo.
Aron maangkon ang diwa sa Pasko, kinahanglan kitang maningkamot nga mohigugma sama nga Siya nahigugma. Ang Iyang mga pulong nganha kaninyo ug ngari kanako mao ang “Paghigugmaay kamo sama nga Ako nahigugma kaninyo.” 4
Inyong mabati ang diwa sa Pasko, niadto nga mga pulong, sama nga ako mibati. Mabati nako ang kahayag ug ang paglaom nga moabot gikan sa impluwensya sa Espiritu Santo sa matag higayon nga ako mahinumdom ug mamalandong, sa ehemplo sa Manluluwas sa kalibotan.
Alang kanako, tingali ang labing tam-is nga panumdoman mao nga ang Ginoo andam nga motabang kanato bisan unsa ang mahitabo kanato. Sama sa gitudlo ni Mormon:
“Ang Dios nga nasay[o]d sa tanan nga mga butang, ingon nga gikan sa walay katap[o]san ngadto sa walay katap[o]san, tan-awa, siya nagpadala og mga anghel aron pagpangalagad ngadto sa mga katawhan, aron ikapahibalo ang mahitungod sa pag-anhi ni Kristo; ug diha kang Kristo kinahanglan magagikan ang matag maayo nga butang.
“Ug ang Dios usab nagpahayag ngadto sa mga propeta, pinaagi sa iyang kaugalingon nga ba-ba, nga si Kristo kinahanglan moab[o]t.
“Ug tan-awa, dihay nagkalain-lain nga mga paagi nga siya nagpahayag sa mga butang ngadto sa mga katawhan, nga mga maayo; ug ang tanan nga mga butang nga mga maayo nagagikan kang Kristo; sa lain nga bahin ang mga tawo napukan, ug walay maayo nga mga butang nga modangat ngadto kanila.
“Busa, pinaagi sa pagpangalagad sa mga anghel, ug pinaagi sa matag pulong nga mogula gikan sa ba-ba sa Dios, ang mga tawo misugod paghupot sa hugot nga pagtuo diha kang Kristo; ug sa ingon pinaagi sa hugot nga pagtuo, sila makahupot sa mga maayo nga butang; ug ingon kini hangt[o]d sa pag-anhi ni Kristo.
“Ug human sa iyang pag-anhi ang mga tawo usab maluwas pinaagi sa hugot nga pagtuo diha sa iyang ngalan; ug pinaagi sa hugot nga pagtuo, sila mahimo nga mga anak sa Dios. Ug sa pagkatinuod ingon nga si Kristo buhi, siya namulong niini nga mga pulong ngadto sa atong mga amahan, nag-ingon: Bisan unsa nga butang ang inyong pangayoon sa Amahan diha sa akong ngalan, nga maayo, diha sa hugot nga pagtuo ug masaligon nga kamo makadawat, tan-awa, kini ihatag nganha kaninyo.” 5
Niini nga panahon, daghan kaninyo ang nag-ampo alang sa kalig-on sa paglahutay sa mga pagsulay nga milisod-lisod kaninyo nga inyong gibati nga daw misobra na. Ako mopamatuod nga ang Manluluwas ug ang Amahan nakadungog sa inyong mga pangamuyo nga nangayo alang niadtong makaayo kaninyo ug alang niadtong inyong gihigugma ug giserbisyohan.
Ang tubag moabot sama nga kini miabot ngadto ni Propeta Joseph Smith. Inyong mabantayan ang pag-ampo ni Joseph sa pagpangayo og tabang nga sama sa inyong kaugalingon. Ug inyong mabati ang gugma sa Ginoo alang kang Joseph ug alang kaninyo diha sa Iyang makahupay nga tubag ngadto sa pangamuyo ni Joseph. Nag-ampo si Joseph:
“O Dios, hain ba ikaw? Ug hain ang imong gambalay nga nagsalipod sa imong tagoanan?
“Hangt[o]d kanus-a ikaw mogamit sa imong kamot, ug sa imong mata, oo sa imong matin-aw nga mata, tan-awa gikan sa mahangt[o]ron nga mga langit ang mga sayop sa imong mga katawhan ug sa imong mga sulugoon, ug ang imong dunggan napuno sa ilang mga pagtuaw?” 6
Ug ang Ginoo mitubag sama nga Siya motubag kanimo ug ngari kanako:
“Kalinaw nganha sa imong kalag; ug ang imong kalisdanan ug ang imong mga kasakitan sulod lamang sa mubo nga higayon;
“Ug unya, kon ikaw molahutay pag-ayo, ang Dios mobayaw kanimo sa kahitas-an; ikaw magmada[o]gon ibabaw sa imong tanan nga mga kaaway.
“Ang imong mga higala makig-unong kanimo, ug sila moyukbo kanimo pag-usab uban ang mabination nga mga kasingkasing ug mahigalaon nga mga kamot.” 7
Ako mismo nasayod nga ang mga saad sigurado alang kaninyo, alang kanako, ug alang niadtong atong gihigugma. Ang Ginoo mibati sa atong mga kasakit. Iya kining gipili tungod sa gugma alang kanato. Siya nasayod unsaon sa pagtabang kanato nga mobati og kalinaw diha sa kalisdanan, bisan samtang ang pagsulay nagpadayon. Siya mopadala og mga higala isip mga anghel nga magauban kaninyo “nga may mabination nga mga kasingkasing ug mahigalaon nga mga kamot.” Ang atong kaugalingon nga mga kasingkasing mahimong mas maayo samtang kita molahutay sa personal nga mga pagsulay pinaagi sa hugot nga pagtuo diha Kaniya. 8 Ug uban niana nga kausaban, kita mismo mahimo nga mga higala nga mapadala sa Ginoo isip mga anghel ngadto sa uban.
Isip Iyang saksi, ako mopamatuod nga ang bata nga natawo sa Betlehem mao si Jesukristo, ang pinalangga nga Anak sa Dios. Ako mosaad nga samtang kamo mangayo sa Langitnong Amahan diha sa hugot nga pagtuo ug diha sa ngalan ni Jesukristo, ang Espiritu magdala og mga pagbati sa kalinaw nganha kaninyo ug ngadto sa inyong mga minahal.
Ako mopahayag sa akong gugma nganha kaninyo uban sa akong panghinaot nga kamo makaangkon og malipayong panahon sa Pasko––karong tuiga ug sa kanunay. Sa sagradong ngalan ni Jesukristo, amen.