Ko e Ngaahi ʻUlungaanga Faka-ʻOtua ʻo Sīsū Kalaisí—Angamalū mo Loto Fakatōkilalo

ʻĪmisi

Jesus Christ with the twelve apostles. Christ (depicted wearing a white robe with a yellow sash), is kneeling before one of the apostles as He washes the feet of that apostle. The other eleven apostles are gathered around a table (having just completed the last supper). They are watching Christ. (John 13:1-20)

Ko Hono Fufulu ʻe Sīsū e Vaʻe ʻo e Kau ʻAposetoló, fai ʻe Del Parson

Naʻe folofola ʻa Sīsū ʻo pehē, “Ko ia ʻoku lahi ʻiate kimoutolú, tuku ke tatau ia mo e ki muí; pea mo ia ʻoku pulé, ke tatau mo ia ʻoku tauhí. He ko hai ʻoku lahí, ko ia ʻokú ne nofo ʻo kaí, pe ko ia ʻokú ne tauhí? ʻikai ko ia ʻoku nofo ʻo kaí? ka ʻoku ou ʻiate kimoutolu ʻo hangē ko ia ʻoku tauhí” (Luke 22:26–27).

“Ko e Fakamoʻuí ʻa hotau faʻifaʻitakiʻanga taupotu taha ʻi he mālohi ʻo e loto-fakatōkilaló mo e fakavaivaiʻi kitá. Hili ʻa e ngaahi meʻá ni kotoa, naʻe hanga ʻe Heʻene fakavaivaiʻi Ia ki he finangalo ʻo e Tamaí, ʻo fakahoko ʻa e meʻa maʻongoʻonga taha ne hoko ʻi he kotoa ʻo e hisitōliá. Mahalo ko e kupuʻi toputapu taha ʻi he folofolá kotoa, ko e ‘ʻOua naʻa fai hoku lotó, ka ko e finangalo ʻoʻoú’ (Luke 22:42).”¹

ʻI heʻetau hoko ko e kau ākonga ʻa Sīsū Kalaisí, ʻoku tau fāifeinga maʻu pē ke hangē pē ko Iá. Naʻe pehē ʻe ʻEletā ʻUlise Soalisi ʻo e Kau Fitungofulú, “ʻOku mahuʻinga ʻa e angamaluú ke tau hoko ʻo anga faka-Kalaisi ange ai.” Ka ʻikai e angamaluú, he ʻikai ke tau lava ʻo fakatupulaki e ngaahi ʻulungaanga mahuʻinga kehé. ʻOku ʻikai ko ha vaivai e angamaluú, ka ʻoku ʻuhinga ia ke angalelei mo angaʻofa, fakahaaʻi ʻa e mālohí, nongá, mahuʻingaʻia ʻiate kitá, pea mo e mapuleʻi kitá.”² ʻI heʻetau ngāue ke fakatupulaki e ʻulungaanga ko ʻení, te tau ʻilo ai hono “hanga ʻe heʻetau fakavaivaiʻi hotau lotó ki he Tamaí, ʻo ʻomi e ivi fakalotoa ʻa e ʻOtuá—ʻa e mālohi ʻo e loto fakatōkilaló. Ko e mālohi ia ke matatali ʻa e ngaahi faingataʻa ʻo e moʻuí, mālohi ʻo e melinó, mālohi ʻo e ʻamanaki leleí, mālohi ʻo ha mafu ʻoku tā ʻi he ʻofá pea mo ha fakamoʻoni ki he Fakamoʻui ko Sīsū Kalaisí, ʻa e mālohi ʻo e huhuʻí.”³