1 U issa ġara li hekk kif Alma kien fi triqtu lejn l‑art ta’ Manti mill‑art ta’ Gidgħon fin‑nofsinhar tal‑pajjiż, araw, hu baqa’ mistagħġeb hekk kif ġie wiċċ imb wiċċ ma’ wlied Mosija li kienu jinsabu fi triqthom lejn l‑art ta’ Żaraħemla.

2 Issa dawn ulied Mosija kienu ma’ Alma meta deherlu l‑anġlu l‑ewwel darba; għalhekk Alma feraħ ferm li kien qed jara lil ħutu; u hu feraħ l‑aktar għaliex huma kienu għadhom ħutu fil‑Mulej; iva, u huma kienu ssaħħu fl‑għarfien tal‑verità; għaliex kienu nies ta’ fehma soda, u kienu fittxew l‑iskrittura bil‑ħrara, biex isiru jafu l‑kelma ta’ Alla.

3 Iżda dan mhux kollox; huma qattgħu ħafna minn ħinhom jitolbu, u jsumu; għalhekk huma kellhom l‑ispirtu tal‑profezija, u l‑ispirtu tar‑rivelazzjoni, u meta għallmu, huma għallmu bil‑qawwa u l‑awtorità ta’ Alla.

4 U huma għaddew erbatax‑il sena jgħallmu l‑kelma ta’ Alla fost il‑Lamaniti, fejn verament irnexxielhom iwasslu lil ħafna għall‑għarfien tal‑verità; iva, bil‑qawwa ta’ kliemhom kienu ħafna li nġiebu quddiem l‑artal ta’ Alla, biex isejħu ismu u jistqarru dnubiethom quddiemu.

5 Issa dawn huma ċ‑ċirkustanzi li ltaqgħu magħhom fil‑vjaġġi tagħhom, għax huma għaddew minn ħafna tbatija; u sofrew ferm, kemm fil‑ġisem u kemm fil‑moħħ, bħall‑ġuħ, l‑għatx u l‑għeja, u huma tqabdu ħafna wkoll fl‑ispirtu.

6 Issa dawn kienu l‑vjaġġi tagħhom: Wara li sellmu lil missierhom, Mosija, fl‑ewwel sena tal‑imħallfin; wara li rrifjutaw is‑saltna li missierhom kien jixtieq jagħtihom, ħaġa li kienet ukoll il‑fehma tan‑nies;

7 Madankollu huma telqu ’l barra mill‑art ta’ Żaraħemla, u ħadu magħhom ix‑xwabel tagħhom, u l‑lanez tagħhom, u l‑qwies tagħhom, u l‑vleġeġ tagħhom, u l‑iżbandoli tagħhom; u huma għamlu dan ħalli jkunu jistgħu jipprovdu l‑ikel għalihom infushom waqt li jkunu fix‑xagħri.

8 U b’hekk huma rħewlha lejn ix‑xagħri flimkien ma’ oħrajn li huma għażlu, biex jitilgħu fl‑art ta’ Nefi, ħalli jxandru l‑kelma ta’ Alla lil‑Lamaniti.

9 U ġara li huma għaddew bosta jiem jivvjaġġaw fix‑xagħri, u qattgħu ħin twil isumu u jitolbu ħalli l‑Mulej jagħtihom ftit mill‑Ispirtu tiegħu biex ikun is‑sieħeb tagħhom, u jgħammar magħhom, ħalli jkunu jistgħu ikunu strument f’idejn Alla biex iwasslu, jekk kien possibbli, lil ħuthom, il‑Lamaniti, għall‑għarfien tal‑verità, biex huma jagħrfu d‑dekadenza ta’ drawwiet missirijiethom, li ma kinux korretti.

10 U ġara li l‑Mulej żarhom permezz tal‑Ispirtu tiegħu, u qalilhom: Qawwu qalbkom. U huma għamlu l‑qalb.

11 U l‑Mulej qalilhom ukoll: Morru fost ħutkom, il‑Lamaniti, u stabbilixxu kelmti; madankollu araw li żżommu l‑paċenzja fis‑sabar u t‑tbatija, ħalli tkunu tistgħu tagħtuhom eżempji tajba permezz tiegħi, u jiena nagħmilkom strument f’idejja għas‑salvazzjoni ta’ bosta erwieħ.

12 U ġara li wlied Mosija, kif ukoll dawk li kienu magħhom, qawwew qalbhom biex imorru fost il‑Lamaniti ħalli jxandrulhom il‑kelma ta’ Alla.

13 U ġara li meta waslu fil‑fruntieri tal‑art tal‑Lamaniti, huma nfirdu u kull wieħed minnhom irħielha għal triqtu, jittamaw fil‑Mulej li jerġgħu jiltaqgħu għal darb’oħra fi tmiem il‑ħsad tagħhom; għax huma kienu jemmnu li l‑ħidma li kienu daħlu għaliha kienet waħda kbira.

14 U bla dubju li kienet waħda kbira, għax huma kienu kkommettew ruħhom li jxandru l‑kelma ta’ Alla lil nies slavaġ u ta’ qalb iebsa u feroċi; nies li kienu jieħdu gost joqtlu lin‑Nefiti, u jisirquhom u jeħdulhom dak li għandhom; u qalbhom kienet marbuta mal‑għana, jew mad‑deheb u l‑fidda, u l‑ħaġar prezzjuż; madankollu huma ppruvaw jiksbu dawn il‑ħwejjeġ billi joqtlu u jisirqu, ħalli ma jaħdmux għalihom permezz ta’ jdejhom.

15 Għalhekk huma kienu nies vera għażżenin, u ħafna minnhom kienu jqimu allat foloz, u kienet waqgħet fuqhom is‑saħta ta’ Alla minħabba d‑drawwiet ta’ missirijiethom; madanakollu l‑wegħdiet tal‑Mulej kienu disponibbli għalihom bil‑kundizzjoni li huma jindmu.

16 Għalhekk, kien minħabba f’hekk li wlied Mosija daħlu għall‑ħidma, biex forsi jkunu jistgħu jwassluhom għall‑indiema; biex forsi jkunu jistgħu jwassluhom ħalli jsiru jafu dwar il‑pjan tal‑fidwa.

17 Għalhekk huma nfirdu minn xulxin, u marru fosthom, kull wieħed telaq għal rasu, skont il‑kelma u l‑qawwa ta’ Alla li ġiet mogħtija lilu.

18 Issa Għammon kien il‑mexxej tagħhom, jew aħjar dak li ħa ħsieb ħtiġijiethom, u huwa telaq minn ħdejhom, wara li berikom skont id‑diversi sejħiet tagħhom, wara li qasam magħhom il‑kelma ta’ Alla, jew wara li ħa ħsieb ħtiġijiethom qabel ma huwa telaq; u b’hekk kull wieħed minnhom irħielha lejn direzzjoni differenti madwar il‑pajjiż.

19 U Għammon mar fl‑art ta’ Ismagħel, l‑art li kienet imsemmija għal ulied Ismagħel, li kienu saru wkoll Lamaniti.

20 U hekk kif Għammon daħal fl‑art ta’ Ismagħel, il‑Lamaniti qabduh u rabtuh, kif kienet id‑drawwa tagħhom li jorbtu lin‑Nefiti kollha li kienu jispiċċaw f’idejhom, u joħduhom quddiem is‑sultan; u b’hekk kienu jħallu f’idejn is‑sultan jekk joqtolhomx, jew iżommhomx bħala lsira, jew jitfagħhomx il‑ħabs, jew ikeċċihomx ’il barra minn artu, skont ir‑rieda u x‑xewqa tiegħu.

21 U b’hekk Għammon ittieħed quddiem is‑sultan li kien isaltan fuq l‑art ta’ Ismagħel; u ismu kien Lamoni; u hu kien ġejt min‑nisel ta’ Ismagħel.

22 U s‑sultan staqsa lil Għammon jekk kellux ix‑xewqa li jgħammar fil‑pajjiż fost il‑Lamaniti, jew fost il‑poplu tiegħu.

23 U Għammon qallu: Iva, nixtieq li għal xi żmien ngħammar fost il‑poplu tiegħek; iva, u possibilment sakemm immut.

24 U ġara li s‑sultan Lamoni kien ferħan ħafna b’Għammon, u ordna li huwa jinħall mill‑ħbula li kien marbut bihom; u ried li Għammon jieħu lil waħda mill‑bniet tiegħu bħala martu.

25 Iżda Għammon qallu: Le, iżda jiena lest inkun il‑qaddej tiegħek. Għalhekk Għammon sar il‑qaddej tas‑sultan Lamoni. U ġara li hu ntalab biex flimkien ma’ qaddejja oħra joqgħod għassa mal‑merħliet ta’ Lamoni, skont id‑drawwa tal‑Lamaniti.

26 U wara li kien ilu tlett ijiem għas‑servizz tas‑sultan, hekk kif kien qiegħed mal‑qaddejja Lamaniti mexjin b’merħliethom lejn il‑post bl‑ilma, li kien jissejjaħ l‑ilma ta’ Sebu, u l‑Lamaniti kollha kienu jġibu l‑merħliet tagħhom hawn, ħalli jkunu jistgħu jixorbu—

27 Għalhekk, hekk kif Għammon u l‑qaddejja tas‑sultan kienu sejrin b’merħliethom lejn dan il‑post bl‑ilma, araw, numru ta’ Lamaniti, li kienu marru biex jisqu l‑merħliet tagħhom, waqfu u xerrdu l‑merħliet ta’ Għammon u tal‑qaddejja tas‑sultan, u tant xerrduhom li spiċċaw ħarbu f’direzzjonijiet differenti.

28 Issa l‑qaddejja tas‑sultan bdew igergru u jgħidu: Issa s‑sultan se joqtolna, kif għamel lil ħutna għax il‑merħliet tagħhom spiċċaw imxerrdin minħabba l‑ħażen ta’ dawn in‑nies. U huma bdew jibku biki kbir, u jgħidu: Araw, merħlietna diġà spiċċaw imxerrdin ma’ kullimkien.

29 Issa huma bdew jibku għax beżgħu li jinqatlu. Issa meta Għammon ra dan qalbu mtliet b’hena mill‑aktar kbira; għax, hu qal, jiena sejjer nuri l‑qawwa tiegħi, jew il‑qawwa li tinsab fija, lil dawn il‑qaddejja sħabi, billi nirrestawra lura għand is‑sultan dawn il‑merħliet, ħalli nkun nista’ nikseb il‑fiduċja ta’ dawn il‑qaddejja sħabi, ħalli nkun nista’ nwassalhom biex jemmnu fi kliemi.

30 U issa, dan hu dak li kien għaddej minn moħħ Għammon, meta beda jara s‑sofferenza ta’ dawk li sejħilhom ħutu.

31 U ġara li huwa beda jgħidilhom ħafna kliem ħelu u qalilhom: Ħuti, agħmlu l‑qalb u ejja mmorru nfittxu l‑merħliet, u niġbruhom flimkien u nġibuhom lura fil‑post bl‑ilma; u b’hekk nippreservaw il‑merħliet għas‑sultan u huwa ma joqtolniex.

32 U ġara li huma marru jfittxu l‑merħliet, u mxew wara Għammon, u għamlu dan b’ħeffa liema bħalha u rnexxielhom idawwru r‑rotta tal‑merħliet tas‑sultan, u għal darb’oħra ġabruhom flimkien ħdejn il‑post bl‑ilma.

33 U dawk l‑irġiel reġgħu marru biex ixerrdu l‑merħliet tagħhom; iżda Għammon qal lil ħutu: Dawwru l‑merħliet dawramejt ħalli ma jaħarbux; u jien immur neħodha ma’ dawn l‑irġiel li xerrdu l‑merħliet tagħna.

34 Għalhekk, huma għamlu kif ordnalhom Għammon, u huwa mar u lesta ruħu biex jeħodha ma’ dawk li kienu jinsabu ħdejn l‑ilmijiet ta’ Sebu; u l‑għadd tagħhom ma kienx wieħed żgħir.

35 Għalhekk huma ma beżgħux minn Għammon, għax ħasbu li wieħed minnhom seta’ joqtlu kif xtaqu huma, għaliex ma kinux jafu li l‑Mulej kien wiegħed lil Mosija li kien sejjer jeħles lil uliedu minn idejhom; u huma lanqas ma kienu jaf dwar il‑Mulej; għalhekk kienu jieħu gost bil‑qerda ta’ ħuthom; u kien għalhekk li huma marru jxerrdu l‑merħliet tas‑sultan.

36 Iżda Għammon mar u beda jitfgħalhom il‑ġebel bl‑iżbandola li kellu; iva, huwa beda jwaddbilhom il‑ġebel tal‑iżbandola b’qawwa kbira; u b’dal‑mod huwa qatel lil xi wħud minnhom tant illi huma bdew jistagħġbu bil‑qawwa tiegħu; madankollu huma mtlew bil‑korla minħabba ħuthom li ġew maqtula, u qatgħuha li jpattuhielu; għalhekk, meta raw li ma setgħux jolqtuh bil‑ġebel tagħhom, qabdu l‑lembubi u marru biex joqtluh.

37 Iżda araw, Għammon spiċċa biex permezz tax‑xabla tiegħu qata’ dirgħajn l‑irġiel kollha li għollew il‑lembuba biex jidorbuh; għax huwa rreżista d‑daqqiet tagħhom billi beda jagħtihom fuq dirgħajhom b’xifer ix‑xabla tiegħu, hekk li huma bdew jistagħġbu, u bdew jaħarbu minn quddiemu; iva, u l‑għadd tagħhom ma kienx żgħir; u hu ġegħelhom jaħarbu bill‑qawwa ta’ driegħu.

38 Issa sitta minnhom spiċċaw midruba permezz tal‑iżbandola, iżda bix‑xabla lil ħadd ma qatel ħlief lill‑mexxej tagħhom; u hu qata’ dirgħajn dawk kollha li għollewha kontrih, u huma ma kinux ftit.

39 U meta huwa ra li kien begħedhom waħda sew, hu reġa’ lura u huma sqew merħliethom u ħaduhom lura fil‑mergħa tas‑sultan, u mbagħad daħlu għand is‑sultan, iġorru d‑dirgħajn ta’ dawk li ppruvaw joqtlu lil Għammon, li ġew maqtugħa permezz tax‑xabla tiegħu; u huma ttieħdu quddiem is‑sultan bħala xhieda ta’ dak li kienu għamlu.