ការបម្រើដោយអស់ពីព្រលឹងរបស់អ្នក
នៅពេលយើងរៀននៅក្នុងបាវចនាម៉្ញូឆលឆ្នាំ 2015 វាគឺជាអភ័យឯកសិទ្ធិដ៏ពិសិដ្ឋមួយដើម្បីបម្រើដល់ព្រះ ។ យើងសង្ឃឹមថា នៅឆ្នាំនេះយើងម្នាក់ៗនឹងរៀនបម្រើដោយមានការតាំងចិត្តដ៏ខ្ពស់តាមរបៀប ដែលព្រះអង្គសង្គ្រោះបានបង្រៀន — ឲ្យអស់ពីចិត្ត អស់ពីពលំ អស់ពីគំនិត ហើយអស់ពីកម្លាំងរបស់យើង ។ តើយើងអាចធ្វើរឿងនោះបានដោយរបៀបណា ? ទាំងនេះគឺជាគំនិតមួយចំនួន ។
ទីមួយ យើងបម្រើឲ្យអស់ពីចិត្តរបស់យើង ។ យើងយល់ថាប្រយោគនេះមានន័យថា ការបម្រើរបស់អ្នកចំពោះព្រះ ត្រូវតែមានការបំផុសគំនិតដោយសេចក្ដីស្រឡាញ់របស់អ្នកចំពោះទ្រង់ និង កូនចៅទ្រង់ ។ « សេចក្ដីស្រឡាញ់របស់យើងចំពោះព្រះអម្ចាស់ត្រូវបានបង្ហាញដោយមនោសញ្ជេតនារបស់យើង ដោយរបៀបដែលយើងចំណាយពេលវេលារបស់យើង ចំណូលចិត្តដែលយើងតាមរក និង លំដាប់នៃអាទិភាពរបស់យើង » ។1 អ្នកអាចបង្ហាញព្រះអម្ចាស់ពីសេចក្ដីស្រឡាញ់របស់អ្នក នៅពេលអ្នកគោរពតាមព្រះបញ្ញត្តិរបស់ទ្រង់ ( សូមមើល គ. និង ស. 42:29 ) ។ អ្នកបម្រើដល់មនុស្សក្នុងផ្ទះរបស់អ្នក ហើយពង្រឹងដល់គ្រួសារអ្នក ។ អ្នកលើកតម្កើងការហៅរបស់អ្នក ហើយឈោងដៃទៅជួយដល់ជនដែលត្រូវការមិត្តភក្ដិ ។ អ្នកស្វែងរកឈ្មោះគ្រួសារដើម្បីយកទៅព្រះវិហារបរិសុទ្ធ ។
ទីពីរ យើងបម្រើព្រះឲ្យអស់ពីពលំរបស់យើង ។ ត្រូវមានកម្លាំងកាយ និង ការខំប្រឹងប្រែងដ៏ឧស្សាហ៍ព្យាយាម ។ កិច្ចការផ្សព្វផ្សាយសាសនាតម្រូវឲ្យមានកម្លាំងចិត្ត និង ការស៊ូទ្រាំ ។ អ្នកបម្រើឲ្យអស់ពីពលំ នៅពេលអ្នកយកចិត្តទុកដាក់នឹងសេចក្តីត្រូវការអ្នកដទៃត្រូវការអ្នក « ដូចជាឲ្យអាហារដល់អ្នកអត់ឃ្លាន ឲ្យសំលៀកបំពាក់ដល់អ្នកអាក្រាត ទៅមើលអ្នកឈឺ ហើយជួយគាំទ្រដល់គេទាំងខាងវិញ្ញាណ និង ខាងសាច់ឈាម » ( ម៉ូសាយ 4:26 ) ។
បន្ទាប់មកទៀត យើងបម្រើឲ្យអស់ពីគំនិតរបស់យើង ។ គំនិតរបស់អ្នកត្រូវតែមានភាពស្អាតស្អំ ហើយបរិសុទ្ធ ផ្ដោតទៅលើព្រះអង្គសង្គ្រោះ ។ អ្នកបានចុះសេចក្ដីសញ្ញាដើម្បីចងចាំទ្រង់ជានិច្ច ។ អ្នកស្វែងរកការដឹកនាំពីព្រះវិញ្ញាណបរិសុទ្ធតាមរយៈការសិក្សាព្រះគម្ពីរ និង ការអធិស្ឋាន ។ កាលណាអ្នកធ្វើឲ្យគំនិត ពាក្យសម្ដី និង ទង្វើរបស់អ្នកស្របទៅនឹងព្រះតំរិះ និង ព្រះទ័យរបស់ព្រះ អ្នកស្គាល់ពីសេចក្ដីត្រូវការរបស់អ្នក ហើយមានភាពសក្ដិសម ព្រមទាំងត្រៀមខ្លួនជាស្រេចដើម្បីបម្រើ ។
ចុងក្រោយបង្អស់ យើងបម្រើព្រះឲ្យអស់ពីកម្លាំងរបស់យើង ។ វិធីមួយដើម្បីទទួលបានកម្លាំង គឺការអនុវត្តសេចក្ដីជំនឿទៅលើដង្វាយធួនរបស់ព្រះអង្គសង្គ្រោះ ។ អ្នកប្រែចិត្ត ហើយញែកខ្លួនអ្នកឲ្យបរិសុទ្ធតាមរយៈការគោរពប្រតិបត្តិតាមព្រះបញ្ញត្តិរបស់ទ្រង់ ។ អ្នកទទួលអារម្មណ៍នូវព្រះចេស្ដាគាំទ្ររបស់ព្រះអង្គសង្គ្រោះ ហើយឃើញនូវអព្ភូតហេតុ កាលណាអ្នកបម្រើនៅក្នុងកម្លាំងរបស់ព្រះអម្ចាស់ ( សូមមើល អាលម៉ា 26:12 ) ។
នៅពេលអ្នកបម្រើព្រះឲ្យអស់ពីព្រលឹងរបស់អ្នក ទ្រង់សន្យាថា អ្នកនឹងត្រូវបានជ្រះស្អាតពីអំពើបាប ហើយរៀបចំខ្លួនឈរនៅចំពោះព្រះភក្ត្រទ្រង់ ហើយទទួលបាននូវសិរីល្អដ៏អស់កល្បរបស់ទ្រង់ ។