ព្រះវិហារបរិសុទ្ធចងភ្ជាប់យើងទៅនឹងព្រះ និងជាមួយគ្នា

ក្នុងគ្រាដ៏សំខាន់ក្នុងជីវិតរបស់យើង យើងអាចពង្រឹងទំនាក់ទំនងរបស់យើងជាមួយព្រះ ហើយទទួលបានពរជ័យពិសេសៗមកពីទ្រង់តាមរយៈសេចក្ដីសញ្ញា ។ សេចក្តីសញ្ញាគឺជាការសន្យាដ៏ពិសិដ្ឋមួយរវាងព្រះ និងបុត្រាបុត្រីរបស់ទ្រង់នៅលើផែនដី ។ ព្រះប្រទានលក្ខខណ្ឌសម្រាប់សេចក្ដីសញ្ញា ហើយទ្រង់ផ្ដល់ជម្រើសឲ្យយើងទទួលយកសេចក្ដីសញ្ញាទាំងនោះ ។ នៅពេលយើងគោរពតាមសេចក្ដីសន្យាដែលយើងបានធ្វើ នោះយើងអាចមានសេចក្ដីជំនឿទាំងស្រុងថា ព្រះនឹងបំពេញសេចក្ដីសន្យារបស់ទ្រង់ចំពោះយើងជានិច្ច ។ ឱកាសដើម្បីមានទំនាក់ទំនងសេចក្ដីសញ្ញាជាមួយព្រះគឺមានសម្រាប់បុត្រាបុត្រីរបស់ទ្រង់ទាំងអស់ ។

សម្រាប់សមាជិកទាំងឡាយនៃសាសនាចក្រ សេចក្ដីសញ្ញាទីមួយដែលយើងធ្វើជាមួយព្រះ ធ្វើឡើងនៅពេលយើងទទួលបុណ្យជ្រមុជទឹក ។ ជារឿយៗ សេចក្តីសញ្ញាធ្វើឡើងតាមរយៈពិធីបរិសុទ្ធដ៏ពិសិដ្ឋ ដូចជាពិធីបុណ្យជ្រមុជទឹកជាដើម ។ ពិធីបរិសុទ្ធគឺជាកិច្ចការដ៏ពិសិដ្ឋមួយ ដែលបានធ្វើឡើងដោយសិទ្ធិអំណាចនៃបព្វជិតភាពរបស់ព្រះ ។ បន្ទាប់ពីពិធីបុណ្យជ្រមុជទឹក យើងទទួលព្រះវិញ្ញាណបរិសុទ្ធតាមរយៈពិធីបរិសុទ្ធមួយទៀត ។ ពិធីបរិសុទ្ធទាំងនេះរួមគ្នា គឺជាការប្តេជ្ញាចិត្តដ៏ពិសិដ្ឋដែលផ្ដល់ឲ្យយើងនូវការចាប់ផ្ដើមថ្មីមួយ ។ អំពើបាបរបស់យើងត្រូវបានអត់ទោសឲ្យ ហើយយើងក្លាយជាសមាជិកនៃសាសនាចក្រនៃព្រះយេស៊ូវគ្រីស្ទ ។ ការរក្សាសេចក្ដីសញ្ញាជាមួយព្រះនឹងពង្រឹងយើងពេញមួយជីវិតរបស់យើង ។

នៅពេលយើងទទួលបុណ្យជ្រមុជទឹក យើងសន្យានឹងព្រះថា យើងនឹងរក្សាបទបញ្ញត្តិរបស់ទ្រង់ បង្ហាញសេចក្ដីស្រឡាញ់ដល់អ្នកដទៃ ហើយលើកដាក់ព្រះនាមរបស់ព្រះយេស៊ូវគ្រីស្ទមកលើខ្លួនយើង ។ ហើយបើយើងធ្វើកិច្ចការទាំងនេះ នោះព្រះសន្យាថានឹងអភ័យទោសដល់អំពើបាបរបស់យើង ប្រទានពរដល់យើងដោយព្រះវិញ្ញាណបរិសុទ្ធរបស់ទ្រង់ ហើយជួយយើងឲ្យត្រឡប់ទៅរស់នៅជាមួយទ្រង់វិញជារៀងរហូត ។

យើងរំឭកសេចក្តីសញ្ញាដែលយើងធ្វើនៅឯពិធីបុណ្យជ្រមុជទឹកឡើងវិញ ជារៀងរាល់ថ្ងៃអាទិត្យនៅឯព្រះវិហារ នៅពេលយើងទទួលទានសាក្រាម៉ង់នៃអាហារចុងក្រោយរបស់ព្រះអម្ចាស់ ( ដែលស្រដៀងនឹងសេចក្តីរួមរួម ឬលៀងបរិសុទ្ធដែរ ) ។ ការដាស់តឿនដ៏ផូរផង់នេះអំពីសេចក្ដីសញ្ញារបស់យើង យកគំរូតាមពិធីសាក្រាម៉ង់ដែលព្រះយេស៊ូវបានណែនាំដល់សាវករបស់ទ្រង់ មុននឹងទ្រង់បានសុគត ។

ព្រះវិហារបរិសុទ្ធខុសប្លែកពីអគារព្រះវិហារក្នុងមូលដ្ឋានរាប់ពាន់កន្លែងដែលយើងធ្វើកម្មវិធីថ្វាយបង្គំថ្ងៃអាទិត្យ និងសកម្មភាពផ្សេងៗទៀត ។ ព្រះវិហារបរិសុទ្ធគឺជាដំណាក់ដ៏ពិសេសរបស់ព្រះអម្ចាស់ និងជាកន្លែងពិសេស និងបរិសុទ្ធដែលបានឧទ្ទិសថ្វាយដល់កិច្ចការដ៏ពិសិដ្ឋបំផុតរបស់ព្រះ ។

បន្ទាប់ពីទទួលបុណ្យជ្រមុជទឹកហើយ សមាជិកពេញវ័យនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ អាចធ្វើសេចក្តីសញ្ញាបន្ថែមជាមួយព្រះនៅក្នុងព្រះវិហារបរិសុទ្ធ ដែលនឹងពង្រឹងទំនាក់ទំនងរបស់ពួកគេជាមួយទ្រង់ ហើយនាំមកនូវពរជ័យកាន់តែច្រើន ។

អំណោយទានពិសិដ្ឋ

ពាក្យ អំណោយទានពិសិដ្ឋ មានន័យថា « អំណោយ » ។ នៅក្នុងពិធីបរិសុទ្ធនៃអំណោយទានពិសិដ្ឋនៃព្រះវិហារបរិសុទ្ធ សមាជិកសាសនាចក្រពេញវ័យរៀនបន្ថែមទៀតអំពីដំណឹងល្អនៃព្រះយេស៊ូវគ្រីស្ទ ។ ពួកគេក៏ចុះសេចក្តីសញ្ញាដ៏ម៉ឺងម៉ាត់ ដែលរួមមានសេចក្តីសន្យា ដើម្បីគោរពតាមបទបញ្ញត្តិទាំងឡាយរបស់ព្រះ និងលះបង់អ្វីៗទាំងអស់ដែលពួកគេមាន និងអ្វីៗគ្រប់យ៉ាងរបស់ពួកគេចំពោះព្រះអម្ចាស់ ។ ជាលទ្ធផល ពួកគេទទួលបានពរជ័យដូចជា ចំណេះដឹងកាន់តែច្រើនអំពីផែនការរបស់ព្រះសម្រាប់សុភមង្គលរបស់យើង អំណាចកើនឡើងដើម្បីធ្វើតាមគំរូរបស់ព្រះយេស៊ូវ និងឱកាសរស់នៅជារៀងរហូតជាមួយព្រះនៅថ្ងៃណាមួយ ។

ការផ្សារភ្ជាប់

សេចក្តីអំណរដ៏អស្ចារ្យមួយនៃដំណឹងល្អរបស់ព្រះយេស៊ូវគ្រីស្ទ គឺការសន្យាថា ចំណងគ្រួសារអាចបន្តហួសពីជីវិតលើផែនដីនេះ ។ នៅក្នុងព្រះវិហារបរិសុទ្ធ ក្រុមគ្រួសារអាចរួបរួមគ្នារហូតដ៏អស់កល្បជានិច្ច ។ អាពាហ៍ពិពាហ៍ក្នុងព្រះវិហារបរិសុទ្ធដ៏ពិសេសនេះត្រូវបានហៅថា « ការផ្សារភ្ជាប់ » ។ ក្នុងអំឡុងពេលនៃពិធីផ្សារភ្ជាប់ក្នុងព្រះវិហារបរិសុទ្ធ កូនកំលោះ និងកូនក្រមុំលុតជង្គង់នៅទីអាសនាទល់មុខគ្នា ដើម្បីចុះសេចក្តីសញ្ញាជាមួយគ្នា និងជាមួយព្រះ ។ ពួកគេសន្យាថានឹងគោរព ហើយស្រឡាញ់គ្នាទៅវិញទៅមកអស់ពីដួងចិត្ត ហើយប្តេជ្ញាចិត្តធ្វើតាមការបង្រៀន និងគំរូរបស់ព្រះយេស៊ូវ ។ ជាលទ្ធផល ពួកគេបានទទួលការសន្យាវិញថា អាពាហ៍ពិពាហ៍របស់ពួកគេ និងគ្រួសាររបស់ពួកគេអាចបន្តមានហួសពីជីវិតនេះ និងរហូតដ៏នៅអស់កល្បជានិច្ច ។

ពិធីបរិសុទ្ធសម្រាប់បុព្វការីជនដែលបានចែកឋាន

យើងជឿលើព្រះដែលពេញដោយសេចក្ដីយុត្តិធម៌ និងមេត្តាករុណាដ៏ឥតខ្ចោះ ដែលមិនដែលបដិសេធបុត្រាបុត្រីរបស់ទ្រង់នូវពរជ័យនៃជីវិតដ៏នៅអស់កល្បជានិច្ច ឬគ្រួសារដ៏នៅអស់កល្បជានិច្ច ដោយសារកាលៈទេសៈដែលពួកគេមិនអាចគ្រប់គ្រងបាននោះទេ ។ ព្រះបានប្រទានមធ្យោបាយឲ្យយើងធ្វើពិធីបុណ្យជ្រមុជទឹក អំណោយទានពិសិដ្ឋ និងការផ្សារភ្ជាប់ជំនួសសម្រាប់បុព្វការីជនរបស់យើង ដែលប្រហែលជាគ្មានឱកាសទទួលមុនពេលពួកគាត់បានស្លាប់ទៅ ។ « ពិធីជំនួស » មានន័យសាមញ្ញថា នរណាម្នាក់ដែលកំពុងរស់នៅអាចដើរតួជាអ្នកជំនួសនរណាម្នាក់ដែលបានចែកឋានទៅហើយ ។ ពិធីពិសិដ្ឋទាំងនេះត្រូវបានធ្វើឡើងតែនៅក្នុងព្រះវិហារបរិសុទ្ធប៉ុណ្ណោះ ។ ព្រោះជីវិតនៅតែបន្ត បន្ទាប់ពីសេចក្តីស្លាប់ នោះយើងជឿថា បុព្វការីជនរបស់យើងអាចជ្រើសរើសទទួលយក ឬបដិសេធការផ្ដល់ជូននេះដែលធ្វើឡើងដោយសេចក្ដីស្រឡាញ់ចំពោះពួកគាត់ ។