តាំងពីជំនាន់បុរាណមក បុរស និងស្ដ្រីបានទទួលយកតន្ត្រីពិសិដ្ឋ ការអធិស្ឋានតាមបែបផ្សេងៗ សម្លៀកបំពាក់ខាងសាសនាដែលមានពេញទៅដោយនិមិត្តសញ្ញា កាយវិការ និងពិធីនានា ដើម្បីបង្ហាញអំពីអារម្មណ៍ភក្តីភាពដ៏ខ្លាំងបំផុតរបស់ពួកគេចំពោះព្រះ ។
ទម្រង់ផ្សេងៗនៃការបញ្ចេញមតិទាំងនេះមានទំហំធំ និងខុសៗគ្នា ដូចជាគ្រួសារមនុស្សដែរ ។ ប៉ុន្តែ មនុស្សទាំងអស់មានគោលបំណងដ៏សំខាន់ដូចគ្នានេះ ៖ ដើម្បីភ្ជាប់រវាងអ្នកជឿទៅនឹងវត្ថុនៃការលះបង់របស់ពួកគេតាមរបៀបផ្ទាល់ខ្លួនបំផុត—ដើម្បីខិតទៅជិតព្រះ ។
ចំពោះអ្នកដែលនៅក្រៅសេចក្ដីជំនឿជាក់លាក់មួយ នោះពួកគេហាក់ដូចជាមិនស្គាល់ពិធីនានា និងសម្លៀកបំពាក់ទាំងនេះទេ ។ ប៉ុន្តែសម្រាប់អ្នកចូលរួមវិញ ពួកគេអាចរំជួលអារម្មណ៍ក្នុងព្រលឹងដ៏ជ្រាលជ្រៅបំផុតដែល ជំរុញឲ្យពួកគេធ្វើល្អ ហើយថែមទាំងបង្កើតជាគន្លងជីវិតមួយដែលពេញដោយការបម្រើទាំងស្រុងផងដែរ ។
សម្លៀកបំពាក់របស់ដូនជី ។ ស្បង់ជីវរបស់លោកសង្ឃ ។ កន្សែងបង់កសម្រាប់ការអធិស្ឋានសាសនាជីហ្វ ។ មួកកន្ដឹបរបស់សាសនាមូស្លីម ។ ស្បង់ពណ៌រមៀតរបស់លោកសង្ឃសាសនាព្រះពុទ្ធ ។ ទាំងអស់នេះគឺជាផ្នែកមួយនៃភាពសម្បូរបែបនៃភក្ដីភាពរបស់មនុស្សចំពោះព្រះ ។
មិនមែនសម្លៀកបំពាក់សាសនាទាំងអស់នេះត្រូវបង្ហាញជាសាធារណៈនោះទេ ។ សម្លៀកបំពាក់មួយចំនួនត្រូវគេមើលឃើញតែនៅកន្លែងថ្វាយបង្គំពិសេសប៉ុណ្ណោះ ។ ឧទាហរណ៍ ស្បៃឆៀងព្រះវិហារបរិសុទ្ធនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែលគេស្គាល់ថាជារ៉ូបនៃបព្វជិតភាពដ៏បរិសុទ្ធនោះ ត្រូវបានពាក់តែនៅក្នុងព្រះវិហារបរិសុទ្ធនៃពួកបរិសុទ្ធថ្ងៃចុងក្រោយប៉ុណ្ណោះ ហើយត្រូវបានរក្សាទុកសម្រាប់ពិធីដ៏ពិសិដ្ឋបំផុតនៃសេចក្ដីជំនឿរបស់ពួកគេ ។ សម្លៀកបំពាក់ពណ៌‑សសាមញ្ញតំណាងឲ្យភាពបរិសុទ្ធ និងភាពស្មើគ្នា ។ អ្នកដឹកនាំសាសនាចក្រចំណាស់បំផុត និងសមាជិកថ្មីបំផុតគឺមើលទៅដូចគ្នាបេះបិត នៅពេលស្លៀកពាក់ដូចគ្នារបៀបនេះ ។ បុរស និងស្ត្រីពាក់សម្លៀកបំពាក់ស្រដៀងគ្នាដែលបង្ហាញអំពីនិមិត្តសញ្ញាខាងសាសនាដែលរំឭកដល់ការអនុវត្តក្នុងព្រះវិហារបរិសុទ្ធ ដូចបានរៀបរាប់នៅក្នុងព្រះគម្ពីរសញ្ញាចាស់ ។
នៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ពុំមានសម្លៀកបំពាក់ខាងសាសនាជាពិសេសណាមួយនៅក្នុងកម្មវិធីថ្វាយបង្គំនៅថ្ងៃអាទិត្យជាទៀងទាត់នោះទេ ។
ទោះជាយ៉ាងណាក៏ដោយ ពួកបរិសុទ្ធថ្ងៃចុងក្រោយដ៏ស្មោះត្រង់ជាច្រើនពាក់សម្លៀកបំពាក់បរិសុទ្ធនៅពីក្រោមសម្លៀកបំពាក់របស់ពួកគេ ដែលវាមានសារៈសំខាន់ខាងសាសនាយ៉ាងជ្រាលជ្រៅ ។ សម្លៀកបំពាក់ខាងក្នុងដ៏សមរម្យនេះមានពីរផ្នែក ហើយជាធម្មតា គេហៅថា « សម្លៀកបំពាក់បរិសុទ្ធនៃព្រះវិហារបរិសុទ្ធ » ។
មនុស្សមួយចំនួនហៅសម្លៀកបំពាក់បរិសុទ្ធនៃព្រះវិហារបរិសុទ្ធនេះទាំងខុសឆ្គងថាមានវេទមន្ដ ឬថាជា « ខោអាវក្នុងវេទមន្ដ » ។ ពាក្យទាំងនេះមិនគ្រាន់តែមិនត្រឹមត្រូវប៉ុណ្ណោះទេ ប៉ុន្តែវាក៏ធ្វើឲ្យសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយអាក់អន់ចិត្តផងដែរ ។ គ្មានអ្វីដែលមានវេទមន្ដ ឬរឿងអាថ៌កំបាំងអំពីសម្លៀកបំពាក់បរិសុទ្ធនៃព្រះវិហារបរិសុទ្ធនោះទេ ហើយសមាជិកសាសនាចក្រស្នើសុំឲ្យមានការគោរព និងការយល់ចិត្តក្នុងកម្រិតដូចគ្នា ដែលនឹងផ្តល់ជូនដល់អ្នកមានជំនឿផ្សេងទៀត មកពីសំណាក់មនុស្សដែលមានបំណងល្អ ។
សមាជិកមជ្ឈិមវ័យនៃសាសនាចក្រ ដែលបានធ្វើការសន្យាដ៏ពិសិដ្ឋនៅក្នុងព្រះវិហារបរិសុទ្ធថានឹងរក្សាព្រះបញ្ញត្តិរបស់ព្រះ និងរស់នៅតាមដំណឹងល្អរបស់ព្រះយេស៊ូវគ្រីស្ទ គឺស្លៀកសម្លៀកបំពាក់បរិសុទ្ធនៃព្រះវិហារបរិសុទ្ធ ។
ចំពោះសមាជិកសាសនាចក្រ ការស្លៀក សម្លៀកបំពាក់បរិសុទ្ធនៃព្រះវិហារបរិសុទ្ធដ៏សមរម្យនេះ ដែលពាក់នៅពីក្រោមសម្លៀកបំពាក់ធម្មតា និងអាវវែងជានិមិត្តរូបដែលពាក់ក្នុងអំឡុងពេលថ្វាយបង្គំក្នុងព្រះវិហារបរិសុទ្ធ វាគឺជាតំណាងឲ្យទិដ្ឋភាពដ៏ពិសិដ្ឋ និងផ្ទាល់ខ្លួននៃទំនាក់ទំនងរបស់ពួកគេជាមួយនឹងព្រះ និងការតាំងចិត្តរបស់ពួកគេដើម្បីរស់នៅក្នុងជីវិតមួយដ៏ល្អ និងមានកិត្តិយស ។
