Tabu Tempol Klos

Stat long ol taem blong bifo, ol man mo ol woman oli bin laekem tabu miusik, ol defren wei blong prea, ol klos blong relijin we i fulap long ol saen, ol aksen, mo ol seremoni blong talemaot ol filing insaed we oli givim long God.

Ol defren kaen wei ia blong talemaot ol samting ia oli bigwan mo oli defdefren olsem famli blong ol man mo woman. Be yet, evri wan oli gat semmak bigfala stamba tingting ia: blong joenem wan we i bilif wetem objek ia we i soem divosen blong olgeta long wei blong olgetawan—blong kam kolosap long God.

Olgeta we oli aotsaed long wan kaen fet olsem, long olgeta, bae oli no luksave ol seremoni mo klos. Be blong olgeta we oli stap tekpat, ol samting ia i save mekem olgeta i gat ol dip siling blong sol, pusum olgeta blong mekem gud, mo mekem gud rod blong olgeta blong givim seves long ful laef blong olgeta.

Kaliko long hed we ol nan oli stap werem. Dres kot we ol pris oli stap werem. Kaliko long hed we Ol Jiu oli stap werem blong prea. Hat we ol Muslim oli stap werem. Kaliko dres we ol Budis monk oli stap werem. Evriwan oli pat blong wan naes wok blong art long kaliko we man i yusum blong soem divosen blong hem long God.

I no evri relijin oli stap soem ol relijin klos blong olgeta long pablik. Sam klos, yu save luk nomo long ol spesel ples blong wosip. Eksampol, ol klos blong tempol blong Jos Ia blong Jisas Kraes blong Ol Lata-dei Sent, we oli save long hem olsem ol klos blong tabu prishud, oli stap werem nomo insaed long ol tempol blong Ol Lata-dei Sent mo oli putum gud i stap blong ol seremoni blong fet blong olgeta we i moa tabu. Simpol waet klos i soem saen blong fasin blong stap klin mo semsemmak. Yu no save luksave eni samting i defren long wan lida blong Jos we oli moa Senia, mo wan memba we i niu nomo, taem oli dresap long semmak fasin. Ol man mo woman oli werem ol semmak klos, we i rimaenem yumi long ol saen blong relijin blong ol tempol praktis we oli tokbaot insaed long OlTesteman.

Insaed long Jos Ia blong Jisas Kraes blong Ol Lata-dei Sent, i nogat wan spesel relijin klos we yu werem aotsaed long ol Sandei wosip seves we i stap hapen oltaem.

Be, plante long ol fetful Lata-dei Sent oli werem wan gamen andanit long klos blong olgeta we i gat wan bigfala mining long saed blong relijin. Ol klos ia we oli werem insaed i gat tu pis mo plante taem oli singaotem olsem “tempol gamen.”

Plante pipol oli stap talem rong se ol tempol gamen oli majik olsem “ol majik smol klos we oli werem andanit long klos.” Ol toktok ia oli no stret mo tu, oli save spolem filing blong ol memba blong Jos Ia blong Jisas Kraes blong Ol Lata-dei. I no gat wan samting i majik abaot ol tempol gamen, mo ol memba blong Jos oli askem semmak level blong respek mo fasin blong kea abaot ol filing we oli givim long eni nara bilif blong ol pipol we oli gat gud fasin.

Ol adalt memba blong Jos oli werem ol tempol gamen, we oli bin mekem ol tabu promes insaed long ol tempol blong obei long ol komanmen blong God mo laef folem gospel blong Jisas Kraes.

Long ol memba blong Jos, tempol gamen we oli werem andanit long ol nomol klos blong olgeta, mo ol klos we i gat saen long hem we oli werem long taem blong wosip insaed long tempol, i ripresentem wan tabu lukluk blong olgetawan abaot rilesensip blong olgeta wetem God mo komitmen blong olgeta blong laef long wan laef we i gud mo i gat ona.