Gikan sa YA Matag Semana
Kon ang mga Butang Murag Dili Maayo, Dad-a ang Imong Kaugalingon ngadto sa “Espirituwal nga Mekaniko”
Ang paghinulsol nahisama sa pag-ayo sa usa ka sakyanan—usahay magkinahanglan ka og usa ka tawo nga eksperto aron matabangan ka.
Sa nag-edad ko og 16, midesisyon ko nga ayohon ang karaang ’67 Mustang sa akong lola. Nagtrabaho sa mga sakyanan kaniadto, apan wala pa sukad niining matang sa makina, ug aduna kini daghang problema. Ang bugtong paagi aron maayo kini mao ang pagtangtang sa makina, bungkagon kini, ug ibalik pag-usab.
Mipalit ko og libro bahin sa pag-ayo sa makina ug gibasa kini sa tulo ka higayon, aron mahibalo sa istruktura. Giayo ug giilisan nako ang tanang karaan nga mga parte, apan sa dihang gipaandar nako ang makina, mi-backfire kini. Sa literal nga paagi—mibuga kini og kalayo.
Mao nga mibalik ko sa pagtuon. Akong nahibaloan nga akong gibutang og balik ang usa ka piraso sa makina nga nabawog, mao nga gitarong nako kini ug gipaandar og balik ang sakyanan.
Niining higayona, ang makina miandar … sa teknikal nga paagi. Apan ang tingog niini makalilisang. Murag, mas misamot kini kaysa niadtong wala pa nako bungkaga ang makina. Nasagmuyo ug nahugno kaayo ko. Naningkamot ko og maayo, apan wala ko masayod kon unsay sayop nga akong nahimo, labi na kon unsaon pag-ayo niini.
Mibati ko nga napakyas ko.
Kon mibati ka nga nagkaproblema—ug tungod kay tawo ra ka, ikaw mibati—ikaw tingali mibati sa samang paagi. Kon makahimo ka og sayop o sala, lisod ang pagkahibalo kon unsaon sa pag-ayo sa imong “espirituwal nga makina.” Salamat na lang, kita adunay mahigugmaong mga lider o “espirituwal nga mga mekaniko” nga makatudlo nato kon kita modangop ngadto sa Manluluwas alang sa pag-ayo.
Walay Butang nga Dili Maayo
Kon kita makasala, ang paghinulsol naglakip sa pag-ila sa unsay atong nahimo nga sayop, paghimo sa kinahanglanon nga mga aksiyon aron makorehian kana, ug dayon pagpadayon sa pagmonitor—sa pagseguro nga ang mga pagkorehir nga gihimo magpabilin.
Sa gihapon, dili kini ingon niana ka yano. Usahay gusto ka nga mag-usab, apan bisan pa sa imong labing maayo nga mga paningkamot, magsige ka og balikbalik sa samang naandan nga batasan. Gani bation nimo nga ang pagbuntog sa imong mga sala imposible.
Apan dili kana tinuod.
Dili ingon nga ikaw dili na gayod mahimong luwason. Bisan gani ang sakyanan sa akong lola, bisan bati kaayo og kondisyon, maayo gihapon.
Nagkinahanglan lang ko og dugang nga tabang.
Gidala nako ang sakyanan ngadto sa usa ka mekaniko nga nahibalo kaayo sa matang sa makina, ug iyang nakit-an ang problema. Giayo niya kini ug gipakita ko niya kon unsaon pag-ayo niini sa umaabot aron moandar ang makina sa saktong paagi. Nahupay gyod ko nga ang proyekto dili pakyas, salamat sa usa ka tawo nga mas dako og kahibalo kaysa nako—usa ka tawo nga makatudlo nako.
Kon ang imong “espirituwal nga makina” murag padulong na nga dili moandar, ang paghinulsol “makadagkot og positibo nga espirituhanong paglambo” ug makahimo nimo sa pagpadayon pag-usab. Ug ang tabang gikan sa mas maalamon nga tinubdan makapakita usab nimo kon unsaon ang eksaktong paghimo niini.
Wala Ka Mag-inusara
Tingali mobati ka og kaulaw o kahadlok sa pagkompisal sa sala ngadto sa imong bishop o presidente sa branch, apan ang mga pagbati og kaulaw dili gikan sa Dios. Si Sister Tamara W. Runia, Unang Magtatambag sa Kinatibuk-ang Kapangulohan sa Young Women, bag-ohay lang mitudlo, “samtang ang Dios naghunahuna mahitungod sa atong mga sayop, Siya labaw nga nagpakabana sa unsay mahitabo human kita nakahimo og sayop.”
Ang pagpangayo og tabang uban sa paghinulsol dili usa ka timailhan sa kahuyang. Usa kini ka timailhan nga ikaw mapaubsanon nga nagsalig sa proseso ug giya sa Langitnong Amahan.
Mao na ngano si Elder Scott D. Whiting sa Seventy miawhag: “Ayaw pagtago gikan niadtong kinsa mohigugma ug mosuporta kaninyo; hinuon, dagan ngadto kanila. Ang maayong mga bishop, mga presidente sa branch, ug mga lider makatabang kaninyo sa paggamit sa makaayo nga gahom sa Pag-ula ni Jesukristo.”
Hunahuna kini niini nga paagi: Sa dihang miadto ko sa usa ka mekaniko alang sa tabang sa makina sa sakyanan, wala niya gipabati nako nga wala koy alamag, gisalikway ko, o misulti nako nga sulbaron kini nga ako ra. Trabaho niya ang pag-ayo sa mga problema sa sakyanan!
Sa samang paagi, trabaho sa bishop ang pagtabang sa mga miyembro sa iyang ward nga mosunod ni Jesukristo, nga naglakip sa paghinulsol. Gani, ang iyang “labing importante nga responsibilidad mao ang bag-ong henerasyon diha sa ward.” Kana naglakip kanimo!
Wala ka maghatag og kabug-at sa imong bishop o presidente sa branch kon ikaw moduol niya alang sa tabang. Ang iyang trabaho dili ang pagsaway nimo o pagsulti nimo nga kinahanglang mas magmaalamon ka. Ang iyang trabaho mao ang pagsuporta nimo ug paggiya nimo ngadto sa mga tinubdan sa espirituwal ug emosyonal nga kalig-on—labi na ngadto sa imong Manunubos.
Usa ka Tawo nga Nakasabot
Bisan kon ang imong bishop wala gayod makasinati sa unsay imong nasinati, si Jesukristo nakasabot, ug Siya makatabang nimo niana nga panagsultihanay. Uban sa Manluluwas, walay butang nga dili maayo.
Nasayod ko nga ang Manluluwas naglakaw uban nako samtang naningkamot ko sa pag-ayo sa akong mga sayop. Siya naghimo niini nga posible alang nako sa pagbuhat nianang kinahanglan nakong buhaton. Mapasalamaton kaayo ko sa giya, direksiyon, ug tabang nga Iyang gihatag nako. Siya naghimo nako sa pagpabilin sa akong “espirituwal nga makina” nga tarong ug nagpadayon diha sa dalan sa pakigsaad, bisan kon usahay adunay mga pagbuga og kalayo subay sa dalan.