Gikan sa Natad sa Misyon
Andam na para sa Tawag: Tambag gikan sa mga Misyonaryo nga Nangandam sa Pagserbisyo
Mihangyo mi sa lima ka misyonaryo aron mangayo sa ilang tambag kon unsaon sa pagpangandam alang sa misyon.
Ang pagpangandam sa pagserbisyo og misyon usa ka makapahinam nga panahon! Nakatutok ka sa pagkat-on sa doktrina ni Jesukristo, magtuon kon sa unsang paagi ang Espiritu makigsulti ninyo, ug maghimo og mental nga pagpangandam sa paghalad sa inyong panahon sa palig-on sa gingharian sa Dios.
Adunay daghang bag-ong butang nga ipahiuyon sa imong misyon, ug samtang dili ka makapangandam sa matag senaryo, adunay mga butang nga imong mahimo nga makapasayon og gamay sa imong transisyon.
Nangayo kami sa ubang mga misyonaryo karon ug kadtong ngangandam sa pagserbisyo kon unsay ilang ikasugyot mahitungod sa pagpangandam sa imong misyon. Kini ang ilang gisulti:
Tinguhaa nga Makaila sa Manluluwas
Unta naningkamot gyod ko nga makaila ni Kristo sa wala pa ang akong misyon. Siyempre nakahibalo ko bahin Niya—nagtubo ko nga nagbasa sa sumbanan nga mga basahon, nga ako ra ug uban sa akong pamilya. Nahibalo ko sa mga estorya ni Jesus ug sa mga tudling sa doktrinal nga kahanas. Mapasalamaton ko nianang espirituhanong kahibalo nga gigahinan nako og tibuok kinabuhi nga pagpangita. Apan kon dunay usa ka butang nga akong mausab sa akong gibuhat sa mga bulan nga nagkaduol na ang akong misyon, mobalik ko ug maningkamot nga makaila sa Manluluwas.
Siya mismo misaad, “Pangita, ug kamo makakaplag” (Mateo 7:7). Samtang mangita kita ni Jesukristo, makita nato Siya diha sa Basahon ni Mormon, sa templo, sa sakramento, ug sa daghang gagmay ug yanong mga paagi nga moduol Siya nato sa matag adlaw. Mas daghan kong nakita nga mga milagro sa akong misyon kay sa akong kinabuhi sa una, ug naghunahuna ko nga ang labing dakong hinungdan mao nga nangita ko ug mas dako ang akong pagpasalamat sa Dios alang niini kay sa kaniadto.
Sister Julia Collings, Hamburg Germany Mission
Adto sa Pagpangandam sa Misyon ug Pagtuon sa mga Kasulatan
Aron mangandam sa akong misyon, mitambong ko sa klase sa pagpangandam sa misyon sa akong ward. Among gibasa ang Isangyaw ang Akong Ebanghelyo ug naghisgot kon unsaon paggamit sa mga baroganan niini.
Dugang pa, akong giseguro ang pagbasa sa Basahon ni Mormon kada adlaw! Migahin sab ko og panahon matag semana sa pagtuon sa Biblia, ilabi na sa Mateo, Marcos, Lucas ug Juan. Gusto nakong makaseguro nga duna koy pagpamatuod sa mga kamatuoran sa ebanghelyo nga akong itudlo ug adunay espirituwal nga pundasyon sa pagtudlo niini.
Elder Rickard DeMille, Orem Utah Mission
Tun-i ang Basahon ni Mormon ug Kat-oni ang Paghigugma sa Uban Pinaagi sa Serbisyo
Ang duha sa labing mahinungdanong mga paagi nga akong giandam sa akong misyon mao ang pagtuon ug serbisyo. Gibasa nako ang Basahon ni Mormon kada adlaw, gani mas labaw pa nga makugihon kay sa una, ug misulay sa pagpangita og mga butang nga nadapat sa akong kinabuhi. Ang mga mensahe niana nga mga pahina maingon og gidirekta deretso ngari nako, ug didtong tungora nakat-onan nako unsa ka dako ang akong panginahanglan sa Pag-ula ni Jesukristo ug unsa Siya ka andam nga mohatag sa Iyang gahom. Ang paggamit sa mga kasulatan magkinahanglan og pagbansay ug kakugi, apan mahangtoron ang ganti niini para nako.
Sunod, serbisyo. Kada tuig, ang daplin sa baybayon nga mga siyudad sa Florida, maigo sa bagyo. Ang mga hangin ug mga baha makahatag og dakong kadaot sa kabtangan, ug kasagaran lisod kaayo o dako og gasto sa mga tawo niini nga mga dapit nga makadawat og dinalian nga hinabang nga ilang gikinahanglan. Dihang 12 anyos ko, wala ko makasabot nganong among igahin ang hinapos sa semana aron maghakot og mga sanga sa kahoy. Ang akong nakat-onan sa akong paghimo niini sa matag tuig mao nga dako kaayo ang kalipay nga makaplagan pinaagi sa pagkugi diha sa pagserbisyo sa laing tawo. Naningkamot gihapon ko nga mahimong mas mahigugmaon, apan nahibalo ko nga kon gikinahalan nako nga mas higugmaon ang usa ka tawo, ang akong gikinahanglan mao ang pagserbisyo kaniya!
Elder Joseph Lowry, Orem Utah Mission
Tun-i ang Isangyaw ang Akong Ebanghelyo ug Tambong sa Templo
Adunay pipila ka sayon nga mga paagi sa pagpangandam alang sa misyon. Una, isugyot nako nga inyong basahon ug tun-an ang kapitulo 3 sa Isangyaw ang Akong Ebanghelyo. Kon nakahibalo na mo unsay inyong itudlo sa dili pa kamo moadto sa nataran, mas makatutok mo kon unsaon pagtudlo niini inubanan sa Espiritu.
Mosugyot ko nga inyong dawaton ang inyong kaugalingong pagtuga ug kanunay nga motambong sa templo kutob sa mahimo. Ang templo motabang nato nga magbaton og mahangtorong panglantaw ug makatabang ninyo nga makatutok ni Jesukristo.
Ang kataposang paagi nga akong isugyot sa pagpangandam alang sa misyon mao ang pagbasa ug pagkahibalo sa Basahon ni Mormon. Kana ang labing mahinungdanong himan sa pagkonekta sa imong kaugalingong ug sa uban ngadto ni Jesukristo sa imong misyon ug sa tibuok nimong kinabuhi!
Elder Rugby Taylor, Everett Washington Mission
Pagpalambo og Sosyal nga mga Kahanas
Aron maandam alang sa misyon, importante ang pagdugang sa imong kahibalo sa ebanghelyo, apan kinahanglan usab nimong andamon ang imong mga kahanas sa pagpakig-estorya og tawo. Mosugyot ko nga magsugod ka sa paggawas sa imong naandan nga hayahay nga nahimutangan pinaagi sa sosyal nga pagpakig-inter-aksiyon. Paningkamoti ang pagpakig-estorya sa mga tawo nga kasagaran dili nimo ika-estorya.
Akong nakat-onan nga ang pagtudlo sa ebanghelyo nagkinahanglan og kahanas sa pagpakig-estorya og mga tawo. Ang sosyal nga mga kahanas nga imong mapalambo ug mapalig-on sa imong misyon maoy makatabang nimo sa umaabot nga panarbaho, pag-date, pag-eskuwela, ug sa imong mga relasyon ngadto sa uban!
Elder Emerson Taylor, Manchester New Hampshire Mission