“Mga Pangutana ug mga Tubag mahitungod sa Kahimsog sa Pangisip” Liahona, Sept. 2025.
Gikan sa YA Matag Semana
Mga Pangutana ug mga Tubag mahitungod sa Kahimsog sa Pangisip
Ang tanan nga dili makiangayon kabahin sa kinabuhi mahimong mapahusto pinaagi ni Jesukristo.
Ang pagkakita og hingpit nga kalipay diha sa ebanghelyo ni Jesukristo samtang nagbalanse sa mga hagit sa kahimsog sa pangisip usahay mahimong bation nga imposible. Ang mga hagit nga lisod kontrolon makapugong nato nga mobati sa impluwensya sa Espiritu Santo, tingali makapangutana ta nganong nagpadayon pa man ta.
Bisan og ang Ginoo wala mopadayag sa tanang tubag sa atong kinasingkasing nga mga pangamuyo, mihatag Siya og giya, tambag, kahupayan, ug paglaom pinaagi sa Iyang mga propeta ug apostoles ug ubang mga lider sa Simbahan.
Ania ang pipila sa ilang dinasig nga mga pulong nga makatubag sa komon nga mga pangutana nga gipangutana sa mga young adult. Kon ang pipila niini nga mga pangutana nakapabug-at usab sa inyong hunahuna, hibaloi nga ang ebanghelyo ni Jesukristo maghatag kaninyo og kalinaw ug paglaom nga walay laing makahimo.
Pagbati sa Espiritu
P: Ang mga hagit ba nako sa kahimsog sa pangisip resulta sa usa ka sala?
T: “Importante nga mahibaloan nga ang [sakit sa pangisip] dili resulta sa kahuyang, ni sagad nga resulta sa sala. … Sa pagtinabangay, mabuntog nato ang mga pagsulay sa pagkahilayo ug ang pagbati og kaulaw busa ang kabug-at sa kaulaw matangtang ug ang mga milagro sa pagkaalim mahitabo.”
Sister Reyna I. Aburto, kanhi Ikaduhang Magtatambag sa Kinatibuk-ang Kapangulohan sa Relief Society, “Sa Dag-um ug Kahayag, Ginoo, Ubani Ako!!,” Liahona, Nob. 2019, 58.
P: Ngano nga wala man ko mahimong mas maayo nga nagbuhat man ko og matarong?
T: “Ayaw paghunahuna nga maayo ra ninyo ang tanan, apan ayoha ang mahimo ninyong ayohon. Kon kadto gamay lang nga mga kalamposan, pagmapasalamaton niini, ug pagmapailobon. Kadaghan nga gibalik-balik diha sa kasulatan, ang Ginoo nagmando sa usa ka tawo nga “tumindog” o “pagmalinawon”—ug magpaabot. Magmapailobon sa paglahutay sa pipila ka butang isip kabahin sa atong mortal nga pagkat-on.”
Presidente Jeffrey R. Holland, Akting nga Presidente sa Korum sa Napulog Duha ka Apostoles, “Sama sa Usa ka Sudlanan nga Nabuak,” Liahona, Nob. 2013, 41.
P: Unsaon nako sa pagkahibalo nga nakadawat ko og mga tubag sa mga pag-ampo nga ang akong kahimsog sa pangisip nakapalisod man sa pagkahibalo niini?
T: “Diha sa daghan nga walay mga kasegurohan ug sa mga hagit nga atong masugatan sa atong kinabuhi, gikinahanglan sa Dios kanato ang pagbuhat sa atong labing maayo, sa pagbuhat ug dili pagaaghaton (tan-awa sa 2 Nephi 2:26), ug sa pagsalig diha Kaniya. … Sa kanunay kita mahimong mopadayon nga nanghinaot ug nag-ampo—apan walay hingpit nga kasegurohan—nga kita naglihok subay sa kabubut-on sa Dios. Apan samtang kita nagtahod sa atong mga pakigsaad ug nagsunod sa mga sugo, samtang kita kanunay gayud nga naningkamot sa pagbuhat og maayo ug mahimo nga mas maayo, makalakaw kita uban ang pagsalig nga ang Dios mogiya sa atong mga lakang.”
Elder David A. Bednar sa Korum sa Napulog Duha ka Apostoles, “Ang Espiritu sa Pagpadayag,” Liahona, Mayo 2011, 90.
P: Unsaon nako nga mobati og hingpit nga kalipay sa ebanghelyo kon ang depresyon nakapahimo niining lisod nga mobati og hingpit nga kalipay?
T: “Kon magsiksik kamo sa pulong sa Dios … ug maningkamot sa pagsubay sa Iyang dalan, masinati ninyo ang ‘kalinaw sa Dios nga dili matugkad sa tawo’ [Mga Taga-Filipos 4:7], bisan sa taliwala sa mga kasub-anan. Bation ninyo ang mas dakong sukod sa dili matugkad nga gugma sa Dios nga motubo sulod sa inyong kasingkasing. Ang kabuntagon sa celestial nga kahayag manuhotsuhot sa mga anino sa inyong mga pagsulay, ug masugdan ninyo ang pagsinati sa dili mahulagway nga mga himaya ug mga katingalahan sa dili makita, hingpit, langitnong ginsakopan. Bation ninyo ang inyong espiritu nga mobayaw kaninyo palayo gikan sa gibug-aton niini nga kalibotan.”
Elder Dieter F. Uchtdorf sa Korum sa Napulog Duha ka Apostoles, “Mas Labaw nga Kalipay,” Liahona, Mayo 2024, 69.
Pag-akses sa Gahom ni Jesukristo
P: Unsaon nako nga makakat-on sa pagsalig ni Kristo nga ako mobati nga dili makasalig sa akong kaugalingon tungod sa akong mga hagit sa kahimsog sa pangisip?
T: “Kon magkat-on kamo og mas daghan mahitungod sa Manluluwas, mas sayon ang pagsalig sa Iyang kaluoy, sa Iyang walay kinutoban nga gugma, ug sa Iyang makalig-on, makaayo, makatubos nga gahom. …
“… Kon ang bisan unsang butang ug si bisan kinsa sa kalibotan nga inyong gisaligan mapakyas man, si Jesukristo ug ang Iyang Simbahan dili gayod mopakyas kaninyo.”
Russell M. Nelson, “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 103, 104.
P: Si Jesukristo nakahibalo ba gayod unsay akong gibati?
T: Tingali walay sakop sa pamilya, higala, o lider sa pagkapari—bisan unsa pa ka sensitibo ug ka maayo ang gibuhat sa matag usa—nga nasayod kon unsa gayod ang inyong gibati o adunay tukmang mga pulong sa pagtabang ninyo nga mamaayo. Apan hibaloi kini: adunay Usa nga makasabot sa hingpit kon unsay inyong gisinati, kinsa ‘mas gamhanan pa kay sa tibuok yuta’ [1 Nephi 4:1], ug si kinsa ‘makahimo sa tanang mga butang sa sukod nga labaw pa gayod kadaghan kay sa [inyong] arang mapangayo o mahunahuna’ [Mga Taga-Efeso 3:20].”
Elder Matthew S. Holland sa Seventy, “Ang Talagsaon nga Kanindot nga Gasa sa Anak,” Liahona, Nob. 2020, 46.
Pagbati sa Gugma sa Dios
P: Nahigugma pa ba gihapon ang Dios kanako bisan og ako adunay mga hagit sa kahimsog sa pangisip?
T: “Tingali adunay usa ka mga tingog sa pagkawala sa kadasig ug kangitngit nga nagpabug-at diha sa inyong mga hunahuna, mga mensahe nga nagsulti kaninyo nga kamo tumang nasamaran ug nalibog, hilabihan ka huyang ug wala matagad, lahi ra kaayo o wala masaari og langitnong gugma sa tinuod nga paagi. Kon kamo makadungog niana nga mga ideya, nan palihog dungga kini: kana nga mga impluwensiya sayop gayod. Kita mahimong masaligon nga mabaliwala sa kagul-anan nga sa bisan unsang paagi dili mopasarang kanato gikan sa langitnong gugma.”
Elder Karl D. Hirst sa Seventy, “Ang Paborito sa Dios,” Liahona, Nob. 2024, 11.
P: Ngano nga dili man kuhaon sa Dios kini nga hagit?
T: “Sa pagpaningkamot alang sa kalinaw ug pagsabot niining lisod nga hilisgotan, importante nga hinumdoman nga kita buhi—ug mipili nga magpakabuhi—sa nalaglag nga kalibotan diin ang atong balaanong mga katuyoan sa tinguha sa pagka-diosnon kanunayng pagasulayan. Ang labing sigurado sa plano sa Dios mao nga may usa ka Manluluwas nga gisaad, usa ka Manunubos, nga pinaagi sa atong pagtuo ngadto Kaniya kita malamposong makabuntog niining mga pagsulay, bisan ang paghimo niini mahimong lisud kaayo para sa Amahan kinsa mipadala Kaniya ug para sa Anak kinsa mianhi sa yuta. Ang pagdayeg lang niining balaanong gugma ang makapahimo sa atong dili kaayo bug-at nga pag-antos nga madala ra sa sinugdanan, dayon masabtan, ug sa kataposan makaluwas.”
Presidente Jeffrey R. Holland, Akting nga Presidente sa Korum sa Napulog Duha ka Apostoles, “Sama sa Usa ka Sudlanan nga Nabuak,” Liahona, Nob. 2013, 40.
Mopili nga Magpakabuhi
P: Kon ako nasayod nga ang sunod nga kinabuhi mas maayo, ngano nga ako magpadayon sa pagpakabuhi karon?
T: “Bisan unsay inyong mga kabalaka o mga kalisod, ang kamatayon pinaagi sa paghikog napamatud-an nga dili maoy tubag. Dili kini makahupay sa kasakit nga inyong gibati nga sa inyong hunahuna kamo ang hinungdan. Dinhi sa kalibotan nga nagkinahanglan gayod sa tanan nga kahayag nga maangkon niini, palihog ayaw pagamyi ang mahangtoron nga kahayag nga gibutang sa Dios sa inyong kalag sa wala pa kini nga kalibotan. Pakigsulti sa uban. Pangayo og tabang. Ayaw gub-a ang kinabuhi nga gibuhisan ni Kristo sa Iyang kinabuhi aron matunhay. Masugakod ninyo ang mga panglimbasog niining mortal nga kinabuhi tungod kay kami motabang ninyo sa pagpas-an niini.”
Presidente Jeffrey R. Holland, Akting nga Presidente sa Korum sa Napulog Duha ka Apostoles, “Ayaw Kabalaka: Salig Lamang!,” Liahona, Mayo 2022, 36.
Bisan unsa pa ang inyong panlimbasog, akong mga kaigsoonan—mental o emosyonal o pisikal o bisan unsa pa—ayaw ibaliwala ang kabililhon sa kinabuhi pinaagi sa pagtapos niini! Salig sa Dios. Hupti ang Iyang gugma. Sayri nga moabot ang adlaw nga ang mga kasakit sa mortalidad mawala.”
Presidente Jeffrey R. Holland, Akting nga Presidente sa Korum sa Napulog Duha ka Apostoles, “Sama sa Usa ka Sudlanan nga Nabuak,” Liahona, Nob. 2013, 42.
Pagsuporta sa mga Minahal
P: Unsaon nako sa pagsuporta sa akong minahal nga nag-atubang og mga hagit sa kahimsog sa pangisip?
Usab, ang pag-edukar sa atong kaugalingon mahitungod sa kakulian sa pangisip magtabang sa atong kaugalingon ug sa uban kinsa tingali nagkalisod. Ang dayag ug ang tinuoray nga diskusyon sa usag usa makatabang niini nga importanteng hilisgotan aron madawat ang pagtagad nga gikinahanglan alang niini. Mao nga, ang impormasyon mag-una sa inspirasyon ug pagpadayag. Kini nga kasagaran kaayong dili makita nga mga hagit makaapekto ni bisan kinsa, ug kon kita nagsagubang niini, hilabihan ka lisod kini nga hunahunaon.
“Usa sa unang mga butang nga kinahanglan natong kat-onan mao nga kita wala gayod mag-inusara. Dapiton ko kamo sa pagtuon sa hilisgotan mahitungod sa kahimsog sa pangisip nga anaa sa Tabang sa Kinabuhi nga seksiyon sa Librarya sa Ebanghelyo nga app. Ang pagkat-on mohatod ngadto sa mas dugang nga panabot, dugang nga pagdawat, dugang nga kaluoy, dugang nga gugma. Makapaminos kini sa trahedya samtang nagtabang kanato nga makaugmad ug makadumala og himsog nga mga ekspektasyon ug himsog nga mga pakig-inter-aksyon.”
Elder Erich W. Kopischke sa Seventy, “Paghisgot bahin sa Kahimsog sa Pangisip,” Liahona, Nob. 2021, 38.
P: Usa sa akong mga minahal namatay pinaagi sa paghikog tungod sa mga hagit sa kahimsog sa pangisip. Unsa may mahitabo kanila?
T: “Adunay karaan nga relihiyoso nga opinyon nga ang paghikog usa ka sala ug nga ang usa ka tawo nga [namatay pinaagi] sa paghikog ibutang ngadto sa impiyerno sa kahangtoran. Kana hingpit gayod nga bakak. Nagtuo ko nga ang kinabag-an sa mga kaso makakaplag nga kini nga mga indibidwal nakapuyo og bayanihon nga mga kinabuhi ug nga ang paghikog dili mao ang importante nga ilhanan sa ilang kahangtoran.”
Elder Dale G. Renlund sa Korum sa Napulog Duha ka Apostoles, “Renlund: Understanding Suicide” (video), Gospel Library.
Pagpadayon ug Paghangad
Ang pipila ka tubag nga gihatag sa Dios kanato lahi kaysa unsay atong gilaoman, ug ang pipila ka tubag dili moabot niini nga kinabuhi. Samtang dili kita makahibalo sa tanan karon mahitungod ngano nga daghan nato nakigbisog sa mga hagit sa kahimsog sa pangisip, kita makaangkon og kahupayan sa saad nga moabot ang adlaw nga kita makabaton og hingpit nga pagsabot sa tanang butang. Ang atong mga paningkamot—bisan unsa pa ka dili mabungahon nga mabati nato usahay—mahimong bililhon tanan (tan-awa sa Mga Taga-Galacia 6:9; Doktrina ug mga Pakigsaad 58:3).
Si Elder Dieter F. Uchtdorf sa Korum sa Napulog Duha ka Apostoles mitudlo: “Ang pagtuo maanindot kay magpadayon kini bisan kon ang mga panalangin dili moabot sama sa gilaoman. Dili nato makita ang umaabot, wala kita mahibalo sa tanang tubag, apan makasalig kita ni Jesukristo samtang magpadayon sa pagtinguha og kalamboan tungod kay Siya ang atong Manluluwas ug Manunubos.”
Samtang kamo ug kadtong inyong gimahal nagsagubang sa mga kalisod sa kahimsog sa pangisip, hinumdomi nga ang tanang dili makiangayon mahitungod sa kinabuhi himoon nga husto tungod ni Jesukristo. Ang pagpadayon sa pagtinguha og kalamboan—uban Kaniya diha sa inyong kiliran, kamo makapadayon inubanan sa paglaom.