Gikan sa YA Matag Semana
Ang Akong Edukasyon Nagtugot Nako sa Pagpili og Kinabuhi nga Puno sa Pagkat-on ug Pagserbisyo
Ang pagbiya sa akong isla alang sa edukasyon makapaugtas ug sobra ka lisod, apan wala gyod koy ikamahay.
Adunay mga higayon nga naghunahuna ko nga ang pagpadayon sa akong edukasyon dili makabawi sa gasto ug sakripisyo.
Mipalayo ko sa akong pamilya aron moeskwela sa unibersidad. Wala ko nagpuyo sa usa ka luwas nga bahin sa siyudad. Ug aduna sa tanang kabalaka nga akong gibati bahin sa akong seguridad ug sa pinasyal, wala ko makabati nga daghan kaayo kog nakat-onan.
Apan mao kini ang akong naamgohan: Wala ko kadto buhata alang sa akong kaugalingon lamang. Ang akong edukasyon mas labaw pa kay sa mahitungod lamang nako ug sa akong mga kasinatian.
Nag-ila sa Akong Kabubut-on
Gikan ko sa Camotes, usa ka gamay nga isla sa Pilipinas. Sa dihang nakadesisyon ko nga mag-eskwela sa kolehiyo aron mahimong magtutudlo, mibalhin ko sa Cebu, usa ka mas dako nga isla nga may gilay-on nga duha ka oras nga biyahe sa bangka.
Ug sa dugay-dugay nga panahon, nabalaka gyod ko bahin sa akong seguridad gikan sa peligro. Daghang krimen ug paggamit sa droga sa dapit nga akong gipuy-an, busa ang pagbiyahe gikan sa akong balay paingon sa kampus kada adlaw usahay mibutang nako sa makapabalaka kaayo ug delikadong sitwasyon, ug wala koy proteksiyon sa akong pamilya.
Atol niini nga panahon, adunay usa ka kinutlo gikan ni Presidente Thomas S. Monson (1927–2018) nga nakapausab sa akong pagtan-aw sa akong sitwasyon: “Ang mga desisyon motino sa atong destinasyon.”
Naghunahuna ko bahin sa tanang lisod nga mga butang nga nahitabo nako, tanan nga mga butang nga dili nako makontrol. Apan sa paglabay sa panahon, nakahunahuna ko nga ako ang mipili niini—akong gipili nga mobiyahe palayo sa akong pamilya ug moeskwela.
Pagpili og Kinabuhi nga Puno sa Pagkat-on ug Pagserbisyo
Kini nga pagkaamgo nakapahunahuna nako ngano nga gihimo ko kini nga pagpili. Ug ang tubag kalit nga miabot kanako: Gusto ko mahimong usa ka lider sa akong branch. Gusto kong mobalik sa akong komunidad nga adunay mas dakong kahibalo. Gusto ko nga tudloan ang mga bata sa Camotes ug awhagon sila nga mangita og mga oportunidad sa pagkat-on nga makatabang usab sa pagpanalangin sa ilang umaabot nga mga komunidad. Mao kini ang kapalaran nga akong gipaningkamotan.
Si Presidente Russell M. Nelson sa makausa nagtudlo: “Ayaw kahadlok sa pagkab-ot sa inyong mga tumong—bisan sa inyong mga damgo! Walay laktoranan ngadto sa pagkamaayo ug pagkabatid. Ang edukasyon mao ang kalainan tali sa paghandom nga makatabang kamo sa ubang tawo ug sa makahimo sa pagtabang kanila.”
Karon natapos na nako ang akong kurso, ug ania na ko nagpuyo balik sa Camotes. Nagtudlo ko sa mga bata sa unang ug ikaduhang grado, ug ako usab ang unang magtatambag sa kapangulohan sa Primary sa akong branch, busa nagamit nako ang akong edukasyon nga labaw pa sa akong gilaoman. Nahibalo ko kon unsaon sa pagpailob niini nga mga bata ug sa pagtudlo nila sa mga baroganan sa ebanghelyo sa paagi nga ilang masabtan. Matag adlaw nagpasalamat ko nga nakahukom ko nga maedukar, bisan kon unsa pa kadto kalisod usahay.
Kung naglisod mo sa pag-eskwela, o sa bisan unsang paagi nahadlok sa inyong kasamtangang sitwasyon, hinumdumi nga magpabiling duol sa Langitnong Amahan ug ni Jesukristo. Makagiya Sila ninyo ngadto sa mga oportunidad nga mopanalangin sa inyong kinabuhi ug makatabang ninyo nga makapanalangin sa uban. Hinumdumi nga wala kamo mag-inusara—Sila nakasabot ninyo, ug mas daghang mga batan-on kaysa inyong nahibaloan ang nakabati sa sama nga mga pagbati ug mga problema.
Ug hinumdumi nga ang inyong mga desisyon motino sa inyong destinasyon. Kamo adunay gahom sa pagpili og kinabuhi nga puno sa pagkat-on ug pagserbisyo.