Gikan sa YA Matag Semana
Ako Nasayod nga Ako Wala Nagkinabuhi sa Labing Maayo sa Akong Kinabuhi—Unsa ang Akong Usbon?
Akong nakaplagan ang pipila ka higala kinsa murag aduna sa unsay kulang sa akong kinabuhi.
Sa halos tibuok sa akong kinabuhi, akong gikonsiderar ang akong kaugalingon nga wala magtuo og Dios (athiest). Ako dili segurado unsay gusto nako sa akong kinabuhi o unsa ang padulngan niini, apan malipayon ra ko.
Apan sa nagsugod na ko sa kolehiyo, nakasinati na ako og mga kalisod ug mga hagit. Dili maayo ang akong mga desisyon. Gibati nako ang kalibog ug kawalay kaseguroan. Mga tuig ang nanglabay, akong nakita pag-usab ang pipila ka higala kinsa mga miyembro sa Ang Simbahan ni Jesukristo sa mga Santos sa Ulahing mga Adlaw. Ako nagtubo uban nila ug kanunay nga malingaw kauban sila, apan wala nako nabati nga ang ilang mga gawi angay alang kanako.
Kon mag-istoryahanay na mahitungod kon kumosta na ang among mga kinabuhi ang ako lang makita mao ang kalipay sa ilang mga panagway. Sila nangaminyo ug adunay mga anak, malamposon ang ilang mga karera, ug labaw sa tanan, makita diha kanila ang ilang kamaayo.
Kon akong makompara ang akong kinabuhi sa ilaha, akong naamgohan nga lahi ang direksiyon sa akong kinabuhi. Ako padulong sa dalan nga dili nako ganahan nga subayon. Gusto ko og adunay kahulogan nga kinabuhi, ug dili ko gusto nga maggukod sa mga butang nga dili magdala kanako og kalipay nga molungtad.
Sa unang higayon, akong nabantayan nga adunay butang nga kulang sa akong kinabuhi.
Ug ako segurado gayod nga kini nga mga higala aduna niana nga kulang.
Ang mga Pagpili Nga Mihimo og Kalainan
Samtang nagsugod ko sa pakig-uban niini nga mga higala pag-usab, akong naamgohan nga wala sila nangita sa kalipay ug kalamposan tungod lamang kay sila mga miyembro sa Simbahan. Apan nakasabot ang akong mga higala sa kahulogan sa kinabuhi ug sa kadasig sa pagpadayon sa pag-uswag. Mahigugmaon kaayo sila ug determinado ug aduna niining walay kataposang kalagsik. Wala ko nakasabot kon unsay nakapahimo nilang magpuyo nga sama niana.
Sa kataposan, bisan pa man, ako nakaamgo sa ilang kadasig sa kinabuhi nga naggikan sa pagsunod sa sukaranang mga baroganan sa ebanghelyo ni Jesukristo. Mao nga nagsugod ko sa pagpangutana, ug ang akong mga higala nag-awhag kanako nga magkat-on pa.
Samtang ako nagkat-on mahitungod sa ebanghelyo, makatingala sa una. Ako walay bisan unsa nga espirituwal nga mga pagtuo nga gipalambo, apan ang mga kamatuoran sa ebanghelyo karon nagsugod na pagkaklaro alang nako. Sa kataposan ako nang nabati nga ang kinabuhi adunay katuyoan.
Si President Russell M. Nelson bag-o lang miingon: “Ang akong desisyon sa pagsunod ni Jesukristo mao ang labing importante nga desisyon nga akong nahimo. … Kana nga pagpili mao ang nakahimo sa tanang kalainan! Kana nga desisyon mihimo sa daghang uban pang mga desisyon nga mas sayon. Kana nga desisyon naghatag kanako og katuyoan ug direksiyon. Nakatabang usab kini kanako nga makalahutay sa mga unos sa kinabuhi.”
Ako usab kanang gibati samtang ako mipili nga mosunod ni Jesukristo ug magpabunyag.
Pagbugkos sa atong Kaugalingon ngadto sa Langitnong Amahan
Sugod nga miapil sa Simbahan, daghan sa akong mga sirkumstansiya wala mausab. Aduna pa gihapon koy daghang pangutana, apan ang akong kinatibuk-ang mga pagbati mahitungod sa kinabuhi lahi kaayo kay sa kaniadto.
Ang pagkat-on mahitungod sa Manluluwas, pagkasayod sa akong diosnong pagkatawo, ug pagkaamgo nga kita wala mag-inusara niini nga panaw nakatabang nako nga mobati nianang sama nga kalinaw ug kusog nga anaa kanunay akong mga higala.
Ako adunay dako kaayong pagsalig sa Langitnong Amahan, ug akong gitamdan ang ideya nga dili igsapayan unsay mahitabo, Siya motabang nako. Samtang ako nagtuman sa akong mga pakigsaad ug naningkamot nga mas mahiuyon uban sa akong diosnong pagkatawo, ako nasayod nga Siya uban kanako sa tanang higayon. Ug kon Siya uban kanako ako walay angay kahadlokan.
Si Presidente Russell M. Nelson mipamatuod: “Ang pagsulod ngadto sa relasyon sa pakigsaad uban sa Dios nagbugkos nato ngadto Kaniya sa paagi nga makapahimo sa tanan mahitungod sa kinabuhi nga mas sayon. Palihog ayaw ako saypa sa pagsabot: Ako wala moingon nga ang paghimo og mga pakigsaad makapahimo sa kinabuhi nga sayon. Gani, paabot og oposisyon, tungod kay ang kaaway dili gusto ninyo nga makadiskobre sa gahom ni Jesukristo. Apan ang pagpakigtambayayong sa Manluluwas nagpasabot nga kamo makagamit sa Iyang kusog ug matubsanon nga gahom.”
Ako naghunahuna nga mao kana ang gipasabot sa pagkinabuhi sa ebanghelyo. Ang ebanghelyo dili makapasayon sa kinabuhi, apan kini makatabang kanato sa paghimo sa kalibotanon ug sa kinabuhing dayon nga gusto sa Dios alang kanato.
Bisan paman sa wala matubag nga mga pangutana, kahadlok mahitungod sa umaabot, akong nakita giunsa sa ebanghelyo paghatag kanato sa mga giya nga atong gikinahanglan aron makapuyo og maayong kinabuhi kutob sa atong mahimo.