Digital Lamang: Mga tubag gikan sa usa ka Apostol
Unsa ang Espirituhanong mga Gasa, ug sa Unsang Paagi Kini Magalihok?
Aniay walo ka nag-unang mga baroganan nga makatabang ninyo sa pagsabot sa espirituhanong mga gasa.
Gikuha gikan sa usa ka pakigpulong nga gihatag atol sa seminar sa pagpangulo sa misyon sa Huwebes, Hunyo 24, 2021.
Gusto nakong tutokan ang walo ka nag-unang mga baroganan nga nagdumala sa pagpadagan sa espirituhanong mga gasa ug sa mga sundanan diin kita mas mahisama sa Manluluwas.
1. Ang Espirituhanong mga Gasa Mahinungdanon
Aron mas masabtan ang relasyon tali sa espirituhanong mga gasa ug sa mga hiyas sa Manluluwas, ang pagsusi sa mahinungdanong mga kamatuoran nga gipresentar diha sa kataposang panamilit ni Moroni makalamdag sa hilabihan (tan-awa sa Moroni 10). Gihatagan og gibug-aton ni Moroni ang lima ka nag-unang mga punto:
-
Ang pagpamatuod sa Basahon ni Mormon nagagikan sa gahom sa Espiritu Santo.
-
Ang mga gasa sa Espiritu ihatag ngadto sa mga matinud-anon.
-
Ang Espirituhanong mga gasa kanunayng pagaubanan og pagtuo.
-
Ang [kang Moroni] nga mga pulong namulong gikan sa abog.
-
Kinahanglan kita nga moduol kang Kristo, magmahingpit diha Kaniya, ug sa ingon mabalaan ang atong mga kalag.
Timan-i palihog nga ang espirituhanong mga gasa mao ang nag-unang mga kinahanglanon ug mahinungdanon sa atong pagduol ngadto sa Manluluwas, nga mapanalanginan sa Iyang mga hiyas, ug mamahimong sama Kaniya.
2. Ang Espirituhanong mga Gasa Ihatag pinaagi sa Espiritu Santo
Ang espirituhanong mga gasa mao ang mga panalangin o mga kapasidad nga gihatag sa Dios ngadto sa Iyang mga anak pinaagi sa gahom sa Espiritu Santo. Ang tanang indibidwal kinsa pinaagi sa tukmang awtoridad ug pagpandong sa mga kamot nakadawat sa gasa sa Espiritu Santo mahimo nga makadawat sa espirituhanong mga gasa. Ang ingon niana nga mga gasa gituyo alang sa “pagpanalangin ug paghatag og benipisyo niadtong mga nahigugma sa Ginoo ug nagtinguha sa pagtuman sa Iyang mga sugo.”
3. Ang Espirituhanong mga Gasa Mao ang Mga Gasa
Ang pangalan mismo nga “espirituhanong mga gasa” nagtudlo kanato og mahinungdanon nga leksiyon. Kining tanan nga gasa hinatag sa Dios sumala sa Iyang kabubut-on ug tukma nga panahon.
Ang Ginoo maoy motino kon ug kanus-a kita makadawat sa tanang espirituhanong mga gasa ug sa Kristohanong mga hiyas. Bisan pa, kinahanglan nga buhaton nato ang tanan sa atong gahom sa pagtinguha ug mamahimong angayan alang sa maong mga gasa. Wala nato maangkon o mapalambo kining mga gasa ug mga hiyas sa kaugalingon natong kusog.
Sa kanunay kinahanglan natong hinumdoman nga ang buhat sa pagdapit sa tanan sa pagduol ngadto kang Kristo usa ka espirituhong buhat. Ang atong katuyoan mao ang espirituwal nga pagbag-o—dili lamang ang simpleng pagpalambo sa kinaiya. Ang tanang makatabang nga mga benepisyo sa personal nga pagdisiplina ug pagtakda og tumong, diha ug sa ilang mga kaugalingon, dili paigo nga itabang kanato aron makadawat sa mga gasa sa Dios ug sa mga hiyas sa Ginoo nga si Jesukristo.
Atong madawat ang espirituhanong mga gasa kon ang Dios makasalig kanato nga makab-ot unsay kinahanglan nato nga maabot, mabuhat ang unsay angay natong buhaton, ug magiyahan sa Espiritu ngadto sa tukmang dapit diha sa tukmang panahon aron kon ang gasa o mga gasa ihatag na, magalihok kini pinaagi kanato sa pagpanalangin sa ubang mga tawo.
4. Angay Kitang Magtutok kang Jesukristo ug Moserbisyo sa Uban
Sa tinuod, kita isip mga indibidwal nakabenepisyo pinaagi sa pagtugyan sa espirituhanong mga gasa ug sa Kristohanong mga hiyas. Apan, ang una natong mga tinguha kinahanglang nakatutok sa pag-alagad sa Dios ug sa Iyang mga anak ug dili sa kaugalingon natong pagtubo ug paglambo.
Ang tukma nga pagtinguha ug ang pagkadawat og panalangin aron makadawat og espirituhanong mga gasa ug Kristohanong mga hiyas, nagkinahanglan nga kita “magtutok kang Jesukristo ug moserbisyo sa uban” ug motan-aw lapas sa atong nakasentro sa kaugalingon nga mga tinguha, mga kabalaka, ug personal nga mga gusto.
Gisugo kita sa pagtan-aw ngadto sa Manluluwas sa matag hunahuna—ug sa dili pagduhaduha ug dili mahadlok. Isip resulta, ang tutokan sa atong buhat kinahanglan nga magtumong ngadto Kaniya ug dili ngari kanato. Kinahanglan nga atong pasalamatan ang Iyang bililhong mga gasa labaw pa kay sa atong pagsalig sa atong tinagsatagsa nga kapasidad. Mapainubsanon kitang moila sa Iyang malumo nga mga kaluoy ug mga panalangin labaw pa kay sa atong pagsalig sa atong tinagsatagsa nga mga talento. Kinahanglan nga maningkamot kita kanunay nga atong malikayan ang pagkabuta nga moabot pinaagi sa “pagtan-aw lapas sa timaan,” gani ang Ginoo nga si Jesukristo. Kinahanglan natong hinumdoman kini sa kanunay, “Amahan, ang imong pagbuot mao ang matuman, ug ang himaya imo sa kahangt[o]ran.”
5. Kinahanglan nga Aduna Kitay Tinuod nga Katuyoan
Dihang gitapos ni Nephi ang iyang pagpanudlo ug pagpamatuod mahitungod sa doktrina ni Kristo, gihatagan niya og gibug-aton ang mahinungdanong mga baroganan alang sa pagdawat sa mga panalangin ug mga gasa sa Espiritu Santo:
“Mao nga, hinigugma kong kaigsoonan, nahibalo ako nga kon inyong sundon ang Anak, uban sa bug-os nga katuyoan sa kasingkasing, sa walay pagpakaaron-ingnon ug walay pagpanglimbong atubangan sa Dios, apan sa tinuod nga katuyoan, maghinulsol sa inyong mga sala, magsaksi sa Amahan nga kamo andam nga modala diha kaninyo sa ngalan ni Kristo, pinaagi sa bunyag— … tan-awa, niana inyong madawat ang Espiritu Santo.”
Niini nga bersikulo, ang bug-os nga katuyoan sa kasingkasing nagsugyot ngari nako sa pagtutok gayod ngadto sa Manunubos ug kaandam nga “itanyag ang [atong] tibuok nga mga kalag,” gani ang atong tibuok nga “kasingkasing, gahom, hunahuna ug kusog,” samtang magkalig-on ang atong pagkadisipulo ug magpadayon kita sa unahan sa dalan sa pakigsaad.
Ang tinuod nga katuyoan nagpasabot sa integridad ug kasinsero sa atong mga motibo, mga tinguha, ug mga buhat.
6. Kinahanglan nga Kita Magsugod ug Magpadayon
Si Oliver Cowdery, kinsa maoy naglihok isip nag-una nga eskriba atol sa paghubad sa Basahon ni Mormon, nakakat-on og bililhong leksiyon mahitungod sa kaimportante sa pagsugod ug sa pagpadayon. Si Oliver nagtinguha nga makabaton og gasa sa paghubad.
Maingon og, gilangay o wala una idayon ni Oliver ang paggamit sa espirituhanong gasa nga iyang nadawat. Busa, gipahimangnoan si Oliver kabahin sa iyang tahas sa buhat sa paghubad.
“Kini tungod kay ikaw wala mopadayon sumala sa imong nasugdan, dihang nagsugod ka sa paghubad, nga akong gikuha kini nga kahigayonan gikan kanimo.”
Ang matarong nga paggamit sa moral nga kabubut-on sa pagdawat og espirituwal nga mga responsibilidad ug gisaad nga mga panalangin nagkinahanglan nga ang matag usa kanato magsugod ug magpadayon. Ang pagsugod gikinahanglan apan dili pa igo. Ang pagsugod nagkinahanglan usab nga magpadayon kita sa paglihok pinasubay sa doktrina ug matinud-anong mopadayon sa unahan.
Ang pagdawat og espirituhanong mga gasa ug Kristohanong mga hiyas nagkinahanglan sa pagsugod ug pagpadayon.
7. Pwede Kitang Mahatagan og mga Hiyas ni Jesukristo
Ang atong espirituhanong pagpakatawo og usab ug paglambo subay sa dalan sa pakigsaad maghimo nga kita mabalaan isip bag-ong mga linalang ni Kristo. Sa kataposan, dayon, kita mao ang nag-unang gitutokan sa buluhaton sa Dios.
Dinhi sa mortalidad kita mapanalanginan ug makadawat og mahinungdanong mga hiyas sa usa ka Kristohanong kinaiya. Sa tinuod, posible alang nato isip mga mortal nga makapaningkamot pinaagi sa pagkamatarong aron madawat ang espirituhanong mga gasa ug kinaiya nga maghimo nato nga makahatag kanato og kapasidad sa paghigugma, pagserbisyo, ug pagpanalangin sa uban.
8. Ang Personal nga Katakos Mao ang Yawe
Ang personal nga katakos mao nga hingpit ug dili ikapuli nga yawe nga maghimo nato nga padayong ikauban ang Espiritu Santo ug madawat ang tanang espirituhanong mga gasa ug Kristohanong mga hiyas.
Palihog timan-i nga akong gigamit ang pulong nga katakos ug dili pagkahingpit. Dinhi sa mortalidad, kita sa karon ug sa kanunay dili perpekto. Dayag lang nga dili posible ang pagkab-ot sa matarong nga pagkaperpekto dinhi sa mortalidad. Apan kita mamahimo ug kinahanglan nga mahimong takos, maglambo, maghinulsol, ug mahimong mas maayo nga tawo.
Malipayon akong mopamatuod nga si Jesukristo mao ang buhi nga Anak sa buhi nga Dios. Siya ang tighatag sa tanang maayo nga mga gasa. Ug nasayod ako nga Siya nabanhaw ug nga Siya buhi.