Digital Lamang: Mga Pagtulun-an sa mga Lider sa Simbahan gikan sa Social Media
Ang Pagkabanhaw ni Jesukristo Nagdala og Paglaom
Tan-awa kon unsa ang natudlo sa mga propeta ug sa ubang mga lider sa Simbahan diha sa social media mahitungod sa pagkabanhaw.
The Resurrected Christ [Ang Nabanhaw nga Kristo], ni Walter Rane
Ang Pasko sa Pagkabanhaw nagsilbi isip usa ka pahinumdom nga kini nga kinabuhi, bisan tuod adunay kataposan, dili mao ang kataposan. Tungod ni Jesukristo, kita pagahiusahon pag-usab sa atong pisikal nga mga lawas ug magkahiusa pag-usab uban sa atong mga minahal. Ang Iyang mahangtorong sakripisyo mao ang labing dako nga paglaom nga anaa atol sa atong mortal nga panaw.
Si Presidente Russell M. Nelson mitudlo:
“Ako mapasalamaton nga ako diha sa panimalay nianang Sabado sa 2005. Ang akong unang asawa, si Dantzel, ug ako nahuman na sa among mga buluhaton sa balay ug nakahukom nga mopahulay sulod sa pipila ka minuto. Kami milingkod sa sopa, naggunitay sa kamot, ug misugod sa pagtan-aw sa usa ka programa sa telebisyon.
“Sa pipila ka gutlo, si Dantzel sa kalit ug sa wala damha malinawon nga mibiya ngadto sa kahangtoran. Ang akong mga paningkamot sa pagbuhi kaniya wala magmalamposon. Ang kakugang ug kasubo misanap kanako. Ang akong labing suod nga higala dul-an sa 60 ka tuig nawala.
“Sa nag-unang napulo ka tuig, nawad-an ako og usa ka anak nga babaye tungod sa kanser. Si Emily 37 anyos pa lamang. Niadtong 2019, nawad-an ako og ikaduhang bililhong anak nga babaye ngadto nianang makalilisang nga sakit. Si Wendy 67 lamang.
“Nianang mga panahon sa pagkanamatyan, unsa ako ka mapasalamaton alang sa akong pagpamatuod kabahin ni Ginoong Jesukristo. Sa Iyang kadaogan ibabaw sa kamatayon, makita nato ang saad sa atong kaugalingon nga pagkabanhaw.
“‘Kanako gikahatag ang tanang kagahom sa langit ug sa yuta’ (Mateo 28:18), ang Manluluwas mipahayag human sa Iyang Pagkabanhaw. Kana nga gahom naglakip sa mga yawe sa Pagkabanhaw. Ako nasayod nga Siya mogamit niadto nga mga yawe sa pagbanhaw ni Dantzel, Emily, ug Wendy, sama nga Siya mogamit niadto nga mga yawe sa pagbanhaw sa ubang tawhanong pamilya.
“Alang sa mga anak sa Dios, ang pagkabanhaw nagpasabot nga ang pagkatigulang, pagkadaot, ug pagkadunot pagawagtangon. ‘Kini nga mortal mahimo nga imortal’ (Mosiah 16:10), ug ‘ang espiritu ug ang lawas pagahiusahon pag-usab diha sa iyang hingpit nga kahimtang’ (Alma 11:43).
“Ang pagkabanhaw naghimo usab nga posible sa laing pagkahiusa—ang pagkahiusa sa mga pamilya. Kita nagpuyo nga naghiusa sa gugma, mao nga kita magbakho kon ang usa ka minahal mamatay (tan-awa sa Doktrina ug mga Pakigsaad 42:45). Apan sama ni Maria Magdalena, kita makahimo sa atong mga luha sa kasubo ngadto sa mga luha sa kalipay samtang kita magpaabot sa umaabot gikan sa panglantaw sa usa ka mahangturong pamilya.”
Ang mga lider sa Simbahan nakapamulong diha sa kinatibuk-ang komperensiya mahitungod sa kang Jesukristo nga Pagkabanhaw. Mipakigbahin usab sila og mga mensahe mahitungod niini nga mga hilisgotan diha sa social media, lakip ang mosunod:
Ang Literal nga Pagkabanhaw ni Jesukristo
[Bidyo]: Sa Pasko sa Pagkabanhaw, kita nakig-uban sa tanang Kristiyanos sa pagsaulog sa literal nga Pagkabanhaw ni Jesukristo. Diha sa Iyang pagpakita ngadto sa Iyang Apostoles human sa Iyang pagkamatay, Siya mipasalig kanila nga dili Siya usa ka espiritu. Sa mga pulong nga gireport ni Lucas, usa ka doktor nianang panahona, miingon si Jesus, ‘Hikapa ninyo ako, ug tan-awa; kay ang espiritu walay unod ug mga bukog, ingon sa inyong nakita nga ania kanako’ [Lucas 24:39].
“Apan ang tanang mortal ba nga adunay lawas mabanhaw? Ang mga kasulatan sa Pagpahiuli naghatag og katin-awan nga naghiusa kanato diha sa lig-on nga pagtuo ug pamahayag nga ang tanan pagabanhawon diha sa usa ka gihingpit nga lawas. Ang Basahon ni Mormon nagtudlo nga ang espiritu ug ang lawas pagahiusahon. Ang modernong pagpadayag naghulagway sa mga anghel isip gibanhaw nga mga personahe kinsa adunay mga lawas nga unod ug mga bukog. Labing piho mao ang mosunod gikan sa Basahon ni Mormon.
“Ang propeta nga si Alma mitudlo, ‘Ang kalag ipahiuli ngadto sa lawas, ug ang lawas ngadto sa kalag; oo ug matag bahin sa lawas ug lutahan ipahiuli ngadto sa iyang lawas; … gani bisan buhok sa ulo dili mawala; [ug] tanan nga butang ipahiuli ngadto sa ilang tukma ug hingpit nga bayanan’ [Alma 40:23].
“Tanan kita adunay usa ka espesyal nga rason sa pagpaabot ngadto sa pagkabanhaw sa usa ka gihingpit nga lawas.”
Presidente Dallin H. Oaks, Unang Magtatambag sa Unang Kapangulohan, Facebook, Abr. 6, 2023, facebook.com/dallin.h.oaks.
Ang Pagkabanhaw usa ka Tinubdan sa Paglaom ug Determinasyon
“Ang usa ka pagpamatuod sa Pagkabanhaw ni Jesukristo usa ka tinubdan sa paglaom ug determinasyon. Siya buhi, ug tungod sa Iyang sakripisyo, kita pagabanhawon ug pagabalaanon. Si Jesus mao ang nabanhaw nga Kristo, atong Manluluwas, ug atong hingpit nga ehemplo ug giya sa kinabuhing dayon. Ako nag-ampo nga unta kita, uban sa atong tibuok nga mga kasingkasing alang sa atong tibuok kinabuhi, mahinumdom sa Iyang sakripisyo ug sa Iyang gugma alang kanato.”
Presidente Henry B. Eyring, Ikaduhang Magtatambag sa Unang Kapangulohan, Facebook, Abr. 4, 2023, facebook.com/henry.b.eyring.
Iyang Paglaom, Iyang Kalinaw, ug Iyang Gugma
“Akong nasaksihan ang kompleto ug hingpit nga kamatuoran sa dili ikatandi nga maulaong sakripisyo sa Manluluwas ug sa Iyang mahimayaong Pagkabanhaw. Samtang atong ipunting ang atong mga kinabuhi dinhi niini nga hunahuna, ako mosaad nga kita mobati sa Iyang paglaom, sa Iyang kalinaw, ug sa Iyang gugma.
“Kon kita sa wala damha mawad-an og usa ka tawo nga atong gimahal, ang kasubo ug kaguol mahimong makasanap.
“Sa naghinapos ang miaging tuig, ang kinabuhi sa malipayong anaa sa unang tuig sa kolehiyo sa Brigham Young University nga si Anna Peterson kalit nga natapos human sa trahedya nga aksidente sa pagsakay sa sled. Si Anna usa ka mapainubsanon, mahigugmaon, ug maluluy-on nga disipulo ni Jesukristo. Mangita siya og mga paagi sa pagtabang sa uban nga mobati sa gugma sa Dios. Sa tinuod, bag-ohay lamang niyang nahuman ang iyang aplikasyon nga mahimong usa ka full-time nga misyonaryo.
“Bisan tuod daghan ang nawad-an og usa ka higala sa dihang namatay si Anna, ang iyang mga ginikanan, sila si John ug si Julie, nawad-an og usa ka maanindot nga kahayag, kinsa ilang giamumahan, giampo, ug gimahal sulod sa 18 ka tuig. Ang pagkamatay sa usa ka anak nga babaye igo na nga molunod ni bisan kinsa sa kaguol. Hinoon, bisan pa sa lawom nga kasakit nga ilang gibati, si John ug si Julie nagpili sa pagsandig diha ni Ginoong Jesukristo.
“Mihangyo ako ni John—kinsa miserbisyo isip usa ka misyonaryo uban kanako sa dihang gipangulohan ko ang France Bordeaux Mission— ug ni Julie sa pagpakigbahin kanako sa ilang mga hunahuna samtang sila nagpadayon sa pagbansay og hugot nga pagtuo diha ni Jesukristo sa atubangan niini nga trahedya. Mao kini unsay ilang gipakigbahin kanako:
“John: ‘Ang kalit ug makapasubo nga pagkamatay ni Anna migisi sama sa dako kaayong samad sa akong dughan. Apan adunay haplas ni Gilead, ug samtang kami misandig ngadto sa pagpasalamat alang sa Pag-ula sa Manluluwas ug sa talagsaon, katingalahang mga higayon kauban ni Anna sa 18 ka tuig, ang malumong mga kalooy nagpuno kanamo sa hilabihan. Kami adunay kalig-on sa pagpadayon.’
“Julie: ‘Wala madugay human sa aksidente ni Anna, ako giaghat sa paghimo sa tema sa among mga paningkamot ‘Dangop ngadto sa Kahayag, ang Atong Manluluwas.’ Samtang kita nakigbahin sa usag usa niini nga mga oportunidad sa pagpili sa kahayag kay sa pagpili sa kangitngit sa pagsagubang, naglig-on kita sa usag usa, ug ang Ginoo nagpas-an kanato diha sa atong kagul-anan. Ako/Kita nagpili sa pagsalig sa Ginoo.’
“Kinasingkasing akong nagdayeg sa hugot nga pagtuo ni John ug ni Julie diha ni Jesukristo. Talagsaon silang mga ehemplo ngari kanako. Atol niining panahon sa Pasko sa Pagkabanhaw, ako magpamatuod nga gibugto ni Jesukristo ang mga higot sa kamatayon, nagtugot sa tanan sa pagpakabuhi lapas pa sa lubnganan, ug, labing importante, nagsaad Siya sa matag usa kanato nga samtang kita nagtuo diha ug nagsunod Kaniya, kita mabuhi uban Kaniya sa kahangturan—oo, sa kahangturan!”
Elder Neil L. Andersen, Korum sa Napulog Duha ka Apostoles, Facebook, Abr. 7, 2023, facebook.com/neill.andersen.
Kamo Makabaton og Pagsalig diha ni Kristo
“Samtang nagsingabot ang Pasko sa Pagkabanhaw, ako nakapamalandong sa usa ka kasinatian sa akong asawa ug kanako diha sa usa sa among bag-ohay nga mga pagbiyahe ngadto sa Central America. Sa among kataposan nga adlaw sa Siyudad sa Guatemala, mitambong kami og usa ka debosyonal diin upat ka stake Primary choir nakigbahin og musical ug verbal nga mga pagpamatuod ni Jesukristo.
“Maanindot, makadasig sa kasingkasing kadto nga miting. Dili gayod nako kalimtan ang kinasingkasing, yano nga pagpamatuod ni Brother Angel Zúñiga. Samtang siya mihatag og usa ka yanong pagpamatuod ni Jesukristo, gibati nako ang usa ka gamhanang saksi diha sa akong kasingkasing nga si Ángel sa tinuod nakaila nga si Jesukristo mao ang iyang Manluluwas. Usa kadto ka higayon nga dili nako daling makalimtan.
“Wala madugay, human sa debosyonal, nakiglamano kami sa matag bata. Usa ka batang lalaki nangutana kanako, ‘Kumusta si Jesus?’ Ako mitubag, ‘Nahigugma si Jesus kanimo, ug Siya adunay pagsalig diha kanimo, ug ikaw makasalig diha Kaniya.’ Kining batang lalaki mitubag uban ang dako, nakahibalo nga pahiyom nga mipuno sa akong kalag og hingpit nga kalipay.
“Samtang kita naghunahuna mahitungod sa unsay gibuhat sa atong Manluluwas alang kanato atol sa semana nga nag-una sa Pasko sa Pagkabanhaw, nagdapit ako kaninyo sa pagpuno sa inyong mga kalag sa kahibalo nga si Jesus nahigugma kaninyo, Siya adunay pagsalig kaninyo, ug kamo makabaton og pagsalig diha Kaniya.”
Elder Dale G. Renlund, Korum sa Napulog Duha ka Apostoles, Facebook, Abr. 5, 2023, facebook.com/DaleGRenlund.
Tungod Kaniya, Kanunay nga Adunay Paglaom
“Ako naglaom nga tanan kamo adunay talagsaong kataposan sa semana nga Pasko sa Pagkabanhaw, kanunay maghinumdom nga ang rason nga kita nagsaulog sa Pasko sa Pagkabanhaw tungod sa maulaong sakripisyo ug Pagkabanhaw sa atong minahal nga Manluluwas. Wala kana, wala Siya, walay rason sa pagsaulog tungod kay walay paglaom alang kanato dinhi niini nga kalibotan o sa kalibotan nga umaabot. Kita kinahanglan kanunay nga maghinumdom Kaniya, tungod Kaniya, kanunay nga adunay paglaom.
“Kanunay nakong nagustohan kini nga kinutlo gikan ni Elder Jeffrey R. Holland: ‘Usa sa dakong mga kahupayan niining kasaulogan sa Pasko sa Pagkabanhaw mao nga tungod kay si Jesus mibaktas sa ingon ka taas, masulub-ong dalan nga hingpit nga nag-inusara, kita dili kinahanglang mobuhat sa mao. … Gipalanog gikan sa kinatumyan sa Kalbaryo ang kamatuoran nga kita dili gayod mapasagdan nga mag-inusara o dili mabuligan, bisan kon usahay atong bation nga kita ingon niana. Sa pagkatinuod ang Manunubos kanatong tanan miingon: ‘Ako dili mobiya kaninyo nga walay kahupayan.’ …
“‘… Samtang kita nagsingabot niining semana santa … unta kita mopahayag sa atong mga kaugalingon nga mahimong mas hingpit nga mga disipulo ni Ginoong Jesukristo, dili sa pulong lamang ug dili lamang sa kislap sa komportable nga mga panahon apan sa buhat ug sa kaisog ug sa hugot nga pagtuo, lakip na kon ang dalan mamingaw ug ang atong krus malisod nga pas-anon. Niining semana sa Pasko sa Pagkabanhaw ug sa kanunay, unta kita mobarog diha ni Jesukristo “sa tanang panahon ug sa tanang mga butang, ug sa tanang mga dapit nga [kita] unta maanaa, bisan hangtod sa kamatayon,” tungod kay sa labing tinuod ingon niana kon giunsa Niya sa pagbarog diha kanato sa dihang kini ngadto sa kamatayon ug sa dihang Siya kinahanglang bug-os nga mobarog ug hingpit nga nag-inusara’ (kinatibuk-ang komperensiya, Abril 2009).
“Akong idugang ang akong pagpamatuod ngadto sa iya nga tungod sa atong Manluluwas nga si Jesukristo, walay usa kanato ang molakaw pa nga mag-inusara. Ingon nga gipamulong og nindot kaayo ni Presidente Camille N. Johnson diha sa iyang pakigpulong sa komperensiya, ‘si Jesukristo ang kahupayan!’ Hinaot nga atong makaplagan kana nga kahupayan pinaagi Kaniya, ug hinaot nga kita matag usa moduol nga makabaton sa atong kaugalingong sigurado nga saksi nga kita karon ni bisan kanus-a dili maglakaw pa nga mag-inusara. Malipayong Pasko sa Pagkabanhaw!”
Sister J. Anette Dennis, Facebook, Abr. 9, 2023, facebook.com/RS1stCounselor.