Paggamit sa Doktrina ug Mga Pakigsaad nganha sa Imong Kinabuhi
Usa ka Leksiyon sa Kasaysayan sa Simbahan Mitudlo Kanako Nga ang Atong mga Kasaypanan Wala Magpaila Kanato
Ang Istorya ni William W. Phelps mitudlo kanako nga ako mapasaylo sa akong mga sala pinaagi sa gugma ug sakripisyo ni Jesukristo.
Ikaw ba sukad nakahimo og sayop nga nanghinaot ka nga imong mabawi? O misulti og usa ka butang nga ikaw nanghinaot nga imong mapapas? O nag-ampo alang sa kapasayloan apan wala mobati ingon og kini igo na?
Kitang tanan nakaagi na niana.
Alang kanako, kini dili talagsaong makaplagan ang akong kaugalingon nga naghangyo sa Langitnong Amahan alang sa kapasayloan. Dihay mga higayon nga gibati ko ang hilabihang kaulaw nga masabtan nga bisan kinsa, bisan ang Manluluwas, makapasaylo kanako.
Sa dihang akong gitun-an ang mga kasinatian sa kasaysayan sa Simbahan, akong naamgohan nga dili lamang ako kinsa mibati niini nga paagi. Nakaplagan ko ang paglaom diha sa istorya ni William W. Phelps, kinsa usa ka tagsulat, misyonaryo, ug lider sa sayong Pagpahiuli. Maayo siya nga tawo. Misangyaw siya sa ebanghelyo bisan asa siya mibiyahe ug nahimong kasaligan nga sakop sa Missouri High Council. Si William usa usab ka suod nga higala ni Joseph Smith.
Mao ngano nga ang iyang pagluib ni Joseph usa ka labing sakit.
Napasaylo Sama sa Anak nga Mausikon
Kaniadtong 1838, mga pundok sa manggugubot nga mga tawo ug mga sundalo miatake ug mitulis sa mga Santos sa Missouri, nagguba sa mga panimalay ug nagbunal sa mga misukol. Sa pagkahuman, si Joseph Smith ug ang ubang mga lider sa Simbahan gidakop sa walay basehanan nga mga krimen. Nahadlok nga ikiha uban kanila, si William W. Phelps ug kauban sa daghan mihimo og kasabotan ngadto sa piskal: mosaksi batok ni Joseph Smith ug gawas nga luwas.
Ubos sa panumpa, si William miuban sa paghatag og bakak nga pagpamatuod batok sa Propeta. Human sa bista, si Joseph ug ubang mga lider sa Simbahan gibilanggo didto sa Bilanggoan sa Liberty. Samtang mibiya si William sa korte nga usa ka luwas nga tawo, gibati niya ang gibug-aton sa iyang mga lihok diha sa iyang mga abaga. Milabay ang daghang katuigan, nadawat ni Joseph Smith ang usa ka sulat gikan ni William nangayo ni Joseph og kapasayloan.
“Ako ingon og ang mausikon nga anak,” misulat si William. “Hilabihan gyod nako ka nawad-an og dungog ug napaubos.”
Misulat og balik ang Propeta, “Tuohan nga ang imong pagkompisal tinuod, ug ang imong paghinulsol kinasingkasing, ako malipay na usab sa paghatag kanimo sa tuong kamot sa pagpakigdait, ug sa paglipay diha sa pagbalik sa mausikon.”
Si Joseph Smith napuno sa kapuangod ngadto ni William. Sama lamang sa amahan nga misaulog sa pagbalik sa mausikon diha sa mga kasulatan (tan-awa sa Lucas 15:11–32), mao usab ang mga Santos sa pagdawat og balik ni William Phelps diha sa panon.
Paghinulsol ug Kapasayloan alang ni William—diin ingon og imposible ngadto kaniya—sa karon usa ka reyalidad. Ug kini mahimo usab nga reyalidad alang kanato!
Si Elder Dieter F. Uchtdorf sa Korum sa Napulog Duha ka Apostoles nangutana kanato:
“Kinsa taliwala kanato wala mahibulag gikan sa dalan sa pagkabalaan, sa binuang naghunahuna nga makakaplag kita og dugang pa nga kalipay sa pagsunod sa atong nakasentro sa kaugalingon nga paagi?
“Kinsa kanato ang wala mobati nga napaubos, nagmasulub-on, ug nawad-an og paglaom nga mapasaylo ug kaluy-an?”
Tingali atong gibati ang hilabihan nga kaulaw alang sa atong mga kasaypanan sa pagtuo nga kita mapasaylo. Si Elder Uchtdorf nagpasalig kanato, “Ang atong Langitnong Amahan modagan ngari kanato, ang Iyang kasingkasing naghingapin sa gugma ug kapuangod.”
Ang Gugma ni Kristo Mas Dako
Giila ni Joseph Smith ang sakit nga gipahamtang ni William: “Kami nag-antos og maayo agi og sangpotanan sa imong gihimo—ang kopa sa apdo, puno na alang ipainom sa mga mortal, sa pagkatinuod puno nga nag-awas sa diha nga ikaw mibatok kanamo.”
Apan si Joseph mipadayon, “Bisan pa niana, ang kopa naimnan na, ang kabubut-on sa atong Amahan nahuman na.”
Giila ni Joseph nga ang mga sala ni William nabayran na ug nga wala nay panginahanglan alang ni William nga mag-antos pa. Ang paghinulsol ni William ngadto sa Langitnong Amahan makapalingkawas kaniya sa sala.
Si Kristo miingon, “Ako nakainom gikan sa pait nga kopa nga gihatag sa Amahan ngari kanako, ug gihimaya ang Amahan sa akong pagpas-an sa mga sala sa kalibotan” (3 Nephi 11:11).
Ang Manluluwas mahigugmaong miatubang sa tanang pag-antos nga gikinahanglan sa pagbayad alang sa atong mga kasal-anan ug mga kasaypanan. Busa kon kita maghinulsol ug gamiton ang buhat nga mag-usab sa atong mga kinabuhi, buot Siya nga kita magpadayon sa unahan uban ang hingpit nga kalipay nga Iyang gisiguro alang kanato. Dili siya gusto nga kita magpabilin diha sa kasakit. Miinom siya “sa mapait nga kopa” aron ang atong kinasingkasing nga paghinulsol mahimong igo na!
Didto sa Getsemani, gibati ni Jesukristo ang tanang pagbudhi, kaulaw, pagpakaulaw, ug kasakit nga pagabation ni bisan kinsa. Walay mga higala diha sa Iyang kiliran, Siya gipadala aron ilansang sa krus. Nahibalo Siya nga ang Iyang sakripisyo gikinahanglan, busa Siya andam sa pagpakamatay alang kanimo ug kanako. Apan sa buntag sa Adlaw sa Pasko, madaugon Siya nga mibangon pag-usab.
Si Presidente Jeffrey R. Holland, Akting Presidente sa Korum sa Napulog Duha Ka Apostoles, miingon, “Usa sa dakong mga kahupayan niining panahon sa Pasko sa Pagkabanhaw mao nga tungod kay si Jesus mibaktas sa ingon ka taas, masulub-ong dalan nga hingpit nag-inusara, kita dili na kinahanglang mohimo pa sa ingon.”
Bisan unsa nga mga kasal-anan o mga kasaypanan ang atong nahimo, ang gugma ni Kristo mas dako. Dili lamang nga Siya motabang kanato sa pagpadayon sa unahan samtang kita sa kinasingkasing naghinulsol, samtang nagkat-on kita gikan ni William W. Phelps, apan Siya makatabang usab kanato sa pagpasaylo sa uban kinsa nakasala kanato, sama sa gibuhat ni Joseph Smith.
Walay mas dakong buhat sa gugma nga nabuhat sa kasaysayan sa kalibotan kay sa Pag-ula ni Kristo. Sama sa mausikon nga anak, ang atong Manluluwas ug ang Langitnong Amahan mohangop kanato sa matag higayon kita mobalik ngadto kanila.
Busa, kon inyong gibati nga kamo lapas nga makab-ot ang kapasayloan, kab-ot ngadto Kanila. Sila anaa naghulat alang kanimo.