Digital Lamang: Mga Young Adult
Ang Balaod sa Kaputli Dili usa ka Babag—Usa kini ka Panalangin!
Ang tagsulat nagpuyo sa Ulaanbaatar, Mongolia.
Maingon og ang mga tawo nga wala magsunod sa balaod sa kaputli mas malipayon kay kanako.
Usa ko ka tawo nga kanunayng kuryuso.
Sa nagtubo ko, duna koy dagkong pangutana kon giunsa sa paglalang ang yuta, giunsa sa pagporma ang kinabuhi sa tawo, ug nganong ania kita niini nga planeta. Dihang akong nakat-onan ug gidawat ang ebanghelyo ni Jesukristo sa edad nga 14, nakakita ko og daghan kaayong tubag ug mas dakong kahulogan sa akong kinabuhi. Naningkamot gayod ako sa pagtuman sa mga sugo sa Dios ug mibati og tinuod nga kalipay sa pagsunod sa ebanghelyo.
Padayon ang akong paglambo sa daghang makalingaw nga paagi—nakaserbisyo ko og misyon, nakaeskwela og unibersidad, ug daghan pa. Apan dihang nag-30 anyos ko, nawad-an ko sa kadasig nga wala na koy opotunidad nga maminyo. Bisan og nakakita ko og daghang tawo libot kanako nga nagpili sa pagpakabuhi supak sa balaod sa kaputli, lig-on ko sa akong pasalig sa pagtuman sa akong mga pakigsaad ug pag-andam alang sa kaminyoon sulod sa templo.
Mituo ko nga ang kalipay naggikan sa pagkamasulondon (tan-awa sa Mosiah 2:41). Apan dihang gitan-aw nako ang naglibot nakong mga higala kinsa mipili nga dili motuman sa balaod sa kaputli, ingon og mas malipayon sila kay kanako. Aduna silay bag-ong mga kasinatian sa papakig-date ug mga relasyon, ug akong gibati ang pagkawalay kaangayan. Isip usa ka kuryuso ug edukado kaayo nga tawo, nasagmuyo ko nga ang akong mga higala karon ingon og mas maalamon ug mas hingkod kay kanako.
Ang mga sugo nagsugod nga daw dili na dako nga panalangin ug mas dako na hinoon kini nga babag nga nagpugong kanako sa pagpakabuhi og labing maayo nga kinabuhi.
Natintal ko nga kalimtan ang ideya mahitungod sa pagminyo sa templo ug sa nakasentro sa ebanghelyo nga kinabuhi human sa usa ka panahon. Ang balaod sa kaputli ingon og lisod na kaayong sundon kon palibotan ako sa kalibotan nga walay panglantaw sa pisikal nga paghigugmaay sama sa akong panglantaw.
Magtutok sa “Ngano”
Dihang labihan ang akong panlimbasog, ang akong titser sa institute mipakigbahin og usa ka istorya mahitungod sa pagdapit og mga misyonaryo sa usa ka panihapon. Gipakigbahin niya kon giunsa sa iyang pamilya sa pag-andam ug pag-apil sa espirituhanong pagpamalandong nga gipakigbahin sa mga misyonaryo.
Niana nga panahon, akong naamgohan nga labaw pa kay sa bisan unsang butang, gusto kong mopadako og usa ka pamilya nga dungan nga makatagamtam sa mga panalangin sa ebanghelyo.
Nahimong tin-aw ang tanan. Ang balaod sa kaputli dili usa ka babag nga mopugong nako aron makasinati sa gasa sa sekswalidad—usa kini ka panalangin nga mapadayon nako ang pagpunting sa templo ug sa akong mahangtoron nga pamilya.
Si Elder Dieter F. Uchtdorf sa Korum sa Napulog Duha ka Apostoles mitudlo: “Sayop ba nga dunay mga lagda? Sa tinuod dili. Kita nagkinahanglan niini matag adlaw. Apan sayop nga motutok lamang sa mga lagda imbis nga motutok sa Manluluwas. Kamo kinahanglan nga makahibalo sa mga ngano ug sa mga giunsa, ug dayon mohunahuna sa mga sangpotanan sa inyong mga pagpili.”
Dihang akong nahinumdoman ang Manluluwas ug ang Iyang sakripisyo alang nako, mihukom ko nga ang mga panalangin sa pagtuman sa mga pakigsaad, lakip sa balaod sa kaputli ug pagkaminyo sulod sa templo, takos gayod sa pagpaabot. Ang tinuod nga kalipay wala magpasabot nga buhaton ang bisan unsay imong gusto. Mahitungod kini sa pagkahimong takos sa pagpakig-uban sa Espiritu Santo.
Posibling dunay ubang higayon diin mobati kita nga matental sa pagsupak sa atong mga pakigsaad. Ang pagsunod sa ebanghelyo dili sa kanunay sayon! Apan ang mga pakigsaad nga atong gihimo ug ang mga sugo nga atong gituman gipahimutang sa atong mapinanggaong Langitnong Amahan aron maseguro ang labing maayo kanato. Makasalig kita nga Siya mas labing nasayod kay kanato ug nga ang pagsunod Kaniya kay sa kalibotan kanunayng maghatag kanato og kalipay.
Mosalig sa Tukmang Panahon sa Dios
Mapasalamaton ko nga bag-ohay lang nahigugma ako sa usa ka tawo ug nakasal sa templo. Nalipay ko nga nagmapahinungoron ko sa pagsunod sa mga sugo mao nga karon akong natagamtam ang mga panalangin sa mahangtoron nga kaminyoon.
Siyempre, ang kamasulondon wala maglihok sama sa vending machine. Dili lamang kita makadawat og pihong mga panalangin diha dayon human nga magtuman sa usa ka sugo. Sama sa giingon ni Elder Jeffrey R. Holland Akting nga Presidente sa Korum sa Napulog Duha ka Apostoles, miingon, “Ang ubang panalangin moabot dayon, ang uban dugay, ug ang uban dili moabot hangtod didto na sa langit; apan alang niadtong modawat sa ebanghelyo ni Jesukristo, moabot kini.”
Duna koy pagpamatuod nga ang Dios nakaila sa matag usa kanato ug moamuma Siya kanato. Bisan og lisod ang mobati og kawalay kaseguroan o pagkahimong lahi sa uban gikan sa imong mga kaedad, labi na sa dili putli nga kalibotan, mituo ko nga “sa tanang butang ang Dios nagbuhat sa maayo ngadto kanila nga mga nahigugma Kaniya” (Mga Taga-Roma 8:28). Nasayod ko nga ang tinuod, molungtad nga kalipay moabot dili lang sa pagsunod sa mga sugo sa Dios apan sa pagpalambo og usa ka relasyon uban Kaniya.