Digital Lamang
Pagkaplag og Kaisog sa Pagbuhat og Maayo
Ang pagpugas og kamaayo ug kamabination kanunayng mosangpot sa mas maayo ug mas malipayong komunidad.
Nganong mahadlok man kong mohimo og maayo? Bisan sa kaugalingon nakong ward?
Para nako, tanan kini naggikan sa pagbati og kawalay kaseguroan. Unsa kaha kon nakasamok ko sa mga tawo pinaagi sa pagpaningkamot nga makapangalagad kanila? Unsa kaha kon ang tanan dunay igong mga higala ug dili ingon ka interesado nga mahimo nakong higala?
Ug kay nasayod ko nga nagkulang ko, usahay gamiton nako ang kahadlok aron dasigon ang akong kaugalingon sa pagbuhat og mas maayo. “Wala ka mahimo nga maayong disipulo,” miingon ko sa akong kaugalingon. “Wala kay pagpakabana sa uban.”
Dili ikatingala, kini nga paagi dili ingon niana ka mapuslanon kanako sa pagbuhat og maayo.
Tan-awa ang Dios sa Matag Hunahuna
Busa unsaon nato sa pagkaplag og kaisog sa pagbuhat og maayo?
Ang Doktrina ug mga Pakigsaad 6:33 nagtudlo, “Ayaw kahadlok sa pagbuhat og maayo, akong anak nga mga lalaki, kay bisan unsa ang inyong ipugas, kana usab ang inyong maani; busa, kon magpugas kamo og maayo kamo usab moani og maayo alang sa inyong ganti.”
Ganahan ko niini nga kasulatan. Nakatabang kini nga akong mabuntog ang akong kaugalingon ug makaamgo nga dili tanang pagpaningkamot sa pagtabang ug pagpakighigala sa uban mosangpot sa maayong pakighigalaay, ang pagpugas og kamaayo ug kamabination kanunayng moresulta sa mas maayo ug mas malipayong komunidad. Nakatabang kini nga akong mapadaplin ang akong mga kahadlok ug imbes niana “[mo]tan-aw ngadto [sa Ginoo] sa matag hunahuna” (Doktrina ug mga Pakigsaad 6:36).
Ang Hingpit nga Gugma Nagahingilin sa Kahadlok
Kon makaplagan nato ang atong kaugalingon nga nahadlok ug nagkinahanglan og kadasig sa paghimo og maayo, atong masunod kini nga tambag gikan ni Elder Dieter F. Uchtdorf sa Korum sa Napulog Duha ka Apostoles: “Kon atong makita ang atong kaugalingon nga nagpuyo sa kahadlok o kabalaka, … mag-ampo ko uban sa tanang kusog sa akong kalag nga makalingkawas kita gikan niini nga kahadlok pinaagi sa balaanong gitakda nga tambal sa kahadlok: ang tiunay nga gugma ni Kristo, kay ang ‘hingpit nga gugma nagahingilin sa kahadlok’ [1 Juan 4:18].”
Kon nagkinahanglan ka og kalig-on sa pagbuntog sa imong kahadlok ug motabang niadtong anaa sa imong palibot, sultihi ang Langitnong Amahan. Hangyoa Siya nga ipahulam diha kanimo ang Iyang hingpit nga paghigugma. Kay kana nga gugma makatabang nimo sa paglakaw uban sa “maisugong pagsalig isip mga sumusunod sa atong pinalanggang Manluluwas.”