Digital Lamang: Mga Young Adult
4 ka Paagi nga Ako Nagbuntog sa Akong mga Kahuyang pinaagi ni Kristo
Ang tagsulat nagpuyo sa Bogotá, Colombia.
Ako naningkamot sa pagbuntog sa akong mga kahuyang pinaagi sa tabang sa Manluluwas.
Kaniadto naghunahuna ko nga kinahanglan nakong tarongon ang tanan nakong kahuyang sa samang higayon.
Sa dihang ako nagserbisyo isip usa ka misyonaryo, nakigbisog gayod ako niini nga panghunahuna. Nakig-istorya ko sa akong presidente sa misyon mahitungod sa akong mga gibati.
Siya mipahinumdom kanako sa usa ka kamatuoran nga dili gayod nako makalimtan. Among gibasa ang Ether 12:27 og dungan: “Ako mohatag sa mga tawo og kahuyang aron sila magpaubos; ug ang akong grasya igo alang sa tanang tawo nga magpaubos sa ilang mga kaugalingon sa akong atubangan; kay kon sila magpaubos sa ilang mga kaugalingon sa akong atubangan, ug magbaton og pagtuo ngari kanako, niana akong himoon ang mahuyang nga mga butang nga malig-on ngadto kanila.”
Kini nga kasulatan nakatabang nako nga makasabot nga pwede ko nga mag-usab. Nagdesisyon ko nga magsugod sa usa lang ka butang ug mohatag sa Ginoo og panahon nga usbon ang akong mga kahuyang ngadto sa mga kalig-on.
Ang mga Butang nga Nakatabang Nako nga Magpadayon sa Pagpaningkamot
Usa sa akong labing dakong gipakigbisogan sa wala pa ko magmisyon mao ang pagtan-aw og pornograpiya, ug ako determinado nga dili na mobalik sa akong naandan sa pornograpiya human ko mopauli. Apan subo lang, nagpadala na usab ako niana nga tentasyon.
Mibati ko og kamiserable. Makamata ko og magabii, naghunahuna mahitungod sa tanang sayop nga akong nahimo. Apan taliwala sa tanang kasakit, samtang ako nag-ampo alang sa tabang ug kapasayloan, gibati nako kanunay ang Espiritu nga nagpahinumdom kanako sa usa ka yano nga kamatuoran: pinaagi sa Manluluwas, ang akong kahuyang pwedeng mahimong mga kalig-on. Dili ko kinahanglan nga hukman tungod sa akong mga kahuyang.
Samtang ako nagpadayon sa pagdangop ngadto sa Ginoo alang sa tabang, akong nakat-onan ang upat ka bililhong leksiyon nga nakatabang nako nga magpadayon sa pagpaningkamot:
-
Kon kita mas mopaduol sa Manluluwas, makabati kita og kalinaw.
Ang pagtuon sa mga kasulatan nakatabang kanako nga mas mahigugma ni Jesukristo. Ug ang pagtuon sa mga mensahe sa kinatibuk-ang komperensiya mahitungod sa paghinulsol ug sa Pag-ula sa Manluluwas kanunay nga nagtabang nako nga makasabot nga walay bisan unsa niining panaw sa kalibotan ang dili Niya maayo o masabtan. Kita makaduol Kaniya sa tibuok natong proseso sa pagkaayo ug sa atong mga paningkamot nga molambo.
-
Ayaw kahadlok nga makig-istorya sa imong bishop mahitungod sa imong mga kahuyang.
Hinumdomi, ang atong mga bishop gi-set apart ug naghupot sa mga yawe sa pagkapari nga makatabang kanato nga mapalawman ang atong koneksiyon ngadto sa Manluluwas ug maka-akses sa Iyang Pag-ula. Sila makatabang kanato nga mapagaan ang atong mga palas-anon ug makakaplag sa tabang nga atong gikinahanglan aron mabuntog ang atong mga kahuyang.
Si Presidente Jeffrey R. Holland, Akting nga Presidente sa Korum sa Napulog Duha ka Apostoles, nagtudlo sa mga young adult nga “ang paghinulsol mao ang paagi nga kita makakuha og bag-o nga pagsugod; … Ang kinabuhi lisod na daan nga wala pa magkarga og putos sa mga kasaypanan diha sa inyong luyo—tibuok adlaw, matag adlaw, tibuok gabii, matag gabii. Idiskarga kana. … Si Kristo mihatag sa Iyang kinabuhi mismo aron nga kamo mahimong gawasnon sa pagbuhat niana.”
-
Pangita og propesyonal nga tabang kon nagkinahanglan ka og dugang nga tabang.
Pinaagi sa pagbisita og psychologist, ako nakadawat og medikal nga tabang ug mga himan nga nakatabang nako nga makamugna og mas maayo nga mga gawi. Gibati nako ang Ginoo nga nagtabang nako nga madasig ug makaangkon sa kalig-on nga mobuhat sa mga butang nga kaniadto abi nako og lisod kaayo.
-
Mogahin og panahon sa balaan nga mga dapit.
Ang pagtambong sa institute, pagsimba diha sa templo, ug pag-adto sa simbahan nakatabang nako nga makatutok sa Manluluwas ug kon unsa ang Iyang mabuhat alang kanako. Kon ikaw magbarog sa balaan nga mga dapit, imong mapalawman ang imong koneksiyon ngadto sa Manluluwas ug sa Iyang makapalugway ug makaayo nga gahom.
Ang Ilang mga Bukton sa Kaluoy Gitunol ngadto sa Matag Usa Kanato
Sa pagtudlo mahitungod sa paghimo og mga kausaban sa atong kinabuhi, si Elder Neil L. Andersen sa Korum sa Napulog Duha ka Apostoles nagtudlo, “Uban sa panahon, kita mobati sa kasakit sa atong kasubo nga nag-anam og kawala, ‘motangtang sa mga kasaypanan gikan sa atong mga kasingkasing’ [Alma 24:10] ug magbaton og ‘kalinaw sa tanlag’ [Mosiah 4:3].”
Bisan kon ako nagkat-on pa sa pagdumala sa akong mga kahuyang, ako nakahibalo nga ang Ginoo nakabantay sa akong inadlaw-adlaw nga mga paningkamot. Mao nga ako nagpadayon sa pagtutok sa kada adlaw nga paghinulsol, pagtuman sa akong mga pakigsaad, ug pagpadayon sa unahan.
Ang akong paglaom ug hugot nga pagtuo anaa sa Manluluwas. Wala ko kahibalo kon kanus-a nako hingpit nga mabuntog ang akong kahuyang sa pornograpiya, apan usa ka butang nga akong nahibaloan mao nga kon ako padayon nga maningkamot sa paglikay niini ug maghinulsol kon ako maglisod, dili ko hikawan sa bisan unsang panalangin. Sama sa gitudlo ni Brother Bradley R. Wilcox, Unang Magtatambag sa Kinatibuk-ang Kapangulohan sa Young Men: “Ang pagkatakos dili ang pagkawalay tatsa. Ang pagkatakos mao ang pagkahimong matinuoron ug mapaningkamoton.”
Ang Langitnong Amahan nahigugma kanato, ug si Jesukristo mao ang atong tabang ug kahupayan. Kita mahinungdanon ngadto Kanila. Sila nakahibalo sa atong mga kalisod ug mga kasakit, ug ang Ilang mga bukton sa kaluoy gitunol alang sa matag usa kanato. Ako mapasalamaton alang sa akong kahigayonan nga mahulma ug mahigugma sa Dios ug sa Iyang Anak.
Tugoti si Jesukristo nga motabang nimo sa imong kasakit. Dawata ang Iyang koreksiyon ug direksyon. Ug hinumdomi nga Siya hingpit nga nahigugma kanato.
Pinaagi Kaniya, kita makakaplag og pagkaayo ug kapasayloan.