1 Ia sa vakakina na nodatou sa na vakacavara na buli ni lomalagi kei na vuravura, kei na veika kecega sa tu kina.

2 A ratou sa veivosaki vakataki iratou na Kalou ka kaya: Ena ^aikavitu ni gauna edatou sa na tinia kina na nodatou cakacaka, me vaka na nodatou veivosaki; ka datou na vakacegu ena kavitu ni gauna mai na nodatou cakacaka kecega me vaka na nodatou veivosaki.

3 Eratou sa vakacegu na Kalou ena ikavitu ni gauna; baleta ena ikavitu ni gauna eratou na ^avakacegu kina mai na nodratou cakacaka kecega me vaka eratou (ko iratou na Kalou) sa lewa vata me ratou cakava; ka ^bvakatabuya. Ia sa vakaoqori na nodratou lewa ena gauna eratou a lewa vata kina me ratou bulia na lomalagi kei na vuravura.

4 A ratou sa ia na Kalou ka bulia na veitagede oqo ni lomalagi kei na vuravura, ena gauna era a buli kina ena siga eratou bulia kina na vuravura kei na lomalagi na Kalou.

5 Me vaka na veika kece sara eratou sa tukuna me baleta na kau kecega ni vanua ni sa bera ni tu e vuravura, kei na co kecega ni vanua ni sa ^abera ni tubu; a ratou sa sega ni vakatauca na uca ki vuravura na Kalou ena gauna eratou a bosea kina na ka me caka, a sa sega tale ga ni buli na tamata me teivaka na vanua.

6 Ia sa kuvu cake na kabukabu mai na qele, ka vakasuasuataka na dela ni vanua taucoko.

7 A ratou sa bulia na tamata na ^aKalou mai na ^bkuvu ni qele, ka taura na ^cyalona (ko ya, na yalo ni tamata), ka biuta ki vua; ka ceguva ki qara ni ucuna na icegu ni bula, ka sa yaco kina me ^dtamata bula.

8 A ratou sa tea na Kalou e dua na were, mai natuicake mai ^aIteni, ka ratou sa vakatikora kina na tamata, io na yalona eratou a vakacuruma ki na yago eratou a bulia.

9 Eratou sa vakatubura mai na qele na Kalou na kau kecega sa rairai vinaka ka yaga me kakana; na ^avunikau ni bula talega, ena loma ni were, kei na kau sa kilai kina na ka vinaka kei na ka ca.

10 A sa drodro e dua na uciwai mai Iteni, me vakasuasuataka na were; a sa wase mai kea ka yaco me va na kena idavedave.

11 Eratou sa kauta na tamata na Kalou ka vakatikora ena Were ko Iteni, me wereca ka vakatawa.

12 Eratou sa vakaroti koya na tamata ko iratou na Kalou ka kaya: Ena kau kecega sa tu ena were sa tara mo kana mai kina,

13 Ia mai na kau sa kilai kina na ka vinaka kei na ka ca, mo kakua sara ni kana kina; raica ko na mate vakaidina ena siga ko sa kana kina. Ia koi au, ko Eparaama, au raica ni sa tautauvata kei na ^agauna ni Turaga, ka sa tautauvata kei na gauna mai ^bKolobo; ena gauna ko ya, eratou sa bera ni lesia kina na Kalou vei Atama na ivakarau ni nona gauna.

14 Eratou sa kaya na Kalou: Me datou ia ka bulia e dua na dauveivuke e yaga vua na tamata, ni sa sega ni vinaka me tiko duadua ga ko koya, io me datou bulia e dua na dauveivuke e yaga vua.

15 A ratou sa vakavuna na Kalou me biti ^aAtama e dua na moce lutu; ka sa moce kina ko koya, eratou sa kauta tani e dua na sui mai na sarisarina, ka cakava na lewena me veiuturi me kena isosomi.

16 Ia mai na sui ni sarisari eratou sa kauta tani na Kalou mai vua na tagane, eratou sa bulia kina e dua na ^ayalewa ka kauti koya vua.

17 A sa kaya ko Atama: Oqo dina na sui mai na suiqu, kei na lewe mai na lewequ; ia ena vakatokai ko koya me Yalewa, ni sa kau tani mai vua na tagane;

18 O koya oqo sa biuta kina na tamana kei na tinana na tagane, ka ^akabita na watina, a rau sa yaco me lewe ^bdua ga.

19 A rau sa luvawale, na tagane kei na watina, ia erau sa sega ni madua.

20 A ratou sa bulia mai na qele na Kalou na manumanu kecega ni vanua, kei na manumanu vuka kecega, eratou sa kauti ira vei Atama me raica se yaca cava ena vakatokai ira kina; ia na yaca ga sa vakatoka kina na ka bula kecega ko Atama, oqori ga na yacana.

21 A sa vakayacana na manumanu yavaiva kecega ko Atama, kei na manumanu vuka kecega, kei na manumanu tawa lasa ni vanua; ia ko Atama, a sa kune e dua na nona dauveivuke.