Ko Ngā Tikanga o te Whakapono
nō Te Hāhi o Ihu Karaiti o te Hunga Tapu i ngā Rā o Muri nei.

1 E whakapono ana mātou ki te Atua, ki te Matua Ora Tonu, ki Tana Tama ki a Ihu Karaiti, ki te Wairua Tapu anō hoki.

2 E whakapono ana mātou ka whakawhiua ngā tāngata mō ō rātou hara ake, ehara i te mea mō tō Arama haranga

3 E whakapono ana mātou mā roto i te Whakamārietanga o te Karaiti, ka whakaorangia ngā tāngata katoa e ngohengohe ana ki ngā ture me ngā tikanga o te Rongopai.

4 E whakapono ana mātou ko ngā mātāpono me ngā tikanga tapu o te Rongopai: tuatahi, ko te Whakapono ki te Ariki ki a Ihu Karaiti; tuarua, ko te Rīpenatatanga; tuatoru ko te Iriiringa rumaki, hei murunga hara; tuawhā, ko te Whakapākanga o ngā ringaringa mō te takohatanga o te Wairua Tapu.

5 E whakapono ana mātou kua takoto te tikanga kia karangatia te tangata e te Atua, ki te kauhau i te Rongopai, ki te mahi hoki i ōna tikanga, i runga i te poropititanga me te whakapākanga ringaringa o ngā tāngata kua whakaritea hei pērā.

6 E whakapono ana mātou ki taua whakaritenga anō i whakaritea ai i te Hāhi i Mua; arā, ki ngā āpotoro, ki ngā poropiti, ki ngā hēpara, ki ngā kaiwhakaako, ki ngā kaikauhau i te rongo pai, ki ērā atu anō hoki.

7 E whakapono ana mātou ki te homaitanga o ngā reo kē, ki te mahi poropiti, ki ngā whakakitenga, ki ngā kitenga, ki ngā mana whakaora, ki te whakamāoritanga i ngā reo, ki ērā atu anō hoki.

8 E whakapono ana mātou ko te Paipera Tapu te kupu a te Atua; arā, ko te wāhi i tika te whakamāoritanga; e whakapono ana anō hoki mātou ko te Pukapuka a Moromona te kupu a te Atua.

9 E whakapono ana mātou ki ngā mea katoa kua whakakitea mai e te Atua i mua, ki ngā mea anō hoki e whakakitea mai nei e Ia ināianei; ā, e whakapono ana mātou tērā e maha ngā tino tikanga utu nui o te rangatiratanga o te Atua, e whakakitea mai anō e Ia.

10 E whakapono ana mātou ki te huihuinga katoatanga o Iharaira, ki te whakahokinga mai anō hoki o ngā hapū kotahi tekau, ki te hanganga o Hīona ki runga ki tēnei tuawhenua (ki Amerika), ki te kingitanga a Te Karaiti ki runga ki te whenua, ki te whakahoutanga anō hoki o te whenua, ki te rironga hoki i a ia tōna kororia pararaiha.

11 Kua kīa e mātou kei a mātou te tikanga ki te karakia atu ki te Atua Kaha rawa i runga i te whakaaetanga o ō mātou ake hinengaro; ā, ka tuku atu i taua tikanga anō ki ngā tāngata katoa, ahakoa karakia rātou pēhea, ki hea, ki te aha rānei.

12 E whakapono ana mātou e pai ana mātou kia noho i raro i te mana o ngā kīngi, o ngā tumuaki, o ngā rangatira, o ngā kaiwhakahaere tikanga; ā, e pai ana hoki mātou ki te ngohengohe, ki te whakahōnore, ki te tautoko hoki i te ture.

13 Ā, e hiahia ana mātou kia tika, kia pono, kia hē-kore, kia atawhai, kia ū ki te pai, ki te mahi pai anō hoki ki ngā tāngata katoa; arā, e whai ana mātou i tā Pāora whakatūpatoranga—E whakapono ana mātou ki ngā mea katoa, e tūmanako atu ana mātou ki ngā mea katoa, kua manawanui mātou ki ngā mea maha, ā, e hiahia ana mātou kia manawanui ki ngā mea katoa. Mehemea he mea pai, he mea ātaahua rānei, he mea kōrerotia paitia rānei, he mea whakamoemititia rānei, e whai ana mātou i aua mea.