¶ 1 BEA nae hoko o behe, koe gaahi tu‘i aia nae i he botu mai ni o Joatani, i he gaahi mouga, moe gaahi telea, bea i he gaahi botu kotoabe oe tahi lahi oku hagatonu atu ki Lebanoni, koe kau Heti, moe kau Amoli, moe kau Kenani, moe kau Belesi, moe kau Hevi, moe kau Jebusi, i he e nau fanogo ai;

2 Naa nau fakakatoa fakataha akinautolu, ke nau tau‘i loto taha be a Josiua mo Isileli.

¶ 3 Bea i he fanogo ae kakai o Kibione ki he mea kuo fai e Josiua ki Jeliko, bea mo Ai,

4 Naa nau fai fakakākā, o nau alu o fai o hage ko ha kau tagata talafekau akinautolu, o ai ae gaahi kato motua ki he e nau faga asi, moe gaahi hina uaine, kuo motua, mo mahae, kuo nonoo o oboji:

5 Moe gaahi tobuva‘e motua kuo monomono ki ho nau va‘e, bea ai moe gaahi kofu motua kiate kinautolu: bea koe ma kotoabe o ho nau oho nae momoa mo tuugafulufulu‘a.

6 Bea naa nau alu kia Josiua i he abitaga i Kilikali, o nau behe kiate ia, bea ki he kau tagata o Isileli, Kuo mau ha‘u mei he fonua mamao: bea koeni te tau alea mo kimoutolu.

7 Bea nae behe e he kau tagata Isileli ki he kau Hevi, Naa koe kakai oku tau nonofo ni akimoutolu; bea e fefe e mau lea ke lelei mo kimoutolu?

8 Bea naa nau tala kia Josiua, Ko hoo kau tamaioeiki akimautolu. Bea behe e Josiua kiate kinautolu, Kohai akimoutolu? bea kuo mou ha‘u mei fe?

9 Bea naa nau behe kiate ia, Kuo ha‘u hoo kau tamaioeiki mei he fonua mamao, koe mea i he huafa o Jihova ko ho Otua: he kuo mau fanogo ki hono ogoogo, mo ia kotoabe naa ne fai i Ijibite.

10 Mo ia kotoabe naa ne fai ki he ogo tu‘i oe kau Amoli, akinaua nae i he kauvai e taha o Joatani, kia Sihoni koe tu‘i o Hesiboni, bea kia Oki koe tu‘i o Besani, aia nae i Asiteloti.

11 Koia nae lea ai e mau kau mātua moe kakai kotoabe o ho mau fonua, o behe, Too ae meakai ki ho mou fonoga, bea alu o fakafetaulaki kiate kinautolu, bea mou behe kiate kinautolu, Ko hoo mou kau tamaioeiki akimautolu: koia fokotuu hoo mou fekau kiate kimautolu.

12 Koe mau ma ni naa mau too mafana be mei ho mau gaahi fale ko ho mau oho i he aho naa mau ha‘u ai he mau hoko kiate kimoutolu; ke ko eni, vakai, kuo momoa ia, bea kuo tuugafulufulu‘a.

13 Bea koe gaahi hina ni oe uaine, aia naa mau fakafonu, oku foou; bea vakai, kuo nau mahae: bea koe mau gaahi kofu ni, moe gaahi tobuva‘e kuo hoko o motua koe mae i he fonoga loloa aubito.

14 Bea naa nau too e nau meakai, bea nae ikai te nau fehui i he fofoga o Jihova.

15 Bea nae fai ae fakalelei e Josiua mo kinautolu, o alea mo kinautolu, koeuhi ke tuku ke nau moui: bea nae fuakava kiate kinautolu ae houeiki oe fakataha.

¶ 16 Bea nae hoko o behe, i he ene oji mai ae aho e tolu, hili e nau fai ae lea mo kinautolu, naa nau fanogo, ta koe vaofi be akinautolu, bea oku nau nofo ofi kiate kinautolu.

17 Bea nae fonoga ae fānau a Isileli, o hoko atu ki ho nau kolo i hono tolu oe aho. Bea koe nau gaahi kolo, ko Kibione, mo Kifila, mo Biheloti, mo Keja‐jialimi.

18 Bea nae ikai teia akinautolu e he fānau a Isileli, koe mea i he houeiki oe kakai naa nau fuakava kiate kinautolu ia Jihova koe Otua o Isileli. Bea nae lāuga ae kakai kotoabe koeuhi koe houeiki.

19 Ka nae lea ae houeiki kotoabe ki he kakai, Kuo oji e mau fuakava kiate kinautolu ia Jihova koe Otua o Isileli: koia oku ikai totonu ke mau ala kiate kinautolu.

20 Te tau fai ae mea ni kiate kinautolu; tuku be ke nau moui, telia naa iate kitautolu ae houhau, koe mea i he fuakava aia kuo tau fai kiate kinautolu.

21 Bea nae tala e he houeiki kiate kinautolu, Tuku ke nau moui; kae hoko akinautolu koe kau tafefie moe kau utuvai ki he kakai kotoabe; o hage koe lea ae houeiki kiate kinautolu.

¶ 22 Bea nae fekau e Josiua ke nau ha‘u, bea nae lea ia kiate kinautolu, o behe, Koeha kuo mou kākā ai kiate kimautolu, o behe, Oku mau mamao aubito meiate kimoutolu; kae ta oku tau nonofo mo kimoutolu?

23 Bea koeni, oku malaia akimoutolu, bea e ikai fakatauataina ha mou toko taha mei he bobula, ka koe kau tafefie moe kau utuvai akimoutolu ki he fale o hoku Otua.

24 Bea naa nau lea kia Josiua o behe, Koe mea i he fakaha ki hoo kau tamaioeiki, ae fekau e Jihova ko ho Otua kia Mosese ke foaki kiate kimoutolu ae fonua kotoabe, bea ke mou fakaauha ae kakai kotoabe oe fonua mei ho mou ao, koia naa mau manavahe lahi ai koeuhi koe mau moui koeuhi ko kimoutolu, bea koia kuo mau fai ai ae mea ni.

25 Bea koeni, vakai, oku mau i ho nima: ke ke fai kiate kimautolu aia oku matamatalelei mo totonu kiate koe.

26 Bea naa ne fai ia kiate kinautolu, o fakahaofi akinautolu mei he nima ae fānau a Isileli, bea nae ikai te ne tamate‘i akinautolu.

27 Bea nae gaohi akinautolu e Josiua i he aho koia koe kau tafefie, moe kau utuvai ki he kakai oe fakataha, bea ki he feilaulauaga o Jihova, io o a‘u mai ki he aho ni, i he botu koia te ne fili.