1 Elihu ma eto:

2 Oi o laloamu ina na maoro a?Oi na o tomu “Ina na ahugu korikori Dirava vairanai”;

3 bena ma o tomu “Namona be dahaka egu ai?Na kara namo negana ai ina hisi ianina na davaria;bama kara dika, egu hisi ianina bema herea eiava?”

4 Lau ese baina haere henimu,bona turamu danu, oi ida.

5 Ba roha isi, guba ba itaia;ori ba itadia, idia na atai ai, oi na henudiai.

6 Boma kara dika, ia boma kara dika henia a?Emu kara dika boma habada, ede ba kara henia toma a?

7 Boma kara maoromaoro, dahaka ba henia?Eiava dahaka oi imamu amo baine abia?

8 Emu kara dika na taunimanima ta oi heḡereḡeremu enai baine kau;bona emu kara maoromaoro taunimanima natuna ta danu enai.

9 Daḡedaḡe karadia momo daidiai, taunimanima na e tai lolomu:goada taudia imadia daidiai idia ese hekaha e boiboilaiamu.

10 A asi tauna ta e tomu: Ikaragu Diravana na edeseni ai?Hanuaboi ai ia ese ane e henimu;

11 ia ese e hadibadibadamu, bena uda boromadia ta hereadiamu;ia ese e ha-aonegadamu, bena atai manudia ta hereadiamu;ia be edeseni ai?

12 Idia e tai lolomu, to ia na se haeremu,kara dika taudia edia hekokoroku dainai.

13 Momokani, Dirava ese taitai asi anina na se kamonai heniamu;Siahu-idoinai Diravana ese se abia daemu.

14 Matona, baoto so itaiamu,bona hahemaoro badina na ia vairanai mia;bena ia o nariamu,ia danu basine abia dae, ani?

15 A harihari, ena badu ese dava se henimubona kara dika se laloa badamu dainai,

16 Iobu ese uduna e kehoamu, hereva asi anidia e gwauraimu;hereva momo e habadamu, asi dibana ida.