Iobu na e haere

1 Bena Iobu na e haere, eto:

2 Emui heduru, asi siahuna tauna enai, namona be dahaka?Emui hahemauri, imana asi goadana tauna enai, namona be dahaka?

3 Emui hahealo, asi aonegana tauna enai, namona be dahaka?Diba-maoro vada o gwauraia davana a?

4 Daika ena heduru ai hereva vada o gwaurai?Daika laumana na oiemu amo vada e lasi?

5 Mase gabuna ai e nohomu laumadia na e heude-heudemu,ranu bona davara mai inoholaidia ḡaudia ida danu.

6 Mase gabuna na eme ḡaḡae, Dirava vairanai;bona dobu-masemase gabuna na asi iḡovalaina.

7 Ia ese mirigini kahana e idia roromu, gabu gagaena daenai;tanobada ia ese e atoamu, dia ḡau ta latanai.

8 Ia ese ranu e hahebouamu, ena duba dagadagana ai;a dagadaga na se pararamu.

9 Ena terono e ḡovaiamu,ena dagadaga amo e ḡovaia ahumu.

10 Hetoa na gadobada ai e karaia heḡeḡe,diari bona dibura hetoadia.

11 Guba au-tubuadia e heude-heudemu;iena gwaugwau dainai e hoa takumu.

12 Ia siahuna amo davara e hagaimaia;ena lalo-parara amo Rahaba e rahua mase.

13 lena lai ese vala e hanamoa;ia imana ese e vero haraḡa-haraḡamu gaigaina na e gwadaia mase.

14 A itaia, ini na ena kara rimuna mo;ia harina sisina mo ta kamonai lahulahumu,a iena siahu reḡena, guba-rahurahu na heto, daika dibana?