1 Dahaka dainai Siahu-idoinai Diravana ese hahemaoro negadia se badinadiamu?Dahaka dainai ia e dibaiamu taudia ese iena dina asie itadiamu?

2 Taunimanima ese tano hetoadia e abidia ohomu;mamoe seridia e dadidiamu, bena rei gabudia ai e reḡudiamu.

3 Idia ese ihareha ena doniki e hakaua ohomu,bona vabu ena boromakau maruanena e abiamu, gwauhamatadavana.

4 Idia ese ogoḡami taudia na dala amo e doridia sirimu;tanobada ena ogoḡami taudia iboudiai na e komumu.

5 A itaia, uda donikidia tano ḡaḡaena ai na hehetoraka lasimu, edia ḡaukara e laomu;tano ḡaḡaena ai damudia e tahumu,natudia adia.

6 Uma ai adia aniani e habouamu,bona kara dika tauna ena vine imeana ai vine momorudiae gogomu.

7 Hanuaboi idoinai ḡaḡaedia mo e hekuremu, asi dabuadia;keru negana ai idia na asi edia hetaru.

8 Ororo ai medu ese e aladiamu;asi edia hemetai gabudia dainai idia na nadi-gini metaidia ai e raki taomu.

9 (Haida ese ihareha na itorena hahine kemena amo e dadiamu,bona ogoḡami tauna natuna maragina e abiamu, gwauhamata davana.)

10 Ḡaḡaedia mo e loaloamu, asi dabuadia;mai hitolodia ida uit iḡuidia e huamu;

11 kara dika tauna ena olive imeana ai idia ese dehoro e karaiamu;vine imoilaidia gabuna ai vine e moidiamu, ḡau tamona ranu e masediamu.

12 Hanua badana lalona amo e masemu taudia edia ḡanaḡana e daemu,bona e haberodia taudia lalodia ese idurudia e tailaiamu,a Dirava ese edia noinoi se abi daemu.

13 Haida ese diari e inai heniamu,dalana na asi dibadia, bona asie rakalaiamu.

14 Roroma tauna na dibura ai e tore isimu,ogoḡami taudia bona hitolo taudia iala-masedia totona;bona hanuaboi ai ia na henao tauna na heto.

15 Heuda-hanai tauna ese mairumairu e nariamu,e tomu “Mata ta ese basine itagu”;ia ese vairana danu e ha-idauamu.

16 Dibura ai ruma e darediamu,dina ai sibodia e hekou ahumu,diari na asi dibadia.

17 Malokihi na edia daba ai e halaoamu;malokihi ena hahegari ḡaudia ida e heturamu.

18 Umui na o tomamu, Abata ese e laohaidia haraḡamu,idia ahudia vada e hadikaia tanobada ai;vine imoilaidia tauna ta ese edia vine uneadia basine lao henidia.

19 Geaka-geaka bona gesegese negadia ai ranu parakana na e dodomu;mase gabuna ese danu kara dika taudia na unu e karadia tomamu.

20 Hanua ariaradia ese e lalodia boiomu,idia ladadia na ta se lalodia taomu;taunabunai, kara dika na e kwaidumu, au na heto.

21 Gabani hahinena, asi natuna, ana aniani ai e heubumu;bona vabu na asie kara namo heniamu.

22 Ḡau tamona, Dirava ese goada taudia edia mauri na ena siahu amo e hadaudaumu;asi edia helaro negadia ai e tore isimu.

23 Noho namo e henidiamu, edia imuda ai e laomu;edia dala ia ese e itadia taomu.

24 Nega sisina mo e heabi isimu, bena e pukimu;idia na e maraimu bona e kakoromu, ḡau iboudiai heḡereḡeredia;idia na e heutu ohomu, uit adadia heḡereḡeredia.

25 Bema dia unuheto, daika ese koikoi tauna ai baine halaogu?daika ese baine hahedinaraia egu hereva na asi anina?