¶ 1 BEA koe ogo balofita, ko Hakeai koe balofita, mo Sakalia koe foha o Ito, naa na lea ki he kakai Jiu nae i Juta mo Jelusalema i he huafa oe Otua o Isileli, io kiate kinautolu.

2 Bea nae tuu hake a Selubebeli koe foha o Sialiteli, mo Jesua koe foha o Josataki, bea kamata laga ae fale oe Otua aia oku i Jelusalema; bea nae iate kinautolu ae kau balofita oe Otua ke tokoni‘i akinautolu.

¶ 3 Bea nae ha‘u kiate kinautolu i he kuoga koia a Tatinei, koe bule i he botu kauvai ni oe vaitafe, mo Sita‐bosinei, mo ho na gaahi kaumea, o nau lea behe kiate kinautolu, Kohai kuo ne fekau akimoutolu ke laga ae fale ni, bea ke fakamaoboobo ae a maka ni?

4 Bea naa mau tala kiate kinautolu o behe ni, Koeha ae higoa oe kau tagata oku fai ae laga fale ni?

5 Ka koe fofoga o ho nau Otua nae i he kau mātua oe kakai Jiu, koia nae ikai te nau faa fai ke taofi, kae oua ke hoko atu ia kia Talaiasi: bea naa nau toki ave hono tali tohi ki he mea ni.

¶ 6 Ko hono hiki eni oe tohi aia nae fai mo atu kia Talaiasi koe tu‘i, e Tatinei koe bule i he botu kauvai ni oe vaitafe, mo Sita‐bosinei, mo hono kaumea koe kau Afasatikai, aia nae i he botu kauvai ni oe vaitafe.

7 Naa nau ave ae tohi kiate ia, aia nae tohi i ai o behe; Ke ia Talaiasi koe tu‘i ae fiemalie lahi.

8 Ke ilo e he tu‘i, naa mau alu ki he fonua ko Juta, ki he fale oe Otua lahi, aia oku laga aki ae gaahi maka lalahi, bea kuo ai ae gaahi akau i he gaahi a maka, bea oku fai fakavave ae gaue ni, bea oku monuia ia i ho nau nima.

9 Bea naa mau fehui ai ki he kau mātua koia, o mau behe kiate kinautolu, Kohai naa ne fekau kiate kimoutolu ke laga ae fale ni, bea ke fakamaoboobo ae gaahi a maka ni?

10 Bea naa mau fehui ki ho nau higoa foki, koeuhi ke fakababau kiate koe, bea ke mau tohi ae higoa oe kau tagata oku tuu kimua iate kinautolu.

11 Bea naa nau tali mai, o behe, Koe kau tamaioeiki akimautolu oe Otua oe lagi mo mamani, bea oku mau laga ae fale aia nae laga i he ta‘u lahi kuo hili, aia nae laga e he tu‘i lahi o Isileli bea fokotuu.

12 Kae hili ae fakatubu e he e mau gaahi tamai ae houhau lahi oe Otua oe lagi, naa ne tuku akinautolu ki he nima o Nebukanesa koe tu‘i o Babilone, koe tagata Kalitia, aia naa ne maumaui‘i ae fale ni, bea ne fetuku ae kakai ki he mamao ki Babilone.

13 Ka i he uluaki ta‘u o Kolesi koe tu‘i o Babilone koe tu‘i koia ko Kolesi naa ne fai ae fono ke laga ae fale ni oe Otua.

14 Bea koe gaahi ibu koula foki moe siliva oe fale oe Otua, aia nae too o ave e Nebukanesa mei he fale tabu aia nae i Jelusalema, bea omi ki he fale tabu o Babilone, nae too ia e Kolesi koe tu‘i mei he fale tabu o Babilone, bea nae tuku ia ki he nima oe toko taha ko hono higoa ko Sesibasa, aia naa ne fakanofo koe bule.

15 O ne behe kiate ia, Too ae gaahi nāunāu ni, bea alu, o fetuku ia ki he fale tabu aia oku i Jelusalema, bea tuku ke laga ae fale oe Otua i hono botu.

16 Bea nae ha‘u ai ae Sesibasa koia, bea ne ai hono tuuga oe fale o Jihova aia oku i Jelusalema: bea talu ae kuoga koia o fai mai kuo laga ia, ka oku heeki ai oji ia.

17 Bea koeni, kabau oku matalelei ki he tu‘i, tuku ke kumi i he fale koloa oe tu‘i, aia oku i Babilone, be kuo behe be,  be ikai, be nae fai ha fono o Kolesi ke laga ae fale ni oe Otua i Jelusalema, bea ke fekau e he tu‘i aia oku lelei hono loto ki ai i he mea ni.