¶ 1 BEA hili ae gaahi mea ni, mo hono fakatuu mau oia, nae ha‘u a Senakalibe koe tu‘i o Asilia, bea hoko ki Juta, bea nae fakanofo ene tau ki he gaahi kolo tau, bea mahalo eia te ne ma‘u akinautolu maana.

2 Bea i he mamata a Hesekaia kuo ha‘u a Senakalibe, bea kuo loto ia ke tau‘i a Jelusalema,

3 Nae fakakaukau ai ia mo hono houeiki mo ene kau tagata malohi ke bunujia ae vai oe gaahi matavai aia nae itua i he kolo: bea naa nau tokoni kiate ia.

4 Koia nae fakakatoa ai ae kakai toko lahi, o nau bunujia ae gaahi matavai kotoabe, moe vaitafe aia nae tafe i loto fonua, o nau behe, Koe umaa ae ha‘u ae gaahi tu‘i o Asilia, o nau ma‘u ae vai lahi?

5 Bea naa ne fakamalohi ia, bea naa ne laga ae a maka kotoabe nae holoki hifo, bea fokotuu hake ae gaahi fale maoluga, moe a maka e taha ituaa, o ne teuteu‘i a Milo i he kolo o Tevita, bea naa ne gaohi ae gaahi tao moe gaahi ba ke lahi aubito.

6 Bea naa ne fakanofo ae kau eiki tau ki he kakai, o ne tanaki o fakataha akinautolu kiate ia i he hala oe mataba oe kolo, o ne lea lelei kiate kinautolu, o behe,

7 Ke mou malohi mo loto to‘a, oua naa manavahe be bubutuu koeuhi koe tu‘i o Asilia, be ki he fuu toko lahi kotoabe oku iate ia: he oku iate kitautolu ae toko lahi hake iate kinautolu oku iate ia:

8 Oku iate ia ae nima fakakakano; ka oku iate kitautolu a Jihova ko ho tau Otua ke tokoni akitautolu, bea ke fai e tau gaahi tau. Bea nae fiemalie ae kakai i he gaahi lea a Hesekaia koe tu‘i o Juta.

¶ 9 Hili ae mea ni nae fekau e Senakalibe ene kau tamaioeiki ki Jelusalema (ka nae nofo be ia o tau‘i a Lakisi, mo ene malohi kotoabe nae iate ia) kia Hesekaia koe tu‘i o Juta, bea ki he kakai Juta kotoabe nae i Jelusalema, o behe,

10 Oku behe mai e Senakalibe koe tu‘i o Asilia, Koeha ia oku mou faaki ki ai, oku mou tali ai i he kolo tau o Jelusalema?

11 Ikai kuo fakahehema‘i akimoutolu e Hesekaia ke tukuage akimoutolu ke mou mate i he fiekaia moe fieinu, o behe, Ko Jihova ko ho tau Otua te ne fakamoui akitautolu mei he nima oe tu‘i o Asilia?

12 Ikai kuo holoki hifo e he Hesekaia ko ia, hono gaahi botu maoluga mo ene gaahi feilaulauaga, bea ne fekau ki Juta mo Jelusalema, o behe, Te mou hu i he mua feilaulauaga be taha, bea tutu ki ai ae mea namu kakala.

13 Oku ikai te mou ilo aia kuou fai e au bea moia nae fai e he eku gaahi tamai ki he kakai kotoabe oe gaahi fonua kehe? he nae mafai fakajiijii e he gaahi otua oe gaahi buleaga oe gaahi fonua koia ke fakamoui ho nau gaahi fonua mei hoku nima?

14 Kohai ia i he gaahi otua oe gaahi buleaga koia nae fakaauha aubito e he eku gaahi tamai, nae mafai eia ke fakamoui hono kakai mei hoku nima, koeuhi ke behe e mafai e ho mou Otua ke fakamoui akimoutolu mei hoku nima?

15 Bea koeni oua naa mou tuku a Hesekaia ke ne kākā‘i akimoutolu, be ke fakaloto‘i akimoutolu o behe ni, bea oua foki naa mou tui kiate ia: he nae ikai ha otua o ha kakai be ha buleaga nae mafai ke fakamoui hono kakai mei hoku nima, bea mei he nima o eku gaahi tamai: kae mua hake eni ae tae mafai o ho mou Otua ke fakamoui akimoutolu mei hoku nima?

16 Bea nae lea kovi lahi hake e he ene kau tamaioeiki kia Jihova koe Otua, bea ki he ene tamaioeiki ko Hesekaia.

17 Bea nae tohi eia ae gaahi tohi ke kabe kia Jihova koe Otua o Isileli, bea ke talakovi‘i ia, o behe, Nae ikai faa fai e he gaahi otua oe kakai oe gaahi fonua ke fakamoui ho nau kakai mei hoku nima, bea e behe, e ikai mafai e he Otua o Hesekaia ke fakamoui hono kakai mei hoku nima.

18 Bea naa nau toki kalaga i he le‘o lahi i he lea faka‐jiu ki he kakai o Jelusalema nae i he fuga a, ke fakamanavahe‘i akinautolu, bea ke fakamamahi‘i akinautolu; koeuhi ke nau lava‘i ae kolo.

19 Bea naa nau lea kovi ki he Otua o Jelusalema, o hage koe nau lau ki he gaahi otua oe kakai o mamani, aia oku gaohi e he nima oe tagata.

20 Bea koe mea koia nae lotu ai mo tagi ki lagi a Hesekaia koe tu‘i moe balofita ko Isaia koe foha o Amosi.

¶ 21 Bea nae fekau e Jihova ae agelo, aia naa ne ta‘i ae kau tagata to‘a malohi kotoabe, moe kau taki tau moe houeiki bule i he abitaga oe tu‘i o Asilia. Koia nae toe alu ai ia o mata ma ki hono fonua. Bea i he ene hoko ki he fale o hono otua nae tamate‘i ia aki ae heleta, ekinautolu nae tubu mei hono fatu oona.

22 Nae behe be hono fakamoui e Jihova a Hesekaia moe kakai o Jelusalema mei he nima o Senakalibe koe tu‘i o Asilia, bea mei he nima oe  kakai kotoabe, bea naa ne fakahinohino‘i akinautolu i he botu kotoabe.

23 Bea nae omi e he toko lahi ae gaahi mea foaki kia Jihova ki Jelusalema, moe gaahi mea ofa kia Hesekaia koe tu‘i o Juta: bea talu mei ai nae fakahikihiki ia i he ao oe gaahi buleaga kotoabe.

¶ 24 Bea i he gaahi aho koia nae mahaki a Hesekaia o teitei mate; bea nae lotu ia kia Jihova: bea nae folofola ia ki ai, bea nae tuku kiate ia ae fakailoga.

25 Ka nae ikai ke fai e Hesekaia o fakatatau ki he lelei nae fai kiate ia; he nae fakahikihiki hono loto: koia nae ai ae houhau kiate ia, bea ki Juta mo Jelusalema.

26 Ka nae fakavaivai ia e Hesekaia koeuhi koe fielahi o hono loto, koia moe kakai o Jelusalema, koia nae ikai to ai ae houhau a Jihova kiate kinautolu i he gaahi aho o Hesekaia.

¶ 27 Bea nae ma‘u e Hesekaia ae koloa lahi aubito moe ogoogolelei lahi: bea naa ne gaohi moona ae gaahi fale faoaga siliva, bea ki he koula, moe gaahi maka koloa mahuiga, bea ki he gaahi mea nanamu, bea ki he gaahi ba, bea ki he gaahi mea teuga lelei kehekehe kotoabe;

28 Moe gaahi feleoko foki ki hono tubu oe uite, moe uaine, moe lolo; moe gaahi tuuaga ki he faga manu kehekehe kotoabe, moe gaahi loto a ki he gaahi faga manu jii.

29 Bea naa ne gaohi maana ae gaahi kolo, moe gaahi faga manu jii, moe gaahi faga manu lahi: he nae foaki kiate ia e he Otua ae gaahi mea lahi.

30 Koe Hesekaia ni foki naa ne tabuni ae tafeaga vai i oluga i Kihoni, o ne omi totonu ia i he botu luluga oe kolo o Tevita. Bea nae monuia a Hesekaia i he ene gaue kotoabe.

¶ 31 Ka koe mea i he gaue ae kau tagata fekau mei he houeiki o Babilone, aia naa nau fekau kiate ia ke fehui kiate ia i he mea mana nae fai i he fonua, nae fakatukutuku‘i ia e he Otua, ke ahiahi‘i ia, koeuhi ke ne ilo ai aia kotoabe nae i hono loto.

¶ 32 Bea koeni, ko hono toe oe gaue a Hesekaia, mo ene agalelei, vakai, kuo tohi ia i he  tohi kikite ae balofita ko Isaia, koe foha o Amosi, bea i he tohi oe gaahi tu‘i o Juta mo Isileli.

33 Bea nae mohe a Hesekaia mo ene gaahi tamai, bea nau tanu ia i he fugani fonualoto oe gaahi foha o Tevita: bea nae fai fakaabaaba kiate ia a Juta kotoabe moe kakai kotoabe o Jelusalema i he ene bekia. Bea nae fetogi ia i he bule e hono foha ko Manase.