¶ 1 BEA nae toki ave e he kakai kotoabe o Juta a Usaia, aia nae hogofulu ma ono ta‘u hono motua, o fakanofo ia ke tu‘i koe fetogi o ene tamai ko Amasia.

2 Naa ne laga a Eloti, o toe fakakau ia ki Juta, i he hiliage ae mohe ae tu‘i ki he ene gaahi tamai.

3 Nae hogofulu ma ono ae ta‘u oe motua o Usaia i he kamata ene bule, bea nae bule ia i he ta‘u e nimagofulu moe ta‘u e ua i Jelusalema. Bea koe higoa o ene fa‘e foki ko Jekolia o Jelusalema.

4 Bea nae fai eia aia nae lelei i he ao o Jihova, o fakatatau ki he mea kotoabe nae fai e he ene tamai ko Amasia.

5 Nae kumi eia ki he Otua i he gaahi aho o Sakalia, aia nae boto i he ilo ae gaahi mea ha mai ae Otua: bea lolotoga ene kumi kia Jihova, nae fakamonuia ia e he Otua.

6 Bea nae alu atu ia o tau‘i ae kakai Filisitia, o ne holoki hifo ae a maka o Kati, moe a maka o Jabina, moe a maka o Asitoti, bea ne laga ae gaahi kolo i he fonua Asitoti, bea i he lotolotoga oe kakai Filisitia.

7 Bea nae tokoni ia e he Otua ke tau‘i ae kakai Filisitia, bea ke tau‘i ae kakai Alebea aia nae nofo i Kuabeali, moe kakai Mehunimi.

8 Bea nae foaki ae gaahi mea ofa e he kakai Amoni kia Usaia: bea nae ogoogoa atu hono higoa o a‘u ki he huaga ki Ijibite; he naa ne fakamalohi ia ke lahi aubito.

9 Bea nae laga foki e Usaia ae gaahi fale maoluga i Jelusalema i he mataba i he tuliki, bea i he mataba oe botu talalo, bea i he afega, o ne laga foou ia.

10 Bea naa ne laga ae gaahi fale maoluga i he toafa, bea keli ae gaahi vai lahi: he nae lahi aubito ene faga manu, i he fonua i lalo, bea moe gaahi tafagafaga: moe kau tauhi goue, moe kau tauhi vaini i he gaahi mouga, bea i Kameli: he nae manako ia ki he tauhi goue.

11 Bea nae ma‘u e Usaia foki ae kau tagata fai tau, aia nae alu vahevahe be ki he tau, o fakatatau ki ho nau lau i he bule a Jieli koe tagata tohi mo Maaseia koe bule, i he nima o Hanania, koe toko taha oe gaahi eiki bule ae tu‘i.

12 Ko hono lau kotoa oe kau tuu kimua i he kau mātua oe kau tagata to‘a malohi nae toko ua afe moe toko onogeau.

13 Bea nae i ho nau nima ae fuu tau, koe toko tolu kilu moe toko fitu afe moe toko nimageau, nae fai ae tau i he malohi lahi, ke tokoni ki he tu‘i ke tau‘i ae fili.

14 Bea nae tokonaki e Usaia mo onau, tolu i he tau kotoabe ae gaahi ba, moe tao, moe tatā, moe gaahi kofutau, moe gaahi kau fana, moe gaahi makata.

15 Bea nae gaohi eia i Jelusalema ae gaahi mea tau, nae fakakaukau hono gaohi e he kau tagata boto, ke fokotuu i he gaahi fale maoluga bea ki he gaahi buke, ke fana aki ae gahau moe gaahi maka lahi. Bea nae ogoogo ki he mamao hono higoa; he nae lahi aubito ae tokoni kiate ia, ke ne malohi ai.

¶ 16 Ka i he ene malohi nae mahikihiki hake hono loto ke kovi lahi ai ia: he naa ne fai talagataa kia Jihova ko hono Otua, bea nae hu ia ki he fale tabu o Jihova ke tutu ae mea namu kakala ki he feilaulauaga oe mea namu kakala.

17 Bea nae hu ki ai a Asalia koe taulaeiki o muimui iate ia, bea nae iate ia ae kau taulaeiki a Jihova e toko valugofulu, koe kau tagata to‘a;

18 Bea naa nau tali tuu ki he tu‘i ko Usaia, o nau behe kiate ia, E Usaia oku ikai iate koe ke tutu ae mea namu kakala kia Jihova, ka ki he kau taulaeiki koe gaahi foha o Elone, aia kuo fakatabu‘i ke tutu ae mea namu kakala: alu kitua koe mei he fale tabu, he kuo ke fai hala: bea e ikai foki te ke ogoogo lelei ai mei a Jihova ko ho Otua.

19 Bea nae houhau ai a Usaia, bea nae i hono nima ae aiaga afi, ke tutu ai ae mea namu kakala: bea lolotoga ene houhau ki he kau taulaeiki, nae tubu hake ae kilia i hono foi la‘e i he ao oe kau taulaeiki i he fale o Jihova, mei he botu oe feilaulauaga oe mea namu kakala.

20 Bea nae mamata kiate ia e Asalia koe taulaeiki lahi, bea moe kau taulaeiki kotoabe, bea, vakai, kuo kilia ia i hono la‘e, bea naa nau teke‘i ia mei ai kitua; io, bea nae fakatootoo ia ke alu kitua, he kuo ta‘i ia e Jihova.

21 Bea nae kilia ae tu‘i ko Usaia o a‘u ki he aho o ene bekia, bea nae nofo ia i he fale liaki, he koe kilia ia; he nae motuhi ia mei he fale o Jihova: bea nae bule a Jotami ko hono foha ki he fale oe tu‘i, o fakamāu‘i ae kakai oe fonua.

¶ 22 Bea ko hono toe oe gaue a Usaia, koe uluaki moe kimui, nae tohi ia e Isaia koe balofita, koe foha o Amosi.

23 Bea behe nae mohe a Usaia mo ene gaahi tamai i he goue oe tanuaga nae kau ki he gaahi tu‘i; he naa nau behe, Koe kilia ia: bea nae fetogi ia i he bule e Jotami ko hono alo.