16 Ao a taku nakoina, Iai iroura te tua, ao burabeti; ma ibukin te aomata aei ti aki butimwaia bwa e na riki bwa te tia tautaekanira; bwa e karikia ngaia bwa te tia moti i aora.

17 I mwina e taku Iesu nakoia, Te tua ao burabeti a kakoaua ibukiu; eng, ao ni kabane burabeti ake a tia ni koroia, ni karokoa Ioane, a tia n taetae ni burabeti ibukin boong aikai.

18 Man te tai arei, uean te Atua e tataekinaki, ao aomata ni kabane ake a ukoukora te koaua a waaki nako n rin iai.

19 Ao e kai mauna karawa ma aonaba, nakon ae na bwaka teuana tamrurun te tua.

20 Ao tera bukina ngkai kam na reireinaki te tua, ao ni kaakea are e koreaki; ao ni motika taekan teuare e tia ni kanakomaia te Tama bwa e na kakoroa nanon te tua, bwa kam aonga ni bane ni kaboaki?

21 O tenaan burababa! bwa kam a tia n taku i nanomi, Bon akea te Atua. Ao kam kabwaoua te kawai ae eti; ao uean karawa e karawawataaki n ami mwakuri ni iowawa; ao kam bwainikirinia ake a nimamannei; ao n ami mwakuri ni iowawa kam ukoukora kamaunaan te abanuea; ao kam anaia natin te abanuea n te kairoro. Te reke ni kai nakoimi, ngkami taan wenenibure!

22 Ao a manga taetae buakaia, bwa a un ibukin taeka, are ngaiia taan wenenibure.

23 Ma e wakinako, ni kangai, Ane e kanakoa buuna, ao e mare ma temanna, e wenenibure; ao ane e mare ma neiere e kanakoaki iroun buuna, e wenenibure. E koaua ae I tuangkami, N na kabotaui ngkami ma te aomata are e kaubwai.