1 Në fillim ungjilli u predikua nëpërmjet Birit. Dhe ungjilli ishte fjala, dhe fjala ishte me Birin, dhe Biri ishte me Perëndinë, dhe Biri ishte nga Perëndia.

2 Po ai ishte në fillim me Perëndinë.

3 Të gjitha gjërat u bënë prej tij; dhe pa të nuk u bë asnjë nga ato që u bënë.

4 Në të ishte ungjilli dhe ungjilli ishte jeta, dhe jeta ishte drita e njerëzve;

5 Dhe drita shkëlqen në botë dhe bota nuk e kupton atë.

6 Ishte një njeri i dërguar nga Perëndia, emri i të cilit ishte Gjon.

7 Po ai erdhi në botë si dëshmitar, për t’u dhënë dëshmi për dritën, për t’u dhënë dëshmi për ungjillin, nëpërmjet Birit, të gjithëve, që nëpërmjet tij njerëzit të mund të besonin.

8 Ai nuk ishte ajo dritë, por erdhi për të dëshmuar për atë dritë,

9 Që ishte drita e vërtetë, që ndriçon këdo që vjen në botë;

10 Madje Biri i Perëndisë. Ai që ishte në botë dhe bota u bë prej tij, dhe bota nuk e njohu atë.

11 Ai erdhi tek të vetët dhe të vetët nuk e pranuan.

12 Por të gjithë ata që e pranuan, atyre u dha pushtet për t’u bërë bijtë e Perëndisë; vetëm atyre që besojnë në emrin e tij.

13 Ai u lind, jo nga gjaku, as nga vullneti i mishit, as nga vullneti i njeriut, por nga Perëndia.

14 Dhe e njëjta Fjalë u bë mish dhe banoi ndër ne, dhe ne vështruam lavdinë e tij, lavdi si e të Vetëmlindurit të Atit, plot hir e të vërtetë.

15 Gjoni dha dëshmi për të dhe thirri duke thënë: Ky është ai, për të cilin fola; Ai që vjen pas meje, është më i preferuar se unë; sepse ishte përpara meje.

16 Sepse në fillim ishte Fjala, madje Biri, që bëhet mish dhe dërgohet me anë të vullnetit të Atit. Dhe të gjithë ata që besojnë në emrin e tij do të marrin nga plotësia e tij. Dhe nga plotësia e tij ne të gjithë kemi marrë, madje pavdekësi dhe jetë të përjetshme, nëpërmjet hirit të tij.

17 Pasi ligji u dha nëpërmjet Moisiut, por jeta dhe e vërteta erdhën nëpërmjet Jezu Krishtit.

18 Sepse ligji ishte sipas një urdhërimi trupor, në administrimin e vdekjes; por ungjilli ishte sipas fuqisë së një jete të pafundme, nëpërmjet Jezu Krishtit, Birit të Vetëmlindur, që është në gjirin e Atit të tij.

19 Dhe askush s’e ka parë Perëndinë ndonjëherë, veçse nëse ai ka dhënë dëshmi për Birin; sepse, nëse nuk është nëpërmjet tij, askush nuk mund të shpëtohet.

20 Dhe kjo është dëshmia e Gjonit, kur judenjtë dërguan priftërinj dhe levitë nga Jeruzalemi për ta pyetur: Kush je ti?

21 Dhe ai rrëfeu dhe nuk e mohoi se ishte Eliasi; por rrëfeu, duke thënë: Unë nuk jam Krishti.

22 Atëherë ata e pyetën, duke thënë: Si, pra, je ti Eliasi? Dhe ai tha: Unë nuk jam ai Elias që ishte për të rivendosur të gjitha gjërat. Dhe ata e pyetën, duke thënë: Je ti ai profet? Dhe ai u përgjigj: Jo.

23 Atëherë ata i thanë: Kush je ti? Që t’u japim përgjigje atyre që na dërguan. Ç’thua për veten tënde?

24 Ai tha: Unë jam zëri i atij që bërtet në shkretëtirë: Bëjeni të drejtë udhën e Zotit, sikurse thotë profeti Isaia.

25 Dhe ata që u dërguan, ishin nga farisenjtë.

26 Dhe ata e pyetën dhe i thanë: Atëherë përse pagëzon ti, nëse nuk je Krishti, as Eliasi që do të rivendoste të gjitha gjërat, as ai profet?

27 Gjoni iu përgjigj atyre, duke thënë: Unë pagëzoj me ujë, por ka një mes jush që ju s’e njihni;

28 Ai, është për të që unë jap dëshmi. Ai është ai profet, madje Eliasi, i cili, duke ardhur pas meje, është më i preferuar se unë, lidhësen e sandaleve të të cilit unë nuk jam i denjë ta zgjidh, ose vendin e të cilit unë nuk jam në gjendje ta zë; sepse ai do të pagëzojë, jo vetëm me ujë, por edhe me zjarr dhe me Frymën e Shenjtë.

29 Të nesërmen Gjoni e pa Jezusin duke ardhur tek ai dhe tha: Ja, Qengji i Perëndisë, që largon mëkatin e botës!

30 Dhe Gjoni u dha dëshmi për të njerëzve, duke thënë: Ky është ai për të cilin unë thashë, Mbas meje vjen një njeri që është preferuar përpara meje; sepse ai ishte përpara meje dhe unë e njihja atë dhe se ai do t’i shfaqet Izraelit; prandaj erdha unë, duke pagëzuar me ujë.

31 Dhe Gjoni dha dëshmi duke thënë: Kur ai u pagëzua nga unë, unë e pashë Shpirtin duke zbritur nga qielli si një pëllumb dhe qëndroi mbi të.

32 Dhe unë e njoha; sepse ai që më dërgoi mua të pagëzoj me ujë, po ai më tha: Ai mbi të cilin do të shohësh të zbresë Shpirti, dhe të qëndrojë mbi të, po ai është ai që pagëzon me Frymën e Shenjtë.

33 Dhe unë pashë dhe dhashë dëshmi se ky është Biri i Perëndisë.

34 Këto gjëra u bënë në Bethabara, përtej Jordanit, ku Gjoni po pagëzonte.

42 Dhe ai e solli te Jezusi. Dhe kur Jezusi e pa atë, ai tha: Ti je Simoni, biri i Jonas, ti do të quhesh Kefa, që është, me atë të interpretimit, një shikues ose një gur. Dhe ata ishin peshkatarë. Dhe ata menjëherë lanë gjithçka dhe ndoqën Jezusin.