JJS, Isaias 42:19–23. Chi’ilmanq sa’ Isaias 42:19–22
Li Qaawa’ naxtaqla lix moos chixtzolb’aleb’ li ink’a’ xe’raj rilb’al malaj rab’inkil li yaal; li ani neke’ab’in ut neke’paab’an te’tz’aqob’resiiq re ru.
19 Xb’aan naq tintaqla lin moos eerik’in laa’ex li mutz’ex; relik chi yaal, jun aj k’amol esil re xteeb’al ruheb’ li mutz’, ut re risinkil xtz’apb’al xxikeb’ li tz’ap xik;
20 Ut te’tz’aqob’resimanq ru us ta mutz’eb’, wi te’ab’inq chiru laj k’amol esil, lix moos li Qaawa’.
21 Laa’at jun tenamit, li nakat-ilok re k’iila k’a’aq re ru, a’b’an ink’a’ nakak’e reetal; nakate laa xik chi ab’ink, a’b’an ink’a’ nakat-ab’in.
22 Li Qaawa’ moko sa ta tz’aqal xch’ool rik’in xkomon li tenamit a’in, a’b’anan sa’ xk’ab’a’ lix tiikilal xch’ool a’an tixnima ru li chaq’rab’ ut tixk’e xloq’al.
23 Laa’at jun tenamit elq’anb’il ut poqlenb’il; eb’ li xik’ neke’ilok aawe, chixjunileb’, xate’raale sa’eb’ li jul, ut xate’xtz’ap sa’eb’ li tz’alam kab’l; xate’xchap choq’ preex, ut maajun nakolok; choq’ xmaq’omeb’, ut maajun kiyehok, Q’ajsihomaq chaq.