JJS, Exodo 4:21. Chi’ilmanq sa’ Exodo 4:21; 7:3, 13; 9:12; 10:1, 20, 27; 11:10; 14:4, 8, 17; Deuteronomio 2:30
Moko xb’aan ta li Qaawa’ naq nakawob’resiik li raam laj Farahon. Chi’ilmanq ajwi’ JJS, Exodo 7:3, 13; 9:12; 10:1, 20, 27; 11:10; 14:4, 8, 17; li junjunq raqal, naq jaltesinb’il ru chi us, naxk’ut naq a’ laj Farahon li kikawob’resink re tz’aqal li raam.
21 Ut li Qaawa’ kixye re laj Moises, Naq tatxik chi sutq’iik Egipto, chawil naq taab’aanu chixjunil li sachb’a-ch’oolej a’in chiru laj Farahon, li xink’e sa’ aawuq’, ut laa’in tatink’e chi usaak; a’b’an laj Farahon tixkawob’resi li raam, ut ink’a’ tixkanab’eb’ li tenamit chi elk.
JJS, Exodo 4:24–27. Chi’ilmanq sa’ Exodo 4:24–27
Naq li Qaawa’ naxye naq tixkamsi laj Moises xmaak naq ink’a’ naxset xtz’uumal xtz’ejwal li ralal, li xSefora naxkol xyu’am laj Moises rik’in xb’aanunkil li k’anjel a’an ruuchil laj Moises. Laj Moises naxch’olob’ lix maak.
24 Ut kik’ulman naq li Qaawa’ kixk’utb’esi rib’ chiru naq wan sa’ li b’e, chixk’atq li warib’aal kab’l. Yoo xjosq’il li Qaawa’ rik’in laj Moises, ut ok re chi t’ane’k li ruq’ sa’ xb’een, re xkamsinkil; xb’aan naq maji’ xsetom xtz’uumal xtz’ejwal li ralal.
25 Toja’ naq li xSefora kixchap jun li q’esnal pek ut kixset xtz’uumal xtz’ejwal li ralal, ut kixkut li pek chiroq, ut kixye, Ch’olch’o naq laa’at jun li b’eelomej re kik’ choq’ we.
26 Ut li Qaawa’ kixkol xyu’am laj Moises ut kirach’ab’, xb’aan naq li xSefora, li rixaqil, kixset xtz’umal xtz’ejwal li ch’ina al. Ut a’an kixye, Laa’at jun li b’eelomej re kik’. Ut laj Moises kixutaanak, ut kixmuq li rilob’aal chiru li Qaawa’, ut kixye, Xinmaakob’ chiru li Qaawa’.
27 Ut li Qaawa’ kixye re laj Aaron, ayu sa’ li yamyookil ch’och’ re xk’ulb’al laj Moises, ut xko’o ut kixtaw, sa’ lix tzuul li Dios; sa’ li tzuul b’ar wi’ li Dios kixk’utb’esi rib’ chiru; ut laj Aaron kixtz’ub’ li ru.